RELLIR 5

1Ma tal chad el Ananias a ngklel, a dilak ngii ma bechil er a Safira el oterur a chetemir. 2Ng mle kaodengei ngii ma bechil e ng oreked a bebil er a udoud e a bebil a lengai el mo mesterir a re apostol. 3Ma Petrus a dilu er ngii el kmo, “Ananias, ngera uchul me ke kilengei er a Satan me ng choderderau e rullau me komulak er a Chedaol Reng ele ke mla oreked a bebil er a cheral a chutem? 4Uchei er cho moterur a chutem e ng mle chetemem; ma uriul er cho moterur, e a cheral a ududem. Ngera uchul me ke tilbir a mo meruul er choua isel tekoi? Kau a dimlak momulak er a re chad e kau a bai ulemulak er a Dios!” 5Itia er a le renges a ikal tekoi a Ananias e ng di mlo obiou el mad, me tirkel rokui el rirenges a mlo medakt. 6Ma re mekekerel chad a mlong me te millemengii a cheklechel, e nguu el tuobed el mo doklii. 7Uriul er a bekord edel sikang e a bechil a mlei el diak lodengei a ikel tekoi el mla mor ngii. 8Ma Petrus a uleker er ngii el kmo, “Ka msbedak el kmo ng tiaikid a cherrungel el ildisel a udoud el mngiluu kau ma bechim el kirel a chetemiu?” Me ng ulenger el kmo, “Choi, ng tilechaikid el rokir.” 9Itia e a Petrus a dilu er ngii el kmo, “Ngera uchul me kau ma bechim a tilib a rengmiu el mo melasem er a Reng er a Rubak? Tirkel chad el mlo melakl er a bechim a ngar a tuangel er chelechang, me te dirrek el mo ngoikau el mo doklau.” 10Me ng di meltilech er bita er ochil a Petrus e mad. Ma be letuu tirkal mekekerel chad e te mesang el mla mad me te nguu el tuobed el mo doklii er bita er a bechil. 11A Ikelesia el rokir ma re bek el ngodech el chad el rirengesii tial tekoi a kmal mlo medakt. 12Ng betok el ongasireng ma meklou el tekoi a le riruul a re apostol er a delongelir a re chad. A rokui el oumerang a mle kldibel er a Berangdang er a Salomon. 13A re chad a kmal chilat er tir e ngdi dimlak a tal chad el bekeu el mo oltoech er ngii er a delongelir. 14Ng di mirrael el mol mong e a re betok el sechal ma redil a mlo oumera er a Rubak me te mlo bebil er tir. 15A ikel le riruul a re apostol a mlo uchul ma re smecher el chad a le ngilititerir el mor a rael e melecha er tir er a dusall ma chedecholl el mengiil er a Petrus sel bo lengelakl, me bo le sebechel a chungel el mor tir. 16Ma klou el seked er a re chad el mlar a ikel beluu el iliuekl er a Jerusalem a mlong el obeteterir a re smecher ma re blekall er a mekngit el chelid, me te rokui el mlo ungil. 17E sola e a Ngarbab el Prist me tirkel kldemel el chedal a cheldebechel er a Sadusi a kmal mlo mechechei me te mocha ouedikel. 18Te mildechemeterir a re apostol e osisebeterir er a blil a kelebus er a beluu. 19E sel kesus e a anghel er a Rubak a ngila chesimer er a kelebus, e choitikikterir a re apostol el tuobed e dmu er tir el kmo, 20“Morael el mor a Templo e msbedeterir a re chad er a rokui el chisel tial beches el klengar.” 21Ma re apostol a ullengesenges, me ng di mle tutau e te mor a Templo e mocha olisechakl. E a Ngarbab el Prist ma re kldemel a ulemekedong er a rokui el mechuodel el chad er a Judea el mo kldibel el kirel a cheldellel a cheldecheduch er Olbiil; me te mlo kldibel e otebedii a tekingir el mor a kelebus me le mengai a re apostol el mer mederir. 