RELLIR 27

1Ma le moterekeklang el kmo ng kiram el omekall el mor a Itali, e a Paulus ma re bebil er a re kelebus a lulelterekokl er tir er a Julius el ofiser er a cheldebechel el soldau er a Rom el lomekedong er ngii el kmo “Cheldebechel el soldau er a Kaiser.” 2Aki mlo doiderekl er a tal diall el mlar a Adramitium el mei, e kmedul tuobed el oltebetab a ikel olekerodel er a renged er a Asia, maki ulemekall el merael. E a Aristarkus el chad er a Masedonia el mlar a Thesalonika el mei a ulebengkemam. 3A bo le kukuk e aki mlor a Sidon. A Julius a mle ungil a tekingel er a Paulus me ng kilengei er ngii me ng mo omes er a re sechelil, me bo le bsang a ikel lousbech. 4Aki tilobed er isei el merael e a eolt a mle meses el omtok er kemam maki ulemekall el melailou er bita er a iungs er a Siprus. 5Aki uleak a ngoaol el mor bita er a Silisia ma Pamfilia e mo soiseb er a Mira el ngar a Lisia. 6Aki mlor isei e a ofiser a metik er a tar a diall el mlar a Alexandria e mo omekall el mor a Itali me ng uldidereklemam er ngii. 7Aki ulemekall el merael el mle beketimer omerolel a diall el telal klebesei, e kmal mle meringel ngiil omerolam, e aki merreku er bita er a beluu er a Knidus. Ng dimlak el sebecham el melemolem el omtok er a ses el eolt, maki ulemekall el melailou er a iungs er a Krete el mo engelakl er a bkul a beluu er a Salmone. 8Maki di ullekeed er kemam er a beluu e kmal mle meringel ngiil omerolam, e aki merreku er sel lomekedo er ngii el kmo Mechilou el Olekerodel, el diak le cheroid er a beluu er a Lasea. 9Ng mle meketeket el kim ngar sei me ng mocha kengaol el kim olemolem er ngii el omerael, ele belsechel a Sils er a Tngakireng a mla mo chuib. Ma Paulus a milengedecheduch er tir el kmo, 10“Kemiu el chad, ak umtab e ng mo metacherbesul omeroled a de tobed er tiang. Ng soal el mo metemall a uleklool ma diall, e dirrek el mor ngii a kodall.” 11E ngdi ofiser er a re soldau a di ulekor a tekingel a Paulus ele ng bai uluumera tekingel a kabitei me ngikel oudiall er a diall. 12Sel olekerodel a dimlak lungil el de ngar ngii a le belsechel a kerrasem; ma oumesingd er a re chad a mle sorir a le tobed e lolasem el mor a Fenix a lsekum ng sebechel, me le ngar sei er a belsechel a kerrasem. A Fenix a olekerodel er a Krete el chemau a dimesngebard ma diluchesngebard. 13Ng mlar ngii a telkib el eolt el mlar a dimes el mei, me tirkal chad a ulemdasu el kmo ng sebechir el otireklii a uldesuir, me te mocha nguu a uak e omekall el melasem el di omereked er tir er a bkul a beluu er a Krete. 14E a lechub e ng di mle telkib e ng metengel er a beluu el mei a mesisiich el eolt el lomekedong er ngii el kmo “Diluchesungos.” 15Ngiil eolt er a le sbechii er a diall e ng dikea le sebecham el orekedii a kuteling er a diall me di lechau a eolt, maki milecherei me ng di ulebengkel a eolt. 16Aki mlo telkib el selebechakl er a bo kim engelakl er a dimes er a kekerel iungs el Klauda ngklel. Aki mlar isei e outekangel el kudmeklii a kik er a diall. 17Te kilersii el otekir er a diall e ngila ekil el lochetii a diall. Te mle bekikl a le ngasech er a meched er a Libia me tulimimii a ears e mechere diall me ng omechakl er ngii a eolt. 18Ngiil mesisiich el eolt a di mlar ngii, ma bo le kukuk e a bebil er a uleklool er a diall a bocha longoit er a daob, 19e a kuk bo le ngiaos e te chemoit er a daob a bebil er a klekedellel a diall. 20Ng mle betok el klebesei el diak kim mesa sils el ka kim ues a btuch, e kmal mle meses a eolt. Itiaikid e ng dikea er a uldesuam a kmo aki suobel. 