KOLOSE 2

1Ng soak a cho bo modengei el kmo ak kmal meringel el oureor el kiriu, kemiu ma re chad er a Laodisea, me tirkel rokui el dirkak lesekak. 2Ak melekoi el ua isei el melisiich a rengrir, a lolasem el oldak a delongelir el oba bltikerreng, me ng mo sebechir el mo diak a loumededenger er ngii el okiu a meral rolel a tekoi el lodengei, me te mo medengelii a Kristus el le bilechere Dios me ng dimlak bo lecholt el mer chelechang, 3el ngii a rolel eng mo chemolt a ikel rokui el mekreos el tekoi el lodenge Dios er a llemesel a rengul. 4Mak dmu er kemiu el kmo, lak bechere ngii di le chad me le chebeldkemiu el olab a cheleuid el tekoi, a lta e ng kor a kmal mo meral tekoi a lolekoi. 5Ele lta e ak cheroid er kemiu er a bedengek, e ngdi ngak a kmal di obengkemiu er a renguk, e dmeu a renguk el omes er kemiu el kmal mesisiich el oldak a delongeliu e oumera er a Kristus. 6Chelechal bla mnguu a Kristus Jesus el mo Rubak er kemiu, e bo moltirakl er ngii er a klengar er kemiu. 7Bo le mesisiich el ulak a delongeliu kemiu me ngii, ma klengar er kemiu lultuil er ngii, e bo mesisiich el oumerang el okiu a ikel tekoi el cho mlosisechakl er ngii, e bo mungil el mereng a saul. 8Bo mkerekikl me lak a chad el ebedemiu er a chelsengsang el leko ng llomeserreng er a klechad, el uldelid el mei el okiu a re chad ma ikel leko ng chelid el olab a dereder er a eanged, e diak le mlar a Kristus el mei. 9Ele cherrengelel a klengar er a Dios a di luleba Kristus er ser a be le chad el ngar tial beluulchad, 10me kom mla nguu a meral rolel a klengar el okiu ngii, el mengedereder er tirkel leko te chelid el olab a dereder ma klisiich er a eanged. 11A roliu el mor a Kristus a mle uchul e kom mlo nguu a botk, el diak le botk el loruul er ngii a re chad; ng botk el Kristus a uchul, el belkul a kmo ng mla dmedesemiu er a klisichel a reng er a klechad er kemiu el mengetikaik er kemiu el mor a klengit. 12Ele ser cho bo mnguu a techolb, e kom mlo medakl el obengkel a Kristus, e ulekiu ngii el techolb el mekiis el obengkel a Kristus, ele kom oumera er a klisichel a Dios el ulekisii er a kodall. 13A ngar a mong, e kemiu a di ua ia cho ble mulekoad er a roliu el mor a Dios, ele kom di mirruul a klengit, e dimlak kom chad er a Judea me le ngar ngii a Llach el mlar a Dios el mor a Moses el moltirakl. E ngdi chelechang e a Dios a mla okisii a klengar er kemiu el obengkel a Kristus, el uluusubes a kngtid el rokui. 14Ng sileldii sel mle beldukl er ngii a belsed el kired el mo meluked ma llechul el melechet er kid, e nguu el mo mecherei er ser a le nguu el mo dmelii er a kerus. 15Ser a le ngar a kerus a Kristus, e ng ngilbetii er a klisichir tirkel leko te chelid el olab a dereder ma klisiich er a melidiul, e rulleterir me te mo cheltekllel ngii el mlo mesisiich el bleketakl el lomes er tir a re chad. 16Ma le ua isei, e ng mocha kirel el diak a chad el oukerrekeriil er kemiu er a kirel a kall, ma ilumel, ma belsechel a chedaol sils, ma lechub a Tabelbuil, ma Ulengull el Sils. 17A ikal rokui a di chungel a ikel kirel el mei, e a meral ngii a Kristus. 18Lak bechere ngii di le chad me lolenganget er kemiu, el leko te ngarbab ele ng ngar ngii a bla leues, e oldubech er a leko ng klengariourreng ma omengull er a re anghel, e bai di blekall er a kldidairreng el di oltirakl er a reng er a klechad el di diak a uchul ma rsel, 19e mla choitii a Kristus, el bdelul a chelechad, el uchul e ngii el chelechad el rokir a ngar ngii a klengar er ngii, e ulekuak a klekedellel, e oltirakl er a ulekerulel el ngar sel soal a Dios. 20Ma lsekum kom mlad el obengkel a Kristus me kom mla mengubet er a omengederderel ma klisichel a ikel leko ng chelid er a eanged ma beluulchad, e ngera ma klengar er kemiu a ua isel cho dirk mchederdall er tial beluulchad? Ngera me kom dirk oltirakl a ikel llach el kmo, 21“Kele mokera ku ikang, ma kele mongarm ku ikei, ma kele morutech ku ngerang”? 22A ikal rokui a di melekoi el kirel a klalo el mo diak a ultutelel, sel tal bo de merek el ousbech; e a ika di llach el lolibech a re chad e olsisechakl. 23A ikal llach a meral kor a mo chemolt el ultuil er a llomeserreng. Tousbech a ikal llach er a ikel loldubech er a re chad me te ngar ngii. Te kmo ng kirir el mengull er a re anghel, e kmo ng ngariou a rengrir e a lechub e ng diak. Te kmo te mesiou er a Dios a lomekcharm er tir. E ngdi ikal llach a diak a ngeral le rellii el omtebechel a ikel soal a bedenged.

will be added

X\