RELLIR 28

1A kim sebelang el mocha er a beluu, e aki mlo medengei el kmo a ngklel sel iungs a Malta. 2A re chad er sel beluu a kmal mle ungil er kemam. Ng mlar ngii a chull me ng mle mekelekolt, me te chilemlii a ngau e milengemedaol er kemam el rokui. 3E a Paulus a childelii a telechull el sengsongd e ullab el mo melecha er a ngau e a bersoech el mlor ngii a kleald a tilobed el mekabs er a chimal. 4Ma re chad er ngiil beluu er a lesa bersoech el klebikl er a chimal a Paulus e te katekinga el kmo, “Ngikal chad a diak leiit el milekodir a chad, me ng sobela er a daob e ngdi chelid er a llemalt a diak le bechere me di le chad.” 5E a lechub e a Paulus a mildesii ngiil bersoech el mor a ngau e di dimlak le mekesakl. 6Te millatk el kmo ng mo oburk a chimal ma lechub e ng di moubuu el mad; e a lechub e le meketeketal mengiil e lak a ngodech el duubech el mor ngii, e ng mengdecha uldesuir e kmo, “Ngika chelid!” 7A chetemel a Publius el merreder er ngiil iungs a di mle kmeed er isei. Ng kmal mlo ungil er kemam me ng ngilikemam el mo klechedolel el edel klebesei. 8E a demal a Publius a milechiuaiu er a dusall el smecher el mekeald e omachediil a rasech. Ma Paulus a mlo soiseb er a delemerab er ngii me ng meluluuch, e mor a chimal er ngii, me ng mlo ungil. 9Me ser a le dubech tial tekoi, e a rokuil smecher el chad er ngii el beluu a dirrek el mlei me te mlo ungil. 10Te milskemam a betok el ungil klalo e ser a kim omekella el merael, e tulengasech er a diall a ikel kim uluusbech el kirel ngiil omerael. 11Uriul er edel buil e aki mirrael el ngar a diall er a Alexandria el lomekedong er ngii el kmo “Kebtot el Chelid.” Tia mlar ngiil iungs er a belsechel a kerrasem. 12Aki bor a beluu er a Sirakius e aki kiliei er ngii el edel klebesei. 13Aki mlar sei e kuk omekall el mor a beluu er a Rekium; e a bo le kukuk e a eolt a mocha er a dimes, me ng di mle erul klebesei e aki mor a beluu er a Puteoli. 14Aki miltik er a re bebil er a ruumerang er isei el ullengit er kemam me kim kiei el obengterir el tal sandei. Maki mlong e sola e mlochu er a Rom. 15A ruumerang el ngar a Rom er a le renges a chisam e te mle olsiuekl er kemam er a beluu er a Makit er a Apius ma Three Inns. A Paulus er a leseterir e ng mirreng a sulel a Dios e kmal mlo mesisiich a rengul. 16Ser aki bor a Rom e a Paulus a mlo subed er ngii el ileakl el kiei e a tar a soldau a mengkar er ngii. 17A bocha lechib edel klebesei, e a Paulus a ulemekedong er a re mengeteklir a re chad er a Judea el mo kldibel. Me ser a bo le kldibel e ng dilu er tir el kmo, “Rudam er ngak el chad er a Israel, ng dimlak a ngeral ktemellii er a re chedad, ma lechub e ng siukang er kid el de ngilai er a rucheled, e mlekelebus er a Jerusalem e mengeo el mor a re chad er a Rom. 18E a uriul er a kmukerrekeriil, e a re chad er a Rom a mle sorir el ngubetak, ele ng dimlak a ngeral le betik er ngii el krirellii el mo kirel a kodall. 19Ngdi ser a bo lomtok er tial tekoi a re chad er a Judea, e ng mocha kirek el mer a Merreder er a Rom e ngdi diak a ultuteklek el kirir a re chad er a beluak. 20Isei a uchul mak ullengit me bo de kasoues e kungedecheduch er kemiu. A kmal mera er ngii, ngak a ua isei el rrengodel er a bombatel el kirel ngikel loumera er ngii a re chad er a Israel.” 21Me te dilu er ngii el kmo, “Ng dirkak a babier er a Judea el mer kemam el kirem, el ka le mlar ngii a re chedemam el mlar sel mei el ouchais a ngera er kemam ma lechub e le ngar ngii a mekngit el lolekoi el kirem. 22Ngdi somam el mo remenges a uldesuem, ele kemam a medengei el kmo a re chad er a bek el beluu a di oltuub er tial chelechad el mngar ngii.” 23Me tir ma Paulus a tilbir a belsechel a mo orrenges er ngii, me sel sils e te betok er tir a mler sel le kiliei er ngii a Paulus. Me ng mle tutau el mo kebesengei el losaod er tir a tekoi el kirel a Rengedel a Dios, e millasem el rulleterir el mo oumera tekoi el kirel a Jesus el ousbech a tekoi el llechukl er a Llach er a Moses ma ikel lulluches a re profet. 24A re bebil er tir a mlo oumerang a lolekoi, e ngdi re bebil a dimlak bo loumerang. 25Me te tilobed el merael el mla mo kakebosech a uldesuir, er uriul er a ledu er tir a Paulus el kmo, “Ng meral tekoi a ikel lullekoi a Chedaol Reng el oeak a Profet Isaia el mor a rucheled. 26Ele ng dilu el kmo, ‘Bong e mdu er tirkal chad el kmo: Kom mo orrenges, el di orrenges, e diak bo momtab; kom mo omes el di omes, e diak cho mesang, 27ele tirkal chad a cheldeng a uldesuir; te mla tminget a dingerir, e mutek a mederir. Ele lak, e a mederir a mo omes, ma dingerir a mo orrenges, ma uldesuir a mo omtab. A Dios a kmo, te mo obult el mer ngak, mak mo omekungil er tir.’” 28A le merekong el mengedecheduch a Paulus, e ng dilu el kmo, “A le ua isei e ng kiriu el mo medengei el kmo, a klumech er osobel er a Dios a mla mor a re Chisentael. E tir a mo orrenges!” 29[Ma le dela ikang a Paulus, e te tilobed el merael a re chad er a Judea, e mle meringel el kaititekangel er a delongelir.] 30Ng mle erul rak el lileakl el kiei a Paulus er a blai el lulleng er ngii, me tirkel rokui el mlo omes er ngii a le ngilititerir. 31Ng uluuchais er a Rengedel a Dios e olisechakl el kirel a Rubak el Jesus Kristus, el dimlak le medakt ma ka milerrob er ngii.

will be added

X\