KOLOSE 4

1Me kemiu el merreder er a re chad, bo lungil a blekerdeliu e le melemalt omerelliu el mor a re sibmiu. Lak kom obes el kmo kemiu me ng dirrek el ngar ngii a merrederiu el ngar a eanged. 2Molemolem el di blak a rengmiu el meluluuch el diak le tuchakl a uldesuiu, e moreng a sulel a Dios. 3E mdirrek el meluluuch el kiram, ma Dios le beskemam a ungil el techall el omerk a tekingel el kirel a Kristus el dimlak lecholt er a ngar a mong. Ele tiaikid ia uchul e ak ngar a kelebus. 4Moluluuch me bo le sebechek el mo ungil el meketakl a ikel kirek el melekoi. 5Bo mungil el melebedebek a blekerdelel omerelliu el mor tirkel diak loumerang, e bo mungil el ousbech a ikel rokui el techall el cho bo betik. 6Ma tekoi el tuobed er a ngeriu bo lungil a delecherul e lomeksemeriar a reng, e bo mungil el medenge el kmo ng kirel el ua ngera cho monger er a re bek el chad. 7A Tikikus, el tar kid, el kimsal ultuil er ngii er a ureor, el kimdak el mesiou er a Rubak, a mo ouchais er kemiu a rokui el tekoi el kirek. 8Tia ia uchul mak uldurech er ngii el ekong, me ng mo sebechel el smisiich a rengmiu el olab a chisel a blekerdelam el rokui. 9A obengkel el ekong a Onesimus, el odam er kid el kmal blak a rengul, el tar kemiu. A lekong e te mo ouchais er kemiu a ikel rokui el mla duubech er tiei. 10A Aristarkus el kimdak el ngar a kelebus a melekoi a yorosku el ekor kemiu, ma Markus el chedal a Barnabas me ng dirrek. (Ng mla ekor kemiu a tekingek el kirel, me sel lekong e bo mungil el nguu er a dmuil.) 11A Josua, el Justus a tar a ngklel, me ng dirrek el melekoi a yorosku el ekong. Te di tirkaikid el tedel chad er a Judea el ulebult el mo chedal a Kristus a obengkek el oureor el kirel a Rengedel a Dios, e kmal klou a bla le ngesukak er ngii. 12A Epafras, el tar kemiu, e mesiungel a Kristus Jesus, a dirrek el melekoi a yorosku er ngii, e di blechoel el kmal blak a rengul el melatk er kemiu er a nglunguchel, el olengit er a Dios me ng ngosukemiu el mo mesisiich el oumerang, e kmal ultebechel a rengmiu el oltirakl a ikel soal a Dios. 13Ak medenge mak subedemiu el kmo ng kmal mle meringel el oureor el kiriu, kemiu ma re chad er a Laodisea ma Hierapolis. 14Ma Lukas, el toktang el betik er a rengmam, ma Demas me te dirrek el melekoi a yorosku er tir el ekor kemiu. 15Ak ulengit me mdu yorosku er ngak el mor a re bebil er kid er a Laodisea, ma klmechek el mor a Nimfa me tirkel oumerang el mo kldibel er a blil. 16Uriul er a cho mchieuii tial babier, e msiik a cheldechulel me le dirrek el mo mechuiu er a ikelesia er a Laodisea. Ng dirrek el kiriu el chuieuii sel babier er ngak el mor a Laodisea el ngar isei el ekor kemiu. 17E mdu er a Arkippus el kmo, “Alii ng diak mokor el rokir a ureor el mloterkokl er kau er omesiungel a Rubak.” 18Ngak, el Paulus, a di mle ngak el meluches el ouetkeu er kemiu. Lak mobes er ngak el ngar a kelebus. A krasia er a Dios bo lobengkemiu.

will be added

X\