RELLIR 21

1Maki millemesumech er tir e merael; ma kim omekall el di melemalt e aki mlor a Kos, e a bo le kukuk e aki mlor a Rodes, e mlar sei el mor a Patara. 2Aki miltik er a tar a diall el mor a Fenisia maki ngilasech er ngii e merael. 3Aki mirrael el mol mocha sebecham el mesa Siprus, e sola e ulemekall er a mo bedul a dimes er ngii el mor a Siria. A diall a mlo olekerd a klalo er a Tyre maki kilerd el mor a beluu. 4Aki miltik er a re bebil er a ruumerang er sei maki kiliei el obengterir el tal sandei. Ng uleak a klisichel a Chedaol Reng e tolekebai er a Paulus me lak le bor a Jerusalem. 5Ngdi ser a bocha le kiram el merael, e aki di mirrael. Me tir el rokui, tir ma re becherir ma re ngelekir a rokui el ulebengkemam el tuobed er a beluu el mor a kederang, maki rokui el mlo outubuach e meluluuch. 6E sola e aki mle kasmesumech e kemam a mo doiderekl er a diall me tir a lmuut el mo kairirei. 7Aki millemolem er omerolam maki mlar a Tyre e omekall el mor a Ptolemais maki mlo kasoues kemam ma ruumerang e kiei el obengterir el tal sils. 8E a bo le kukuk e aki tilobed el mor a Sesarea. Aki mlo kiei el obengkel a Filip el ngikel omerk er a Ebangkelio, el tar tirkel teuid el mlengilt er a Jerusalem el mo olengeseu er a ureor. 9Ng mlar ngii a re teual mesobil el ngelekel el redil el ulemerk a tekingel a Dios. 10Maki mlar sei el telal klebesei e a tal profet el Akabus a ngklel a mlei el mlar a Judea. 11Me ng mler kemam el nguu a olekesengelel a Paulus e di mle ngii el remenged a chimal ma ochil e dmu el kmo, “A Chedaol Reng a melekoi el kmo: Ngikel ouelekesongel er tiang a mo ua isei el mo merenged er a re chad er a Judea el ngar a Jerusalem, e sola e tir a nguu el mo mesterir a re Chisentael.” 12Me ser a kim renges ngiil tekoi, e kemam me tirkel bebil er a re chad a kmal ullengit er a Paulus me lak le bor a Jerusalem. 13Ngdi ngii a dilu el kmo, “Ngera me kom ua isei el lmangel el mengam er a renguk? Ngak a diak di kkldmokl el mo merenged er a Jerusalem e le merekong, ak dirrek el kldmokl el mo mad er sei el kirel a Rubak el Jesus.” 14Ng mlo diak el sebecham el simngii a uldesuel maki di dilu ku el kmo, “Sel soal a Rubak bo letaut.” 15Maki mlar sei el telkib e mocha kudmokl a kloklam e merael el mor a Jerusalem. 16A re bebil er a rubengkel a Jesus el ngar a Sesarea a dirrek el ulebengkemam el merael me te ngilikemam el mor a blil a Mnason, el chad er a Siprus, el leko kim mo kiei el obengkel. Ngika tar a re di mla mo oumerang. 17A ruumerang a kmal uluutkeu er kemam er ser a ki bor a Jerusalem. 18A bo le kukuk e a Paulus a ulebengkemam el mo omes er a Jakobus; a rokui el mengeteklel a Ikelesia a mlei. 19Ma Paulus a uluutkeu er tir e uluuchais er tir a ikel bek el le riruul a Dios er a delongelir a re Chisentael el oeak a urerel. 20Me ser a lorrenges er ngii e te rokui el uleldanges er a Dios. E sola e dilu el kmo, “Odam el Paulus, kau a medengei el kmo te betok el telael el chad er a Judea a mla mo oumerang, e tir el rokui a kmal blak a rengrir er a Llach. 21Torrenges chais el kmo kau a leko kolisechakl er a rokui el chad er a Judea el kie belurir a re Chisentael el mo mengoit a Llach er a Moses, e leko kolekebai er tir me ng diak lomotk er a re ngelekir e dirrek el diak loltirakl a siukang er a re chad er a Judea. 22Tulterekokl el mo medengei el kmo ke mla mei. A le ua isei e kede mekerang? 