RELLIR 25

1A Festus a mlor sel beluu er omerreder e uriul er edel klebesei e ng tilobed er a Sesarea el mor a Jerusalem 2el le mlar ngii a re bderrir a re prist ma re merreder er a re chad er a Judea e oltutakl er a Paulus. Tullengit er a Festus 3me le rellii a ungil er tir me le nguu a Paulus el mor a Jerusalem, ele te mla rullii a telbilir el mo mekodir er a rael. 4Ma Festus a dilu el kmo, “A Paulus a ngar a kelebus er a Sesarea, e ngak a di mereched el lmuut el mong. 5A re merredeliu bo lobengkek el mor a Sesarea e loltutakl er ngiil chad a lsekum ng ngar ngii a tellemall el le rirellii.” 6A Festus a kiliei el obengterir el locha eai ma lechub e ng truich el klebesei e mirrolu el mor a Sesarea. E tia er a le bong e bo le kukuk, e ng mlo dengchokl er a kingall er a kerrekeriil e dmu me te nguu a Paulus el mong. 7Me tia er a bo letuu a Paulus e tirkal chad er a Judea el mlar a Jerusalem el mei a mlo dechor el iueklii e mle meringel el oltutakl er ngii, e ngdi dimlak a ungil el olechotel a ultuteklir. 8Ma Paulus a mocha mesaod er ngii el kmo, “Ng dirkak a mekngit el krellii el omtok a Llach er a re chad er a Judea, ma lechub e ng mekngit el kirel a Templo, ma lechub e ng ngerang el omtok er a Merreder er a Rom.” 9A Festus a mle soal el olab el mor a re chad er a Judea el mengeluch er tir me ng uleker er a Paulus el kmo, “Ng soam el mor a Jerusalem el mor a kerrekeriil er medak el kirel a ikel ultutakl?” 10Ma Paulus a dilu el kmo, “Ngak a dechor er medal a blil a kerrekerilel a Merreder er a Rom el sel kirel el kngar a kerrekeriil er ngii. Me kau a medengei el kmo ng diak a ngeral mekngit el bla krellii el mor a re chad er a Judea. 11A lsekum ak tilemellii a llach e ngar ngii ak rirellii el kirek el obals er a kodall, e ng diak kulubet er ngak. Ngdi lsekum ng diak a klemerang er a ikel ultuteklir er ngak, e ng diak a chad el sebechel el olterekokl er ngak er tir. Ak ulengit me bo loukerrekeriil er ngak a Merreder er a Rom.” 12Itia e a Festus a mlo kakerker ngii ma re chad er a kelulul, e uriul e ng dula er a Paulus el kmo, “Kolengit er a mor a Merreder er a Rom, me ke mor a Merreder er a Rom.” 13Ng mlo chuib a bebil klebesei e a King Agripa ma Bernis a mlor a Sesarea el mo omes e ouetkeu er a Festus el beches el kabernor. 14Te mlar sei el bebil klebesei e a Festus a mocha mesaod er a blekerdelel a Paulus er a king, me ng dilu el kmo, “Ng ngar ngii a chad el ngar tiang el le bilecherei a Felix er a kelebus; 15e ser a kbor a Jerusalem e a re chad er a Judea, el bderrir a re prist ma re mechuodel a uleltutakl er ngii e ullengit er ngak me kbelsii. 16Ngdi kdilu er tir el kmo kemam a re chad er a Rom a diak kim omals er a chad el mlotutakl er uchei er a bo le kasoues ngii me tirkel oltutakl er ngii e losaod er ngii. 17Me ser a le mei e ak ulerreched ma bo le kukuk e ak mlo dengchokl er a kingall er a kerrekeriil e dmu me te nguu ngiil chad el me otungii. 18Me tirkel oltutakl er ngii a mlo dechor, e ngdi dimlak a tar a ikel mekngit el kulemdasu el kmo te mo otuteklii er ngii el le mlotutakl er ngii. 19A mle ultuteklir a bebil el klaititekangel er a delongelir el di kirel a klechelid er tir ma kirel a tal chad el Jesus a ngklel, el mlad, e a Paulus a kmo ng mla mekiis er a kodall. 20Ng mlo diak kudengei el kmo ak mekerang e ngmai omesodel a ikang mak uleker er a Paulus el kmo ng soal el mor a Jerusalem el bo loukerrekeriil er ngii er isei el kirel a ikel ultutakl. 21Ngdi Paulus a ullengit me di le kekerongel e a Merreder er a Rom bo losaod er tial tekoi el kirel. Misei e ak ultebedii a tekingek me di longkar er ngii el mor sel bo le mengai el mor a Merreder er a Rom.” 22Ma Agripa a dilu er a Festus el kmo, “Ng soak el mo rongesii ngikal chad.” Ma Festus a dilu el kmo, “A klukuk e ke mo rongesii.” 23A bo le kukuk e a Agripa ma Bernis a kmal milengebkall er tir er a bo le siseb er a blil a kldibel el obengterir a re ngarbab el soldau ma re mengeteklel a beluu. Ma Festus a ultebedii a tekoi me te nguu a Paulus el mong. 24Ma Festus a dilu el kmo, “King Agripa me kemiu el rokui el ngar tiang el obengkemam, kom omes er ngikal chad el rokui. A re chad er a Judea el ngar tiang ma re ngar a Jerusalem a uleltutakl er ngii er ngak. Tuleldiu el kmo ng mla mo kirel el okodall. 25Ngdi dimlak a ngerang el kbetik er ngii el mo uchul e ng mo okodall. Chelechang el di ble le ngii el olengit el mor a Merreder er a Rom, e ak mla rullii er a uldesuek me bo le mengai el mong. 26Ngdi diak a ngeral bleketakl el chisel el bo kuluches el mor a Merreder er a Rom. Me chelechang e ak ngoural mer medemiu, e a ngar uchei e ng mer medam, kau el King Agripa me bo le sebechel el ngar ngii a ngeral bo kluches er uriul er a dorriter er ngii el ultutakl el kirel. 27Ak melatk el kmo ng kor a diak a belkul a le bo chad el kelebus el di diak a ungil el omesodel a ultutakl el kirel.”

will be added

X\