21Ng mle meketeket el di diak lomengur a re chad ma Paulus a mocha dechor er mederir e dmu el kmo, “Kilo kom rirengesak me ng dimlak de tobed er a Krete, e ng diak dosiuekl a ikal rokui el tellemall ma kerior. 22Ngdi becherei e kulengit er kemiu me bo le kie rengmiu; e ng diak a tar kemiu el mo mad, ngdi diall a mo metemall. 23Ele kesus e a anghel er a Dios, el ngak a chedal e ngii a kululuuch er ngii, a mler ngak 24e dmu el kmo, ‘Paulus, lak medakt! Kau a kirem el mor medal a Merreder er a Rom. A Dios a ulekiu sel blekokuii er ngii el ekor kau e ng mla osobel a klengar er tirkel rokui el obengkem el ngar a diall.’ 25Mada bo le klou a rengmiu! Ngak oumera er a Dios, ma ikel meldu er ngak a di mo tmaut. 26E ngdi kid a mo motechakl er a tar a iungs.” 27A klebesei er a mocha me ng erul sandei, e ngiil eolt a di ulebekemam el omechakl er a daob er a Mediteranea. Ng locha mle sueleb er a klebesei e a re chad er a diall omdesua el kmo aki mla mo kmeed er a beluu. 28Me te mocha orebetii a tal kerreel el ngar ngii orremkel me te mlo medengei el kmo a delechel a daob a mle 120 el fit; e di mle telkib e te liluut el meluk er ngii e ng mle 90 el fit. 29Te mle bekikl er a diall a le sbechii er a risois, me turrebet a kleual uak er uriul er a diall e meluluuch me lorechedii el mo mellomes. 30E sola e a re chad er a diall a millasem el chemiis er a diall; tultengelii a kik er a daob e meruul er tir el leko te mo orrebet a uak er a medal a diall. 31Ngdi Paulus a dilu er a ofiser ma re soldau el kmo, “A lsekum a re chad er a diall a kmerd, e ng dikea rolel e msobel.” 32Mitia e a re soldau a dilebes a ikal ekil el ulak er a kik e mecherei me ng omechakl. 33Uchei er a bo le mellomes e a Paulus a kmal ulerrimel er tir el rokui me lomengur. Ng dilu el kmo, “Ng mocha truich ma eual klebesei el mongiil, e di diak momengur. 34Mak kmal olengit er kemiu me mka bebil er a kall; e a lak momengur e ng diak msobel. Ng diak kom mekesakl el mo lmuut er a chui er a bdelmiu me ng diak a mo remiid er ngii.” 35Uriul er a ledu ika Paulus e ng mlar mederir el rokui, e nguu a blauang e mirreng a sulel a Dios e mechedii, e mocha mengang. 36Me te bekengang, me tir el rokui a dirrek el mocha mengang. 37Kemam el mlar a diall el rokui a mle 276. 38A le medngesang a re bek el chad e te milengebekakl er a diall me te chiloit a rokui el uleklool er a daob. 39A bocha le mellomes e a re chad er a diall a dimlak le dengchii a beluu, te di milsa telkib el chelechol me tulemdasu el kmo a bo le sebechir e lokellii a diall el ongesechii er ngii. 40Me te dilort a kul a diall me ng ruabs er a daob, e kodoked a ikal ekil el millechet ongeu; e sola e ngilerd a ears er a kuteling ma diall a mlo sebechel el oldengelengel er a eolt el bedul a beluu. 41Ngdi diall a ngilasech er a meched me ng obingel a kuteling er ngii el mlo diak el sebechel el ouedikel; e a mesisiich el chedesaoch a mlo orekedii a uriul er ngii el mridii. 42Ma re soldau a tilbir a mo omekoad er a re kelebus el rokui me lak longikai el mor a beluu e lechiis. 43Ngdi ofiser er a re soldau a mle soal el osebelii a Paulus me ng milerrob er tir. Ng bai ultebedii a tekingel ma rokui el chad el sebechir el mengikai lomuchel el mo suchesokl er a daob e longikai el mor a beluu; 44e tirkel bebil a mo oeak uriul el mong el ngar a chesbocheb ma lechub e ng ulemetekill er a diall. Tiaikid a mle rolel e aki rokui el mlor a beluu el dimlak kim mekesakl.

will be added

X\