RELLIR 8

1A Saulus a mle ungilbesul er a rengul a okodellel a Stefanus. Isel sils e a Ikelesia er a Jerusalem a mocha chuarm er a meringel el odechelakl. A rokui el oumerang a di ulebriid er a ikel beluu er a Judea ma Samaria, e ngdi re apostol a dimlak. 2A re milengull er a Dios el chad a mlo doklii a Stefanus e milengeiung er ngii. 3E a Saulus a millasem el olekngemed er a Ikelesia me ng mirrael obliil el mengurs er a ruumerang el sechal ma redil el mo olsiseb er tir er a kelebus. 4Tirkel oumerang el melterakl a ullisechakl a tekingel a Dios er ker me ker. 5A Filip a mlor a klou el beluu er a Samaria me ng ullisechakl er a re chad a tekoi el kirel a Mesias. 6A kloul seked a mle blak a rengrir el orrenges a lolekoi a Filip, me ser a lorrenges er ngii e te miles ongasireng el tekoi el le riruul. 7A mekngit el chelid a mle klou el oldiu e tuobed er a re betok el chad, ma re betok el chitechut ma re tauchil a mlo ungil. 8Me ng mlar ngii a kloul deurreng er a chelsel ngiil beluu. 9Ng mlar ngii a tal chad el Simon a ngklel el kiliei er sei, el uluuelai el mengas a rengrir a re chad er a Samaria. Ng di mle ngii el melekoi el kmo a leko ng tar a olab a klisiich, 10ma re bek el chad er a beluu el ngarbab ma re ngariou el chad a kmal mle blak a rengrir el orrenges er ngii. Te millekoi el kmo, “Ngkaikid ngikel lomekedong er ngii sel klisiich er a Dios el lolekoi er ngii el kmo, ‘Ngarbab el Klisiich.’” 11Ng mle blak a rengrir el orrenges er ngii ele ng mle meketeket el olab olai el mengas a rengrir. 12Ngdi ser a bo loumerang osisecheklel a Filip el kirel a ungil chais er a Rengedel a Dios ma Jesus Krisrus, e a re sechal ma redil a dul di mlo metecholb. 13A Simon me ng dirrek el mlo oumerang; e a uriul er a le metecholb e ng di ullekeed er ngii er a Filip e mlo mechas a rengul er a meklou el tekoi ma ongasireng el merruul. 14A re apostol el ngar a Jerusalem a rirenges el kmo a re chad er a Samaria a mla nguu a tekingel a Dios me tulderchii a Petrus ma Johanes el mor tir. 15Me ser a le bong, e te milluluuch el kirir a ruumerang me bo le sebechir el nguu a Chedaol Reng. 16Ele ng dirkak a tar tir el bo le metengel er ngii a Chedaol Reng; te di meltecholb el ngar a ngklel a Rubak el Jesus. 17E sola ma Petrus ma Johanes a milor a chimorir er tir me te ngiluu a Chedaol Reng. 18A Simon er a lesengei el kmo a ruumerang a ngiluu a Chedaol Reng er ser a le bor a chimorir er tir a re apostol, e ng ultobed a udoud el leko ng omsa Petrus ma Johanes 19e dilu el kmo, “Dirrek el beskak tial klisiich me ngikel bo kbor a chimak er ngii, bo le nguu a Chedaol Reng.” 20Ma Petrus a dilu er ngii el kmo, “Kau ma ududem mdul mo remiid, ele komdasu el kmo ng sebechem el omechar er a klisichel otengelel a Chedaol Reng el olab a udoud! 21Kau a diak a blingelem ma lechub e ng dikesem er a ureram, ele rengum a diak le melemalt er medal a Dios. 22A le ua isei e mobult er tial mekngit el uldesuem, e molengit er a Rubak me lousubes er omelebedebekem el kirel tial tekoi. 23Ele kmedengei el kmo kau a mui er a mekngit el chelechei e dirrek el sibil a klengit.” 24Ma Simon a dilu er a Petrus ma Johanes el kmo, “Ak ulengit me moluluuch er a Rubak el kirek, me lak a tar a ikal tekoi el bla mdung el kirek el mo duubech.” 25Uriul er a lolecholt e louchais a tekingel a Rubak a Petrus ma Johanes, e te liluut el mor a Jerusalem. E ser a le ngar a omerolir e tullisechakl er a Ebangkelio er a betok el beluu er a Samaria. 26A tal anghel er a Rubak a dilu er a Filip el kmo, “Mkedmeklau e morael el bedul a dimes el mor sel rael el ngar a Jerusalem el mor a Gasa.” (Tial rael a diak lousbech er ngii er chelechang.) 27- 28Me ng kildmeklii a Filip e mirrael. Itia e a tal eunuk er a Ethiopia el oungerachel a mekreos el kloklel a kuin er a Ethiopia, a mlar omerolel el mo remei. Ng mlar a Jerusalem el mlo mengull el meluluuch er a Dios me ng mlar a mlil el luuta el mor a blil. Me tia er a le ngar a mlai, e ng milenguiu er a babier er a Profet Isaia. 29Ma Chedaol Reng a dilu er a Filip el kmo, “Mokedau er sel mlai.” 30Ma Filip a rirurt el mong e rirengesii el menguiu er a babier er a Profet Isaia. Me ng uleker er ngii el kmo, “Ke medengelii a belkul sel monguiu er ngii?” 31Me ngiil chad a ulenger el kmo, “Ng mekera e sebechek el mo medengelii a lak a chad el smodii er ngak?” Itia e ng ullengit er a Filip me bo le ngasech el mo obengkel dengchokl er a mlai. 32Tiakid sel tekoi er a Chedaol Llechukl el lulenguiu er ngii: “Ngii a ua sib el lulebang el mo omekoad er ngii; ng ua ngelekel a sib el di chelellakl a longimd a bsechel. Ng dimlak a tal tekoi el le delii. 33Ng mlukrur ma omeruul el mor ngii a mle chebirukel. Ng diak a sebechel el mo ouchais a chisel a klengelakel er ngii, ele klengar er ngii er tial beluulchad a mla mor a ulebengelel.” 34Me ngiil chad a dilu er a Filip el kmo, “Ka msbedak el kmo a profet ng melekoi er techang? Ng melekoi er ngii ma lechub e ng melekoi er a kuk tar a chad?” 35Itia e a Filip a mocha mengedecheduch me ng ulemuchel er itial tekoi er a Chedaol Llechukl e uluuchais er ngii er a Ebangkelio el kirel a Jesus. 36Me te melemolem er omerolir el mo metik er a ralm me ngiil chad a dmu el kmo, “Tiakid a ralm. Ng ngera dirk orreked er ngak me ng diak kmetecholb?” 37(Ma Filip a dilu el kmo, “Ng sebechem el metecholb a lsekum koumerang er a rengum el rokir.” Me ng dilu el kmo, “Ak uumerang. Ak uumerang el kmo a Jesus Kristus a ngelekel a Dios.”) 38Ng ultebedii a tekingel el merrob er a mlai, e ngii ma Filip a dilak el mo metengel er a ralm, ma Filip a tilechelbii. 39E a le merma le tekerekl, e a Reng er a Rubak a ngiluu a Filip el choridii. Me ngiil chad a dimlekea lluut el mesang, e ngdi kmal mle ungil a rengul e melemolem er omerolel. 40A Filip a mlo duum er a Asotus, e a lorolang el mor a Sesarea, e ng ullisechakl er a Ebangkelio er a ikel bek el beluu el blo lengelakl er ngii.

will be added

X\