RELLIR 22

1“Rudam ma re chedam, morrenges er ngak a kusaod er ngak er medemiu!” 2Tia er a le rengesii el melekoi er tir el ousbech a Hebru, e te mengal mlo chelellakl; ma Paulus a millemolem er a cheldechedechal el kmo, 3“Ngak a chad er a Judea, el mlechell er a Tarsus er a Silisia, e ngdi kmlukeroul er tial Jerusalem e a Gamaliel a mle sensei er ngak. Mak ngila meringel el osisechakl er a Llach el mlar a rucheled el mei e mle blak a renguk er a Dios el ua ikemiu el rokui el ngar tia er chelechang. 4Ak uleldechelakl e osiik a kodellir tirkel chad el uleltirakl er tial Rael. Ma re sechal ma redil el kbildechemeterir ak ngilititerir el mor a kelebus. 5E a Ngarbab el Prist ma Olbiil el rokir a medengei el kmo a ikel kulekoi a merang. Ak ngilai a babier er tir el liluches el mor tirkel chad er a Judea el ngar a Damaskus, mak mlong el mo omdechem er tirkaikid el chad e ngoititerir el rrengodel er a bombatel el mer a Jerusalem me bo lobals. 6“Me ser a kngar omerael el mocha kmeed er a Damaskus er a bekord sueleb, e a tal medidiich el llomes el mlar a eanged el mei a diliich el meliuekl er ngak. 7Mak mloubuu er a chutem e rirengesii a ngor el melekoi er ngak el kmo, ‘Saulus, Saulus, ngera me koldechelakl er ngak?’ 8Mak uleker el kmo, ‘E kau ke techang, e Rubang?’ Me ng dilu er ngak el kmo, ‘Ngak a Jesus er a Nasareth, el ngikel moldechelakl er ngii.’ 9Tirkel chad el kim dilak a milsa ngiil llomes, ngdi dimlak el rengesii a ngerel ngikel milengedecheduch er ngak. 10Ak uleker el kmo, Ak mekera e Rubang?’ ma Rubak a dilu er ngak el kmo, ‘Bekiis e morael el mor a Damaskus e te mo subedau er sei er a ikel bek el tekoi el bla letutk a Dios el kirem el mo meruul.’ 11Ngak a mlo meiko el sel medidiich el llomes a uchul, me tirkel kim dilak a urrekedii a chimak e ulemekrael er ngak el mor a Damaskus. 12“E ngar ngii a chad er isel beluu el Ananias a ngklel, el blak a rengul er a tekoi el chelid e oltirakl a Llechud, e dirrek el kuoll er tirkel rokui el chad er a Judea el kiei er isei. 13Ng mlei el mo dechor er bita er ngak e kmo, ‘Odam el Saulus, mluut el mo omes!’ Ng di mle seikid e ak lmuut el mo omes mak mle ngellomel er ngii 14e ng dmu er ngak el kmo, A Dios er a rucheled a mla ngiltau el mo medengelii sel soal, e mesa melemalt el Mesiungel, e rongesii a ngerel el mengedecheduch. 15Ele kau a mo ochotel me ke mo ouchais er a re bek el chad a ikel cho bla mues ma cho bla mrenges. 16Mada ng ngera ke dirk mengiil er ngii? Bekiis e bo metecholb ma cho moluluuch er ngii e le mekikiid a kngtim.’ 17“Ak liluut el mor a Jerusalem e ser a kululuuch er a Templo e ak milsa Rubak el kor a berrusek, 18me ng dilu er ngak el kmo, ‘Mereched el tuobed er a Jerusalem, ele re chad er tiang a diak bo loumera tekoi el molekoi el kirek.’ 19Mak dilu el kmo, ‘Rubak, te kmal ungil medengei el kmo ak mlor a ikel blil ongdibel el omdechem e mengelebed er tirkel oumerang er kau. 20Me ser a lomekoad er a Stefanus el tar tirkel olecholt er kau e ak dirrek el mlar isei, el kilengei er okodellel mak milengkar a bilir tirkel ulemekoad er ngii.’ 21Ma Rubak a dilu er ngak el kmo, ‘Morael, ele kmo oldurech er kau el mor cheroid el mor a re Chisentael.’” 22A re chad a ulerrenges er a Paulus el mor ser a le delii tiang, e sola e kmal mlo klou a ngerir el oldiu el kmo, “Mokodir! Ngika kirel el okodall!” 23Tuleldiu e omiroi a bilir, e omidokl a chebechab el mor bab. 24Me ngikal merreder er a re soldau er a Rom a dilu er a re chedal me le nguu a Paulus el mo soiseb er a blirir a re soldau e le chelebedii e le kititii a uchul ma re chad er a Judea a mle ua isei el oldiu er ngii. 25Me tia er a le rengedii el mo kirel chelebodel, e a Paulus a millekoi er a ofiser el dilechor er sei el kmo, “Ng ungil er a llach el mongelebed er a chad er a Rom el dirkak le mukerrekeriil el mo bleketakl a telemellel?” 26Ma le renges a ika ngiil ofiser e ng mlor a merreder e dmu el kmo, “Kau ke mekerang? Ngikel chad a chad er a Rom!” 27Me ngikel merreder a mocha er a Paulus e dmu er ngii el kmo, “Ka msbedak el kmo kau ke chad er a Rom?” Ma Paulus a dilu el kmo, “Choi.” 28Me ngiil merreder a dilu el kmo, “Ak chiloit a betok el udoud e mlochu chad er a Rom.” Ma Paulus a dilu el kmo, “Ngdi ngak a mlechell el chad er a Rom.” 29Me tirkel chad el leko te mo oukerrekeriil er a Paulus a di ngilseklterir er ngii, me ngikal merreder me ng mlo medakt er a bo lodengei el kmo a Paulus a chad er a Rom e ngii a mla rongedii er a bombatel. 30Ngikal merreder a mle soal kmal mo medengei el kmo ng ngera sel ultuteklir a re chad er a Judea el kirel a Paulus; ma bo le kukuk e ng ngilubet a rengedel a Paulus el bombatel e ultebedii a tekingel me bo le kldibel a re bderrir a re prist ma re chad er Olbiil el rokui. E sola e ngii a ngiluu a Paulus el mo mekedecherur er mederir.

will be added

X\