RELLIR 7

1Ma Ngarbab el Prist a uleker er a Stefanus el kmo, “Ng mera ikel lolekoi?” 2Ma Stefanus a dilu el kmo, “Kemiu el odam er ngak ma re demak morrenges! A Dios er a klebkall a mlo duum er a ucheled el Abraham er a le ngar a Mesopotamia, er uchei er a lorael el mo kiei er a Haran. 3A Dios a dilu er ngii el kmo, ‘Mtobed er a beluam ma delongelir a re bebil er kau e morael el mor sel beluu el bo kuchotii er kau.’ 4Misei e ng tilobed er a belual el mo kiei er a Haran. E a uriul er a le mad a demal a Abraham, e a Dios a dilu er ngii me ng millukl el mer tial beluu el mkie er ngii er chelechang. 5Iseikid e a Dios a dimlak le bsa Abraham a ngii di le chutem er isei me bo le kloklel, ng ka di ble le telkib kung a le bsang; ngdi Dios a rirellii a telbilel el mor ngii el kmo tial beluu a mo kloklel ngii ma re ngelekel el mei er uriul. Ser a le tibir a Dios el ua isei, e a Abraham a dirkak a ngelekel. 6Me tiakid a le dillii a Dios el mor ngii el kmo, A re ngelekem a mo kiei er a ngodech el beluu, me te mo sibai e te mo mekngit er tir er isei el 400 el rak. 7Ngdi ngak a mo omals er tirkel chad el mo ousibai er tir, e a re ngelekem a mo tuobed er isel beluu el mer tiang, me te mo mengull el meluluuch er ngak.’ 8Ma Dios a milsa Abraham a botk el olangch er a telbiil. Ma tal sandei er uriul er a le mechell a Isak e a Abraham a miltkii, ma Isak a miltkii a ngelekel er a Jakob, ma Jakob a ulemotk er a re truich ma terul ngelekel, el tirkel chetengakl el uchelir a re chad er a beluad. 9“A re ngelekel a Jakob a mlo mechechei er ochellir er a Josef me tulterur el mo sibai er a Ekipten. Ngdi Dios a ulebengkel 10e mle ungil el mesebechakl er ngii er a bek el ringel el le siliseb er ngii. Ma Josef er ser a bo lecholt er medal a king er a Ekipten, e a Dios a milsa ungil blekerdelel ma llemesel a rengul, ma king a rirellii el mo merreder er a beluu ma blil. 11E sola e ng mlor ngii a bosech er a Ekipten el rokir ma Kanaan el rokir, el mlo uchul a klou el ringel. Ma rucheled a mlo diak el sebechir el metik a kelir, 12me ser a le renges a Jakob el kmo ng ngar ngii a kall er a Ekipten, e ng uldercheterir a re ngelekel, el tirkel ucheled, me ng mle ketengir el mong. 13E a ongerul le bong, e a Josef a ulechotii er a re bebil er ngii, ma king er a Ekipten a mlo medengelii a chisel a blil a Josef. 14Ma Josef a silumech a tekoi el mor a demal er a Jakob el melai er ngii el mor a Ekipten, ngii ma telungalek el rokir, e a ildisir a rokui el chad a mle 75. 15Misei e a Jakob ma re ngelekel a mlor a Ekipten, e ngii ma re ngelekel a mlad er isei. 16A bedengir a le ngilai el mor a Sikem me ng meldakl er sel olekull el lulecherar a Abraham er a kebliil er a Hamor. 17“Ser a bo lekeed a belsechel el kirel a Dios el mo oltaut er a telbilel el mor a Abraham, e a ildisir a re chedad el ngar a Ekipten a kmal mla mo obdois, 18e sola e a Ekipten a blo longedereder er ngii a tal king el dimlak lodengei a chisel a Josef. 19Ng milengeblad er a rucheled, e mle meringel a tekingel er tir, e ulerrimel er tir me te mengoit er a re ngelekir el leko le mad. 20Isei e a Moses a mlechell, e kmal mle ungil ngalek. Ng mle edel buil el longedmokl er ngii er a blil, 21e ser a lotebedii er a blil e a ngelekel a king el redil a rirdelii e ulemekeroul er ngii el ua le meral ngelekel. 