RELLIR 4

1A Petrus ma Johanes a dirk milengedecheduch er a re chad, e a re bebil el prist, ma merrederir a re mengkerengel a Templo, ma re bebil el Sadusi a mochang. 2Ng mlo kesib a rengrir ele tirkel terul apostol a ulelsisechakl er a re chad el kmo a Jesus a mla mekiis er a kodall, el belkul a kmo a re mla mad a mo mekiis er a kodall. 3E mocha klebesei me te mildechemeterir e kilebsengeterir el mo bo le kukuk. 4E ngdi betok er tirkel ulerrenges osisecheklir a mlo oumerang; ma ildisir a re chad el mlo oumerang a mirrael el mo bekord 5,000. 5E a bo le kukuk e a re merreder er a re chad er a Judea, ma re mechuodel, ma re sensei er a Llach a mlo kldibel er a Jerusalem. 6Te mlo kldibel tir ma Anas el Ngarbab el Prist, ma Kaifas, ma Johanes, ma Alexander, ma re bebil er a re chad er a blil a Ngarbab el Prist. 7Te dilu er a re apostol me te mo dechor er mederir e toker er tir el kmo, “Ng ngeral klisiich cho molab ma lechub e ng ngklel techang cho muluusbech er ngii e meruul er tial tekoi?” 8Ma Petrus a meltuchel er a Chedaol Reng, e ulenger er tir el kmo, “Kemiu el merreder er a re chad, ma re mechuodel, 9a lsekum kom oukerrekeriil er kemam er chelechang el kirel a ungil el omeruul el mlekedmokl el mor ngikal chitechut el chad ma blekerdelel er a bo lungil, 10e sola e ng kiriu el rokui, kemiu ma re chad er a Israel el rokui el mo medengei el kmo, ngikal chad el dechor er medemiu a mlo ungil el oeak a klisichel a ngklel a Jesus Kristus er a Nasareth el ngii cho mdilelii er a kerus, e a Dios a ulekisii er a kodall. 11A Jesus a ngikel lolekoi er ngii a Chedaol Llechukl el kmo, ‘Sel bad el mlechoit er kemiu a rumekedechor a blai a mocha kot el klou a belkul er a bek el bad.’ 12A chelsel a beluulchad el rokir e ng diak a ngklel a di tal chad el bla le beskid a Dios el sebechel el osebelid. A osobel a di de betik er ngii er a Jesus e merkong.” 13A re chedal Olbiil a mlo mechas a rengrir er a Petrus ma Johanes el diak a dektir e dirrek el mlo mechas a rengrir er a bo lodengei el kmo te di chad el diak a skulir. Isei e te mlo omtab el kmo tulebengkel a Jesus. 14Ngdi mlo diak a ngerang el sebechir el dmung ele ngikel chad el mlo ungil a dilechor el obengkel a Petrus ma Johanes. 15Me te dula er tir me te mo tuobed er a blil Olbiil, e tir a mocha mesaod er ngii el tekoi er a delongelir. 16Te mle kakerker el kmo, “Kede mekera er tirkal terul chad. A re bek el chad er a Jerusalem a medengei el kmo tial klou el ongasireng el tekoi a le rirellii, me ng diak el sebeched el mengeuid er ngii el tekoi. 17Ngdi mei me de terebengii tial tekoi me lak le mengal oberk er a delongelir a re chad, e dongelechel er tirkal chad me lak lluut el melekoi er a ngklel a Jesus el mor a ngii di le chad.” 18Me te milekedongeterir el lmuut el mo tmuu, e silbedeterir el kmo ng kmal diak komluut el mengedecheduch ma lechub e molisechakl el oba ngklel a Jesus. 19Ma Petrus ma Johanes a dilu er tir el kmo, “Ka di le kemiu el merriter er ngii el kmo ngera melemalt er medal a Dios, a kim olengesenges er kemiu ma lechub e kim olengesenges er a Dios? 20Kemam a diak el sebecham el mo lmuk el diak kim ouchais a ikel bla kim ues ma bla kim renges.” 21Itia e a Olbiil a liluut el mo mesisiich el mengelechel er tir e sola e ngilbeteterir. Te mlo medengei el kmo ng diak el sebechir el omals er tir, ele re chad el rokui a uleldanges er a Dios el kirel sel dilubech el tekoi. 22Ngikel chad el mlo ungil el oeak tial ongasireng el tekoi a mle okoa ma derengel a rekil. 23A Petrus ma Johanes a di mlengubet, e lmuut el mor tirkel bebil er tir e subedeterir er a tekingir a re bderrir a re prist ma re mechuodel. 24Me ser a le renges ngiil tekoi, e te mlo dmak e meluluuch el mor a Dios el kmo, “Mastang, el milebii a eanged ma chutem ma daob, ma ikel rokui el ngar a chelsel! 25Ke milengedecheduch el oeak a Chedaol Reng el okiu a uchelam el David el mesiungem, me ng dilu el kmo, ‘Ngera ma re Chisentael a ngosecha rengrir; ngera ma re chad a melebedebek a diak el sebechel el mo tekoi el omtok er a Dios? 26A re king er a beluulchad a mla kudmeklterir, ma re merreder a mlo dmak e omtok er a Rubak ma Mesias er ngii.’ 27Ng meral ua isei! A Herodes ma Pontius Pilatus a mlo dmak er tial beluu tir ma re Chisentael ma re chad er a Israel e omtok er a Jesus el chedaol mesiungem, el ngikel mdillemii el Mesias. 28Te mlo kldibel el mo meruul a ikel di bla mtib el kmo ng mor ngii el okiu a klisichem ma uldesuem. 29Mada Rubak, msisiich a rengmam a re mesiungem me lak kim medakt, e beskemam a re mesiungem a blekeu el mengedecheduch a tekingem. 30Modersii a chimam el omekungil er a re chad, e mkengei er a re mesiungem me leruul ongasireng ma meklou el tekoi el oeak a ngklel a chedaol mesiungem er a Jesus.” 31Ser a bo le merek el meluluuch, e sel ble le kldibel er ngii a mlo melmesim. Te rokui el meltuchel er a Chedaol Reng me ng mlo diak le medakt el omerk a tekingel a Dios. 32A ruumerang a mle ta rengrir el ta uldesuir. Ng dimlak a tal chad el melekoi el kmo “a kloklek a kuk di kloklek,” te bai rokui el dilak el ousbech a ikel mlar ngii el kloklir. 33A re apostol a uleba klou el klisiich el olecholt er okisel a Rubak el Jesus, ma Dios a kmal ulemekngeltengat er tir el rokui. 34Ng dimlak a tar a ruumerang el mlo metacherbesul. Tirkel mlar ngii a chetemir ma lechub e ng blirir, a ulterau e ngmai a cheral el udoud 35el mo mesterir a re apostol; me ngiil udoud a ulebii er a re bek el chad el ungilbesul a ildisel el kirel a ikel lousbech a derta er tir. 36Ma Josef el lulemekedong er ngii a re apostol el Barnabas (el belkul a kmo “Ngikel Melisiich a Rengrir a re Chad”), el mlechell er a Siprus el chad er a kleblillel a Levi, 37a ulterur a chetemel, e ngilai a udoud el mo mesterir a re apostol.

will be added

X\