RELLIR 24

1Uriul er eim el klebesei e a Ananias el Ngarbab el Prist a mlor a Sesarea ngii ma re bebil er a re mechuodel ma tal chad er a llach el Tertulus a ngklel. Te mlor medal a Kabernor Felix e oltutakl er a Paulus. 2Itia e a Paulus a lulekedongii el mo soiseb e a Tertulus a mocha oltutakl er ngii el kmo, “Kau el chetengakl el Felix! A ungil el omerrederem a uchul me ng mocha meketeket el kim ngar a budech, e dirrek el betok el meklou a belkul el tekoi a mlukbeches el kirel a klungiolel a belumam. 3Ng ungil a rengmam el kirel a ikel tekoi, maki di blechoel el ngar a rekebelumam e kmal mereng a sulem. 4Ngdi diak el soak el kemanget el mengesang er kau, mak ulengit me bo mchebkemam e mrengesii tial kedeb el cheldechedemam. 5Aki mla metik er ngikal chad el kengaol e ongesang; ng omekdubech a uldikel er a delongelir a re chad er a Judea er a beluulchad el rokir, e ngii a mengeteklel sel cheldebechel er a re Nasarin. 6Ng dirrek el millasem el omekidokel er a Templo maki mildechemii, [e mle somam el oukerrekeriil er ngii el oltirakl a llechemam, 7e ngdi Lisias el merreder er a re soldau a mlei el oumerikl el nguu er kemam. 8E sola e a Lisias a ultebedii a tekingel ma rultutakl er ngii lekor kau.] Cho moker er ngii e ng sebechem el di kau el mo medengei el okiu a ikel rokui el tekoi el kim oltutakl er ngii el kirel.” 9A rokuil chad er a Judea a mlo dmak el oltutakl e melekoi el kmo ng rokui el di merang. 10Ma kabernor a uleba chimal el olechau er a Paulus me longedecheduch, me ng dilu el kmo, “Ak medengei el kmo ng mla mo betok el rak el mchad er a kerrekeriil er tial beluu, misei e ng ungil a renguk el mesaod er ngak er medam. 11Bo modengei el kmo ng mocha truich ma erul klebesei er a kbor a Jerusalem el mo meluluuch. 12A re chad er a Judea a dimlak le betik er ngak el mengaititekangel er a di tal chad er a Templo el ka le biltik er ngak el meruul a uldikel er a delongelir a re chad er a chelsel a blil ongdibel ma lechub e ng chelsel a beluu. 13Ng dirrek el diak el sebechir el ochotii a klemerang er a ultuteklir er ngak. 14Ngdi tiakid a meral tekoi mak uchotii er kau el kmo, ngak a mengull er a Dios er a rucheled mak ultirakl er sel Rael el tir a kmo ng klsuul. Ngdi ngak a dirrek el oumerang a ikel bek el llechukl er a Llach er a Moses ma babier er a re profet. 15Ak di ua itir el oumerang er a Dios el kmo a rokuil chad, el ungil ma re mekngit, a mo mekiis er a kodall. 16Isei a uchul mak di blechoel el meruul er ngak me lak louedikel a renguk er medal a Dios ma mederir a re chad. 17“Ng mle telal rak el kcheroid er a Jerusalem mak mlor a Jerusalem el olab a bebil el udoud el kirir a re chedak e mo oldars a tengetengek. 18Seikid er a kngar a Templo e te miltik er ngak er a bla bo le merek a rolel omengikiid. Ng dimlak a seked el obengkek ma dimlak a uldikel. 19Ngdi mlar ngii a re bebil chad er a Judea el mlar a renged er a Asia el mei, me ng tir a kirir el mer medam e ocholt a telemellek a lsekum ng ngar ngii a ultuteklir el kirek. 20Ma lechub e tirkal chad el ngar tiang bo louchais el kmo ng ngeral tellemall a krirellii er ser a kdechor er medal Olbiil. 21Ng kor a di tal sel tekoi el kdillii er a bo kdechor er mederir e kdu el kmo, ‘Ngak a mukerrekerila er kemiu er chelechang ele ngak el oumerang el kmo a re mla mad a mo mekiis er a kodall.’” 22Itia e a Felix el ungil medengei a chisel ngiil Rael, a tirrebengii a cheldecheduch e dilu er tir el kmo, “Sel le mei a Lisias el merreder er a re soldau, e ak mochu oukerrekeriil er tial tekoi.” 23Ng dilu er a ofiser el oungerachel er a Paulus me le kekerengii, e ngdi mo msa telkib el ilmokl e kongei er a re sechelil me te msa ikel lousbech. 24Uriul er a bo lechib a telal klebesei e a Felix ma bechil er a Drusila el redil er a Judea a mlei. Ng uleldurech el mo nguu a Paulus e ulerrenges er ngii er a longedecheduch a ikel loumerang el tekoi el kirel a Kristus Jesus. 25Ngdi Paulus er a bocha losaod er a llemalt, ma ulserechaklreng, ma Sils er a Kerrekeriil, e a Felix a mlo medakt me ng dilu el kmo, “Mereko e morael. Ak lmuut el mo omekedong er kau a le bor ngii a techall.” 26Ng dirrek el millatk el kmo a Paulus bo le bsa bebil er a udoud; e a bo le ua isei e ng mo uchul e ng mo mekudem el omekedong er ngii el mo mengedecheduch er ngii. 27Uriul er erul rak, e a Porsius Festus a kuk mlo kabernor el omtechei er a Felix. E a Felix a mle soal el meruul er a re chad er a Judea el mo ungil a rengrir er ngii me ng milechere Paulus me ng di mlar a kelebus.

will be added

X\