22Ng mlosisechakl er a bek el llomeserreng er a re chad er a Ekipten e mlo klou e chad el mesisiich a tekingel ma omerellel. 23“E a bocha le 40 rekil a Moses, e ng tilbir er a rengul el mo merriter el kmo a re chedal el chad er a Israel, ng mle ua ngera blekeradel el mor tir. 24Ng milsa tar tir el lomcheracheb er ngii a chad er a Ekipten me ng mlo mesebechakl er ngii, e mekodir ngiil chad er a Ekipten. 25(Ng ulemdasu el kmo a re chedal a mo omtab el kmo a Dios a mo ousbech er ngii el mo ngubeteterir, ngdi tir a dimlak lutebengii itiang.) 26E a bo le kukuk e ng milseterir a re terul chad er a Israel el kakoad me ng millasem el meruul er a budech er a delongelir. Ng dilu el kmo, ‘Morrenges kemiu el chad, kemiu a dul di chad er a Israel; ngera me kom kakoad el ua isei?’ 27Me ngikal uleldechelakl er ngikal tar a chad a uldbechii a Moses el choridii e oker er ngii el kmo, ‘Ng techa rirellau el mo mengedereder e oukerrekeriil er kemam? 28Ng mla mo soam el omekoad er ngak el ua ser cho mokodir ngikel chad er a Ekipten er chelii?’ 29Ma Moses er a le renges a ikang, e ng chiliis er a Ekipten el mo kiei er a beluu er a Midian. E mlar isei el mo teru re ngelekel. 30“Ng mlo chuib 40 el rak, e a tal anghel a mlo duum er a Moses el ngar a kerdel a kmard el kerrekar er a ked er bita er a Rois Sinai. 31A Moses a mlo mechas a rengul er sel lilsang, me ng ullekeed el mor ngii el kerrekar me bo lungil el mesang. E sola e rirengesii a ngerel a Rubak el kmo, 32‘Ngak a Dios er a ruchelem, el Dios er a Abraham, ma Isak, ma Jakob.’ Ma Moses a mlo omritel er a dektel me ng dimlak lomes er a Rubak. 33Ma Rubak a dilu er ngii el kmo, ‘Mngubet oecherem, ele sel mdechor er ngii a chedaol chutem. 34Ak mla meseterir a re chedak el kmal chuarm el ngar a Ekipten, e mla remenges a lengelel a rengrir, mak mle metengel el me melubet er tir, me mei, me bo kuderchau el mor a Ekipten.’ 35“A Moses a ngikel lultngeklii a re chad er a Israel er a loker el kmo, ‘Ng techa rirellau el mo mengedereder e oukerrekeriil er kemam?’ Ngdi ngii ngikel lulderchii a Dios el mo mengedereder er a re chad e mo melubet er tir el oeak a ngelsuil a anghel el mlo duum er ngii er a kmard el kerrekar. 36Me ng ngilititerir a re chad el tuobed er a Ekipten, el mirruul ongasireng ma meklou el tekoi er a le ngar a Ekipten ma le ngar a Bekerkard el Daob ma le ngar a ked el 40 el rak. 37Ng Moses ngikel dilu er a re chad er a Israel el kmo, A Dios a mo oderchii a tal profet el ekor kemiu el ngii a tar kemiu el chad er a belumiu el di ua ser a loderchak.’ 38Ng ngii ngikel ulebengterir a re chad er a Israel er a le kldibel er a ked; ng ulebengterir a rucheled el ngar sei e ulebengkel a anghel el ngikel milengedecheduch er ngii er a Rois Sinai, e ngilai a di ngar el tekingel a Dios me ng omdedelid el mer kid. 39“E ngdi rucheled a mle chetirir el olengesenges er a Moses; te bai millibek er ngii e uluureng a lmuut el mor a Ekipten. 40Me te dilu er a Aron el kmo, ‘Mruul a chelid er kemam me bo le mengeteklam. Ng diak kimodengei el kmo ng mochar ker ngikal Moses, el ultebedemam er a Ekipten.’ 