RELLIR 23

1Ma Paulus a ullengeng er a re chad er Olbiil e dmu el kmo, “Kemiu el de dul chad er a Israel! Ng me lmuut er chelechal sils e ng diak a ngera er a klengar er ngak el ouedikel a renguk el kirel er medal a Dios.” 2Ma Ananias el Ngarbab el Prist a dilu er tirkal dechor er bita er a Paulus me te cholebedii a ngerel. 3Ma Paulus a dilu er ngii el kmo, “A Dios a ulterekokl el mo cholebedau, kau el melekedek a kngtim! Ke dengchokl er tilechang el oukerrekeriil er ngak el olab a Llach, e bai melemall a Llach a cho mdu er tir me longelebed er ngak!” 4Me tirkal chad el dilechor er bita er a Paulus a dilu er ngii el kmo, “Kau a oltuub er a Ngarbab el Prist er a Dios!” 5Ma Paulus a dilu el kmo, “Kemiu el odam er ngak el chad er a Israel, ng dimlak kudengei el kmo ng Ngarbab el Prist. A Chedaol Llechukl a melekoi el kmo, ‘Ng diak le kiriu el melekoi a mekngit el mor a re merreder er kemiu.’” 6Ser a lomes a Paulus el kmo a re bebil er a re chad er ngii el seked a mle Sadusi ma re bebil a mle Farisi, e ng uleldiu el mor tir el chad er Olbiil el kmo, “Kemiu el chad er a Israel! Ngak a Farisi, e ngelekir a re Farisi. Ngak tiang el mukerrekerilang ele uchul e ngak el oumera el kmo a re mla mad a mo mekiis er a kodall!” 7Me tia er a ledu el ua isei, e a re Farisi ma re Sadusi a mocha kautoketok me tulebii. 8(Ele re Sadusi a melekoi el kmo a re chad a diak bo le bekiis er a kodall e diak a re anghel el diak a deleb; e ngdi re Farisi a kuk uluumera ngiil kldei el tekoi.) 9A diu a kmal mio klou, ma re bebil er a re sensei er a Llach el mle chedal a cheldebechel er a re Farisi a mlo dechor e mle mesisiich el omtok a cheldechederir el kmo, “Ng diak el sebecham el metik er a di tal telemellel ngikal chad! A lta e ng meral mlar ngii a deleb ma lechub e ng anghel el milengedecheduch er ngii!” 10Ng kmal mlo meringel a klaititekangel me ngikal merreder er a re soldau a mlo medakt a le mesodel a Paulus, me ng uldercheterir a re soldau el mo tmuu er a chelsel ngiil seked, e nguu a Paulus el choridii er tir el mor a blirir a re soldau. 11Isel kesus e a Rubak a mlo dechor er bita er a Paulus e dmu el kmo, “Lak medakt! Ke mla olecholt er ngak er tial Jerusalem, e dirrek el kirem el mo olecholt er ngak er a Rom.” 12A bo le kukuk e a re bebil el chad er a Judea a mlo dmak e melib er a tar a tekoi. Te rirellii a tar a mesisiich el telbiil er medal a Dios el kmo ng diak bo longang ma lechub e lolim el dimerkmo lokodir a Paulus. 13Te mle betok er a 40 el chad a dilak el melib er tial tekoi. 14Itia e te mlor a re bderrir a re prist ma re mechuodel e dmu el kmo, “Aki mla mo dmak e rullii a tar a mesisiich el telbiil el kmo a lak kimokodir a Paulus, e ng diak a tal kall el mor a ngeram. 15Misei, e kemiu ma re chad er a Olbiil moldurech el mor a merrederel a klsoldau er a Rom me le nguu a Paulus el mer kemiu el leko ng somiu el mo ungil medengei a chisel, e kemam a mo kldmokl el mekodir er uchei er a le mer tiang.” 16E ngdi mlar ngii a ngelekel ochedal a Paulus el rirengesii tial tekoi, me ng mlor a blirir a re soldau me ng subedii a Paulus. 