22Ma re bulis a mlong e dimlak le betik er a re apostol er a kelebus, me te liluut el mo subedeterir a re chad er Olbiil el kmo, 23“Ser aki bor a kelebus, e a chesimer a mle ungil chelsimer, ma re mengkerengel a kelebus a mengkar a tuangel e ngdi ser a kim nguu a chesimer, e ng dimlak a tal chad er a chelsel!” 24A re bderrir a re prist ma bderrir a re mengkerengel a Templo er a le renges ngiil tekoi e ng mlo blosech er a rengrir. 25E sola e a tal chad a mlo soiseb el dmu el kmo, “Ka morrenges! Tirkel chad el mulsisebeterir er a kelebus a ngar a Templo el olisechakl er a re chad!” 26Itia e a merrederir a re mengkerengel a Templo ma re chedal a mlong e lmuut el ngoititerir a re apostol el mei. Ngdi dimlak loba meringel tekoi ele te mle medakt er a re chad a le betecheterir er a bad. 27Te ngilititerir a re apostol el mo dechor er mederir a re chad er a Olbiil, e a Ngarbab el Prist a dilu er tir el kmo, 28“Aki kmal milengelechel er kemiu er a meringel tekoi el kmo ng diak molisechakl el oba ngklel ngikal chad; e ka mues a ikal bla mruul! Kom mla merk osisechekliu er a Jerusalem el rokir, e somiu el rullemam el mo uchul a kodellel ngiil chad!” 29Ma Petrus me tirkal bebil er a re apostol a dula el kmo, “Kemam a kiram el olengesenges er a Dios el kuk ngar uchei er a kim olenge senges er a re chad. 30A uriul er cho mdelii a Jesus er a kerus el mekodir, e a Dios er a rucheled a ulekisii er a kodall. 31A Dios a ngiluu el mor a kadekmel el Merreder e Osobel, el mesterir a re chad er a Israel a techall el obult ma Dios bo lousubes a kngterir. 32E kemam a ocholt er a ikal tekoi, ng kemam ma Chedaol Reng, el mlar a Dios el mei itirkel olengesenges er ngii “ 33Ma re chad er Olbiil er a le renges a ikal tekoi e ng kmal mlo kesib a rengrir me ng mlo sorir el omekoad er a re apostol. 34Ngdi Gamaliel, el tar a re chad er a Olbiil, el Farisi e sensei er a Llach, el kmal longull er ngii a re bek el chad, a milekiis el mo dechor e otebedii a tekingel me lotebedeterir a re apostol el telkib, 35e sola e ngii a dilu er a re chad er Olbiil el kmo, “Kemiu el chad er a Israel, bo mkerekikl er a ikel moruul el mor tirkal chad! 36Kom melatk er a mla memong er a Theudas er a loruul er ngii el leko ng tar a klou a belkul el chad, me te bekord el 400 el chad a mlo obengkel. Ngdi ngii a lulekodir, ma rubengkel a ulebriid ma lurruul er ngii a ngilemed el mo diak. 37E a uriul er isei e ng mle duum a Judas el chad er a Galilea er ser a omelai el ulecherangel er a re chad, me ng klou el seked a mlo oltirakl er ngii, e ngdi dirrek el lulekodir, ma rokui el uleltirakl er ngii a ulebriid. 38Misei e ak dmu er kemiu el kmo lak moruul a ngerang el omtok er tirkal chad. Di bechititerir! Ele lsekum a ikel bla letib ma ikel bla leruul a meldibech er a re chad, e ng mo nguemed, 39ngdi lsekum ng mlar a Dios el mei, e ng diak el sebechiu el mo mesisiich er tir. Ko bai mo metik er kemiu el oldechelakl er a Dios!” Ma Olbiil a mlo olab a tekingel a Gamaliel. 40Te milekedongeterir a re apostol el me soiseb me te mechelebed, e dmu er tir me ng diak lluut el mengedecheduch el oba ngklel a Jesus; e sola e milechititerir me te merael. 41Ma re apostol er a le tobed er a blil Olbiil e ng kmal mle dmeu a rengrir, ele te miltik er tir el redemelel a mo chuarm er otuub el kirel a Jesus. 42Me ng mle bek el sils el lolemolem osisecheklir er a Ebangkelio el kirel a Jesus el Mesias, el ullisechakl er a Templo ma obliil.

will be added

X\