23Tiakid a somam cho bo mrellii. Te ngar ngii a re teual chad el ngar tiang el mla rullii a tar a telbiil er medal a Dios, 24me bo mobengterir el mo oltirakl a rolel omengikiid e mlecha ikel udoud el mo kirir el melechang me bo le sebechel el mekemuu a bderrir. A le ua isei e a re bek el chad a mo medengei el kmo ng diak le merang a ikel le rirenges el kirem, ele kau a bai oltirakl a Llach er a Moses. 25E a kuk kirir a re Chisentael el mla mo oumerang, e aki mla oduruklii a babier el mo mesubed er tir er a kim tilbir el kmo, ng diak le kirir el menga kall el mlodars er a bleob el chelid, ma lechub e longa rasech, ma lechub a charm el ulebeng a telil, e kirir el mengikiid er tir er a deleboes.” 26Ma bo le kukuk e a Paulus a ngilititerir tir el chad e ulebengterir el oltaut a rolel omengikiid. E sola e mlo soiseb er a Templo el mo mesubed el kmo ng medechel a telal klebesei e ng mo merek omengikiid e mor ngii a tenget el kirel a derta er tir. 27E tial bochu le merek a ikel euid el sils, e a re bebil chad er a Judea el mlar a beluu er a Asia a milsa Paulus el ngar a Templo. Tuldkelii a seked el rokir e urrekedii a Paulus 28e oldiu el kmo, “Kemiu el chad er a Israel, me molengeseu! Ngkakid ngikel chad el omais a bek el beluu el olisechakl er a re bek el chad el mo omtok er a re chad er a Israel, ma Llach er a Moses, me tial Templo. E ngkakid er chelechang el mla ngoititerir a re bebil er a re Chisentael el mor a Templo el mla mekidekelii tial chedaol Templo!” 29(Te millekoi el ua isei ele te milsa Trofimus el chad er a Efesus el obengkel a Paulus er a chelsel a beluu me tulemdasu el kmo a Paulus a ngiluu el mor a Templo.) 30A beluu el rokir a mlo ngemuu ma re chad el rokui a dilak el remurt el mo orekedii a Paulus e kurekersii el otebedii er a Templo. Tiaikid e a tuangel er a Templo a di mlechesimer. 31Ngiil seked a millasem el omekoad er a Paulus ma tekoi a mlor a merreder er a re soldau er a Rom el kmo a Jerusalem el rokir a ngar ngii a uldikel er ngii. 32Me ng dimlak bo le meketeket e ngiil merreder a ngilititerir a re bebil el ofiser ma re soldau e ulerreched el mer ngiil seked. Ma re chad er a lesang el obengterir a re soldau e ng mlo diak longelebed er a Paulus. 33Me ngiil merreder a mlo kmeed er a Paulus e orekedii e dmu me te rongedii er erul bombatel. E sola e ng okerel kmo, “Ngika ng techal chad, e ngera ng tilemellii?” 34Ma seked a di mlo kaiueiong. A re bebil a melekoi er a tar a tekoi ma re kuk bebil a melekoi er a tang. Ng dimlak bo le bleketakl me ngiil merreder a mlo diak el sebechel el mo medengei el kmo ng ngera meral dilubech, mitia e ng dula er a re chedal me te nguu a Paulus el mor a blirir a re soldau. 35Me te ngiluu el di mlor a ikel terebel e a re soldau a mocha mengol er ngii ele seked a kmal ouedikel. 36Te rokui el uleltirakl er ngii e oldiu el kmo, “Mei me dokodir!” 37Ma re soldau er a leko toba ku Paulus el mor a blirir, e ngii a dmu er a merreder el kmo, “Ng di ungil a kdelii er kau a tar a tekoi?” Ma merreder a uleker er ngii el kmo, “Ke melekoi a Grik? 38Kau ng diak mngikel chad er a Ekipten el milechelii a uldikel er a mla memong e choteklterir a re 4,000 el chad el mor a ked el tirkel bekeu el omekoad er a re chad?” 39Me ng ulenger a Paulus el kmo, “Ngak a chad er a Judea el mlechell er a Tarsus er a Silisia, el chad er a klou a belkul beluu. Mkengei er ngak me kungedecheduch er a re chad.” 40Me ngiil merreder a kilengei er a Paulus me ng mlo dechor er a terebel e uldersii a chimal el olekebai er a re chad me bo lak longerodech. Ma bocha lak longerodech e a Paulus a mocha mengedecheduch er tir el ousbech a Hebru el kmo:

will be added

X\