KOLOSE 3

1E ngdi lsekum kom mlokiis er a kodall el obengkel a Kristus, e mnga rengmiu el mo chemau a tekoi el ngar bab, el ngar sel le ngar ngii a Kristus el kie er a kingellel er a kadekmel a Dios. 2Mnga rengmiu el mo chemau a ikel tekoi el ngar a eanged, e lak likel ngar a chutem. 3Ele kemiu a mla mad, ma klengar er kemiu a berrotel el obengkel a Kristus, ele kemiu el mla mo chedal a Dios. 4A Kristus ia meral klengar er kemiu, me sel be ledum, e kemiu me kom me duum el obengkel el ngar a klebkellel. 5Ma le ua isei, e mokoad a ngelbesel a mekngit el omichoech er a rengmiu, el oketa deleboes el delengerenger, ma olechotel a deleboes, ma klekad, ma ngibes er a deleboes, ma nglemokel, el rullii a chad el mo ouchelid a klalo. 6A ika ia uchul a ngesechel a rengul a Dios er tirkel chad el diak lorrenges er ngii. 7A ngar a mong, e kom di mle blekall er a ikang, el ua ia longedereder er a klengar er kemiu. 8E ngdi chelechang, e ng kiriu el chemoit a ikal rokui, el ngasechereng, ma klsiberreng, ma delebsochel, ma omelaes, ma omelekingel a mekngit el tekoi. 9Lak mkautingaol er a delongeliu, ele kom mla medebedii el mo mecherei sel di mla klengar er kemiu el obengkel a omerellel, 10e mla milemiu er a beches el klengar, el lomekbeches er ngii ngikel ulemeob er ngii, me ng merael el mo ua ingii, me ng rullemiu el mo ungil el medengelii ngiil Dios. 11Ma bo le ua isei, e ng dikea klekakerous er a re Chisentael ma re chad er a Judea; ma re ngar ngii er tir a botk ma re diak; ma re barbarian, ma re savage, ma re sibai ma re diak el sibai, ele di tal klou a ultutelel a Kristus el ngar kemiu el rokui. 12Kemiu a chedal a Dios el ngileltemiu el mo chedal me ko betik er a rengul. Ma le ua isei, e mochotii er a klengar er kemiu a klechubechub, ma blekokuiirreng, ma klengariourreng, ma delemedemekerreng, ma kllourreng. 13Bo lulserechakl a rengmiu, e bo mkausubes a mlo mekngit er a delongeliu, a le bor ngii a ultutakl el kirel a tar a re chad. Ng kiriu el mo kausubes, el ua ia Rubak el mla ousubes a telemelliu. 14E a ngar uchei, e bo mkaubltikerreng, ele bltikerreng a semesemel a rokui el tekoi el kmal mo ungil el uldak. 15Ma budech er a Kristus el lulekedongemiu a Dios el mor ngii el mo tal chelechad bo le tebechelel a rengmiu. E lak mobes a sulel a Dios. 16Ma osisecheklel a Kristus ma klungiolel el rokui bo le medalem er a rengmiu, e mkaosisechakl e mkellach el mor a ikel sebechel a llemesel a rengmiu, e mongitakl el olab a tekoi er a Chedaol Llechukl, ma odengesel a Kristus, ma tekoi el moumerang el oldanges e mereng a sulel a Dios. 17E a ngii di le ngeral moruul, er omelekingiu ma omerelliu, moruul el oba ngklel a Rubak el Jesus, e moreng a sulel a Dios el Chedam el okiu ngii. 18Re bechiil el redil moltubokl er kemiu er a re bechemiu, ele ng kiriu el ua isei ele kom oltirakl er a Rubak. 19Re bechiil el sechal, bo le betik a rengmiu er a re bechemiu, e lak bo meterkakl er tir. 20Re ngalek, bo morrenges a tekingir a re demmiu ma re delemiu, ele ng ungil er a rengul a Rubak cho mua isei. 21Re chedam, lak molengasech a rengrir a re ngelekiu, ele ng mo uchul e ng di chelemuul a rengrir. 22Re sibai, morrenges a tekingir a re merrederiu er a klechad er a rokui el tekoi, el diak di le sel lomes er kemiu, me bo lungil a rengrir er kemiu; morrenges er tir el meral ngar a rengmiu el okiu omengull er kemiu er a Rubak. 23Ma ngii di le ngeral moruul, bo le blak a rengmiu el meruul, el diak le kirir a re chad, e ng kirel a Rubak. 24Modengei el kmo a Rubak a mo omeskemiu a dikesiu er a ikel bla letib el kirir a re chedal el mo omeksulliu. Ele ng Kristus ia meral merrederiu el mosiou er ngii. 25E ngikel chad el mengebirukel a mo obals el kirel a ikel mekngit el omerellel, ele Dios a diak longetukel er a re chad.

will be added

X\