RELLIR 6

1E tial lesal beteknga rultirakl er a Jesus e ng mlor ngii omengeremrum er a delongelir a re chad er a Judea el melekoi a Grik ma re di melekoi a Hebru. A re melekoi a Grik a millekoi el kmo a re melakl dil a mlechoit er a bek el omerusel a udoud. 2Itia e a re truich ma terul apostol a ulemekedong er a rokui el oumerang el mo kldibel e dmu el kmo, “Ng diak lungil er kemam a kim chitii osisecheklel a tekingel a Dios e bo kim oungerachel a udoud. 3Ma le ua isei, e mngilteterir a re teuid el sechal er a delongeliu el dodengelterir el cheltikaik er a Chedaol Reng e kmal mellomes a rengrir, me bo loungerachel er tial tekoi. 4Isei e kemam a mo mededaes el kirel a nglunguuch ma urerel osisechakl.” 5A tekingir a re apostol a mlo ungil er a rengrir a rokuil chad, me te ngileltii a Stefanus, el kmal oumerang er a Jesus e cheltikaik er a Chedaol Reng, ma Filip me te ngileltii ngii ma Prokorus, ma Nikanor, ma Timon, ma Parmenas, ma Nikolaus el chad er a Antiok, el uchei e ng mle Chisentael e obult el mor a klechelid er a re chad er a Judea. 6Me te ngilititerir el mor a re apostol me te milluluuch e mor a chimorir er tir. 7Ma tekingel a Dios a mengal uleberk, ma rultirakl er a Jesus el mlar a Jerusalem a mengal mlo betok, e dirrek el betok er a re prist a mlo oumerang er a Jesus. 8E a Stefanus, el mlukngeltengat er a Dios e mui er a klisiich, a riruul a ongasireng ma meklou el tekoi er a delongelir a re chad. 9Ngdi mlar ngii a re bebil chad el ulemtok er ngii, el chedal a blil ongdibel er a re chad el lomekedong er tir el kmo Mlo Mimokl Tirka chad er a Judea el mlar a Kirene ma Alexandria el mei. Tir ma re kuk bebil er a re chad er a Judea el mlar a ikel beluu er a Silisia ma Asia el mei e ulemuchel el mengaititekangel er a Stefanus. 10Ngdi Chedaol Reng a milsa Stefanus a llomeserreng, me sel longedecheduch e ng di mo diak el sebechir el mtekengelii. 11Itia e tulemechar er a re bebil chad el mo melekoi el kmo, “Aki rirengesii ngikal chad el mengedecheduch el omtok er a Moses ma Dios!” 12Itia e te rirelleterir a re chad, ma re mechuodel ma re sensei er a Llach el mo ouedikel. Me turrekedii a Stefanus e ngiluu el mor medal Olbiil. 13E sola e ngilititerir a re bebil chad el mo melekoi a blulak el tekoi el kirel. Me te dilu el kmo, “Ngikal chad a di blechoel el mengedecheduch el omtok er a chedaol Templo er kid ma Llach er a Moses. 14Aki rirengesii el melekoi el kmo ngikal Jesus er a Nasareth a mo toreklii tial Templo e mo ngmodech a rokui el siukang el le bilskid a Moses!” 15Me tirkal rokui el dilengchokl er a blil Olbiil a ulengengii a Stefanus e milsa medal el ua medal a anghel.

will be added

X\