KOLOSE 1

1Ngak el Paulus el le rirellak a Dios el mo apostol er a Kristus Jesus, ma tar kid er a Timothy, 2a meluches el ekor kemiu el chedal a Dios el ngar a Kolose, el odam er kemam el okiu a Kristus el blak a rengmiu el oltirakl er a Dios. A Dios el Demad le beskemiu a krasia ma budech. 3Sel kimoluluuch, e aki di blechoel el mereng a sulel a Dios, el Demal a Rubak er kid el Jesus Kristus, 4ele ki mla remenges el kmo kom oumera er a Jesus Kristus e betik a rengmiu er a re chedal a Dios el rokui. 5E ser cho mkot el remenges a meral osisechakl el okiu a Ebangkelio, e kom rirenges a chisel isel klungiaol el lolekoi er ngii a Ebangkelio el molatk e mengiil er ngii. Ma uchul me kom oumerang e oubltikerreng a ultuil er isel molatk e mengiil er ngii, el kldmokl er a eanged el kiriu. 6Tial Ebangkelio a melemolem el meruul a ungil el kirir a re chad e merael el omerk er ngii er a beluulchad, el di ua iser a le kot el mer kemiu, el omuchel er isel sils er cho mrenges a chisel a krasia er a Dios el mor a re chad e mo medengelii el kmo ng meral ua ngerang. 7Kom silubii ngii el krasia er a Dios er a Epafras, el betik er a rengmam el tar a mesiungel a Kristus el kimdak el kmal blak a rengul el oureor el kirel a Kristus el olengeseu er kemam. 8Ng mla ouchais er kemam er a bltikerreng el lulekedbechii a Chedaol Reng er a delongeliu. 9Isei ia uchul me ser a kim renges chisiu el mer chelechang, e aki di mle blechoel el meluluuch el kiriu, el olengit er a Dios me ng rullemiu el mo ungil el medengelii a soal el okiu a llomeserreng ma utebengel a tekoi el ngar a Chedaol Reng er ngii el mer kemiu. 10Iseikid e a klengar er kemiu a mo oltirakl er a soal a Rubak, ma cho moruul a di blechoel el ungil er a rengul, el meruul a bek el bedengel a ungil el tekoi, e merael el mo ungil el medengelii a Dios. 11Ak meluluuch ma Dios lousbech er a mengasireng el klisichel el rullemiu el kmal mo mesisiich, me bo le sebechiu el klou a rengmiu e outekangel er a rokui el tekoi el di ungil a rengmiu, 12e mereng a sulel a Chedam, el rirellid a re chedal a Dios el mor a belsachel er a re mo oudiukes a ikel bla le kedmokl a Dios el kirir a re chedal er a rengedel a llomes. 13Ng mla osebelid er a klisichel a rengedel a ilkolk, e ngoikid el mor a rengedel a Ngelekel el betik er a rengul, 14el uchul osebeled, el melubet er kid er a klengit. 15A Kristus a moues el okesiul a diak le moues el Dios. Ng Ngelekel el Sechal el okiu uchei e ngarbab er a ikel rokui el mle duubech. 16Ele Dios a ulekiu ngii el meob a ikel rokui el ngar a eanged ma chutem, el moues ma diak le moues, el uldimukl er ngii tirkel kor a chelid el ngar a kingellel a ilteet, ma re telechull a dui, ma rulab a dereder, ma rulab a klisiich. Ma Dios a milebii a eanged ma chutem el rokir el ulekiu ngii el kirel ingii. 17A Kristus a mlar uche er a rokui el tekoi, e ngii a uchul e a rokui el tekoi a urreberebet er a ikel le ngar ngii. 18Ngii a bdelul a chelechad, el ikelesia. Ng uchul a beches el klengar er ngii. Ng Ngelekel el Sechal el ngar uchei, el mlokiis er a kodall, me ng mo uchul e ng kot el ngarbab er a rokui el tekoi. 19Ele Dios a tilbir el kmo a Ngelekel a mo oba cherrengelel a klengar er ngii el diak le ngodech er a Dios. 20Ma Dios a tilbir a okiu ngii el Ngelekel el suumech el mo oltirakl er ngii a rokui el tekoi el ngar a eanged ma chutem, e rullii a budech er a delongelel ngii ma re chad el okiu a kodellel er a kerus. 21Ser a ngar a mong, e kom mle cheroid er a Dios, e oucherarou er ngii er a mekngit el omerelliu ma omelebedebekiu. 22E ngdi chelechang, e a Dios a ulekiu a Ngelekel el mlo chad e mad el sumechii a delongeliu kemiu me ngii, me bo le ngikemiu el mor bitar ngii el mla mo chedaol e klikiid e diak a telemelliu. 23Ma le ua isei e ng kiriu el melemolem el blak a rengmiu el ngar a mesisiich e meduch el omekedecheraol, e diak bo mcheroid er sel omelatk el mngiluu er ser cho mrengesii a Ebangkelio. Ngak el Paulus a mla mo mesiungel ingii el Ebangkelio, e tial Ebangkelio a mla mosisechakl el mor a re bek el chad er a beluulchad. 24Ngak er chelechang a dmeu a renguk er a ringelek el kiriu, ele ak ukiu a ringelel a bedengek el melemolem el mo churrungel a ikel dirk medechel el ringelel a Kristus el kirel a bedengel, el ikelesia, 25e ngak a le tiltkak a Dios el mo mesiungel ngii el ikelesia, mak mo oureor el kirel a klungioliu, el mo omerk a tekingel a Dios el rokui, 26el tekoi el mle berrotel el kmal mla mo meketeket er a telecheroll el mor a telecheroll, e ngdi chelechang, e ng mla ocholt er a re chedal. 27A Dios a tilbir a mo olecholt er a re chedal a klungiolel ma klebkellel a bertelel, el dirrek el kirir a rokui el chad, el ngii el bertelel a kmo a Kristus a ngar a chelsiu er chelechang, el belkul a kmo kom mor a belsachel er a klebkellel a Dios. 28Me ng ngerchelam er chelechang el omerk a chisel a Kristus el mor a re bek el chad. Aki ousbech a rokui el bedengel a llomes el mengelechel e olsisechakl er tir, me ng mo sebecham el mekrolterir el rokui el mor medal a Dios el mla mor a belsachel er a re ultebechel el chad er a rolel otireklel a Kristus. 29ltia ia uchul mak kmal meringel el oureor el mor a ikel sebechek, el ousbech er a klou el klisiich el lomeskak a Kristus el oureor el ngar ngak.

will be added

X\