17Mitia e a Paulus a milekedongii a tar a re ofiser e dmu er ngii el kmo, “Mnguu ngikal kekerel chad el mor a merreder er a re soldau, e ng ngar ngii a tekoi el bo lolekoi er ngii.” 18Me ngiil ofiser a ngiluu el mor a merreder er a re soldau e dmu el kmo, “A Paulus, el ngikel chad el kelebus, a milekedongak e ullengit er ngak me knguu ngikal kekerel chad el mei, ele ng ngar ngii a tekoi el lolekoi er kau “ 19Me ngiil merreder a chilteklii a chimal e te merael el mor a diak a chad er ngii e ng oker er ngii el kmo, “Ng ngera ke melekoi er ngak?” 20Me ng dilu el kmo, “A re merreder er a re chad er a Judea a mla kongei el mo olengit er kau er a klukuk me mnguu a Paulus el mor a Olbiil, el leko ng sorir el mo ungil medengei a chisel. 21Ngdi lak morrenges er tir, ele te ngar ngii a re kuk betok er 40 el chad el berrotel e mengiil er ngii. Te mla rullii a tar a mesisiich el telbiil er medal a Dios el kmo ng diak bo longang el ka lolim el dimerkmo lokodir. Te mla mo kldmokl el meruul er tial tekoi me te di mengiil ku er kau.” 22Me ngiil merreder a dilu el kmo, “Kele mouchais er a ngii di le chad el kmo ke mla subedak er tial tekoi,” e dilu er ngii me ng merael. 23E sola e ngiil merreder a milekedongeterir a re terul ofiser e dmu er tir el kmo, “Mkedmeklterir a re 200 el soldau me le bor a Sesarea. Te mo kldmokl el merael er etiu el klok er chelechal kebesengei el obengterir a re 70 el chad er a uos, ma re 200 el chad er a burech. 24Kom kudmokl a bebil er a uos el bo le ngar ngii a Paulus e mnguu el mor a Kabernor Felix el diak le mekesakl.” 25Me ngiil merreder a lilechesii a babier el kmo, 26“A Klaudius Lisias a ouetkeu er a chetengakl el Kabernor Felix. 27A re chad er a Judea a mildechemii ngikal chad e leko tomekoad er ngii. Ak mlo medengei el kmo ng chad er a Rom mak mlong ngak ma re soldau er ngak maki ulsebelii. 28Ng mle soak el mo medengei el kmo ng ngera ultuteklir er ngii mak ngiluu el mor a Olbiil er tir. 29Ak mlo medengei el kmo ng dimlak a ngerang el le rellii el mo uchul e lokodir ma lechub e longelebus er ngii. A ultutakl el mor ngii a di kirel a bebil er a ker er a llecherir. 30E ser a le sbedak el kmo te melib a kodellel, e ak di mle mereched el mdesuii a nguu el ekor kau. Ak mla dmu er a rultutakl er ngii me teko er medam e ocholt a telemellel.” 31A re soldau a riruul a ikel meldung er tir. Isel kesus e te ngiluu a Paulus e merael me te di mlor a Antipatris. 32E a bo le kukuk e a re di mirrael el soldau a liluut el mo remei e milechititerir a re chad er a uos me te melemolem er omerael el obengkel a Paulus. 33Te ngiluu el mor a Sesarea, e milsa babier a kabernor, e oterekeklii a Paulus er ngii. 34Ma kabernor a chiliuii ngiil babier e uleker er a Paulus el kmo ke chad er ker el beluu? E ser a bo lodengei el kmo ng chad er a Silisia 35e ng dilu el kmo, “Ak mo oukerrekeriil er kau sel le mei tirkel oltutakl er kau.” E sola e dilu ma Paulus bo longkar er ngii er a blil a kabernor.

will be added

X\