41Iseikid e te rirellii a bleob el chelid el ua teletelel a sechal el kerbou, e uleldars a tenget el mor ngii, e meruul er a ungilklebesei el mengull er a di mle tir el rullii el klalo. 42Ma Dios a mlo ikreterir e mechititerir me te mlo mengull el meluluuch a btuch er a eanged, el ua ikel llechukl er a babier er a profet el kmo: ‘Re chad er a Israel! A ikel charm el mulemekoad e melenget er a ikel 40 el rak el blar a ked a dimlak le kirek. 43Kom milengol er a tento er a chelid el Molok, ma bleob el okesiul a Refan, el btuch el mouchelid er ngii; a ikang a bleob el chelid el murruul el mo mengull el meluluuch. Misei e ak mo choridemiu el mo blebaol er a beluu el kuk cheroid er a Babilon.’ 44“A Tento er a Rubak a mlar a delongelir a rucheled er a le ngar a ked. Tia le rirellii el oltirakl er a teletelel el le childerderii a Dios er a Moses. 45Uriul, e a rucheled a ngiluu ngiil Tento el mesterir a re ngelekir me te mengol er ngii el obengkel a Josua el mo melai er a beluu er a ikel renged el Dios a uleldik er a re chad er ngii e tir a mo soiseb. Me ng mlar isei el mo lmuut er a taem er a David. 46A David a mle ungil er a rengul a Dios e ullengit me le kengei er ngii me bo lokedecherur a blai el kirel ngiil Dios er a Jakob. 47Ngdi bai Salomon a milekedecherur ngiil blai. 48“Ngdi Kot el Ngarbab el Dios a diak le kiei a blai el rruul er a re chad; el ua lolekoi a profet el kmo, 49A Rubak a kmo a eanged a kingellek, ma beluulchad a le kldoel ochik er ngii. Ng ua ngeral blai cho bo momekedechor er ngii el kirek? Ngar ker sel bo kkiei er ngii? 50Ng diak le chimak a riruul a ikal rokui?’” 51Ma Stefanus a millemolem er a cheldechedechal el kmo, “Ng meral medecherecher a rengmiu. A rengmiu a meral diak leko Dios, ma dingemiu a mechad el kirel a tekingel! Kemiu a kmal di ua rucheliu, kom dirrek el blechoel el omtok er a Chedaol Reng! 52Ng kol mlar ngii a tal profet el dimlak loldechelakl er ngii a rucheliu? Te milekodeterir a ruderchelel a Dios el uluuchais er tir er a irechar el kirel a melemalt el mesiungel a Dios. Me chelechang e ng kuk kemiu a ulterur e mekodir. 53Kemiu tirkel ngiluu a llechul a Dios, el uleak a re anghel el ekor kemiu, e ngdi dimlak moltirakl er ngii!” 54A re chedal Olbiil er a lorrenges er a Stefanus e ng kmal mlo kesib a rengrir, ma ungelir a ulelengchongch er a klsbengel a rengrir er ngii. 55Ngdi Stefanus el teluchel er a Chedaol Reng, a dilangesbab el mor a eanged e milsa klebkellel a Dios, ma Jesus el dechor er a mo bedul a kadekmel a Dios. 56Me ng dilu el kmo, “Mesa sei! Ak umes er a eanged el blok ma Ngelekel a Chad el dechor er a mo bedul a kadekmel a Dios!” 57A re chad er Olbiil a uleldiu e ngma chimorir el tminget a dingerir, e sola e di rirurt el rokui el mor ngii, 58e ngiluu el otebedii er a ikrel a beluu e metechii er a bad. Tirkel mlar isei a mileche bilir me ng omes a tal kekerel chad el Saulus a ngklel. 59E tir a di ulemetech er a Stefanus me ng ulemekedong er a Rubak el kmo, “Rubak el Jesus, ak uterekeklii a klengar er ngak er kau!” 60Ng mlo outubuach e klou a ngerel el oldiu el kmo, “Rubak, mousubes er tial kngterir.” Ng di dillii itiang e suebek a telil.

will be added

X\