RELLIR 20

1Ma bocha le chelellakl ngiil uldikel, e a Paulus a ulemekedong er a ruumerang el mo kldibel e millisiich a rengrir e te kasmesumech e ng merael el mor a Masedonia. 2Ng mirrael a ikel beluu e ullab a betok el osisechakl el melisiich a rengrir a re chad. E sola e mlor a Akaia 3e kiliei er isei el edel buil. E a le kedmeklii el leko ng merolung el mor a Siria e ng mo medengei el kmo a re chad er a Judea a ulsiik a temellel, me ng okor e merael el lmuut el okiu a Masedonia. 4A Sopater el ngelekel a Pirhus er a Berea, ma Aristarkus ma Sekundus er a Thesalonika, ma Gaius er a Derbe, ma Tikikus ma Trofimus er a renged er a Asia, ma Timothy a ulebengkel a Paulus el merael. 5Tuleak uchei er kemam el mor a Troas e mengiil er kemam. 6Ma bocha le merek a Chedaol Sils er a Diak Omkukel Blauang e aki mlar a Filipi e omekall el eim el klebesei el mor a Troas, me kemam rne tir a dilak el ngar sei el tal sandei. 7Ma kot el sils er a tal sandei, e aki mlo kldibel e dmak el menga blauang. Ma Paulus a milengedecheduch er a re chad e di milengedecheduch el mo sueleb er a klebesei ele ng mo merael er a bo le kukuk. 8Ng betok el olbidel a kilard er sel ngar bab el delemerab el ble kim kldibel er ngii. 9A tal kekerel chad el Eutikus a ngklel a dilengchokl er a mado e tial di longedecheduch a Paulus e ng mlo mesulaul el mol mol imiit a medal me ng ruebet er ongedel chellibel el mor a chutem. Me tia er a bo le nguu e ng mla mad. 10Ngdi Paulus a mlo metengel el mo blengkangk er bebul e mechulii e dilu el kmo, “Lak el sebek a rengmiu e ng dirkak le mad!” 11E sola e liluut el mo ngmasech er bab me ng omached a blauang el mengang. A Paulus a mle kemanget el mengedecheduch me ng di milengedecheduch el ongesechii a sils e merael. 12Me ngikal kekerel chad a le ngiluu el mor a blil el di chad me ng kmal mle ungil a rengrir. 13Aki di mla merael el mor a diall e omekall el mor a Asos el mo oltak er a Paulus. Ng uleak a beluu el mong me ng dilu er kemam maki mo otekir er sei. 14Ng ulsiueklemam er a Asos maki ultekir e merael el mor a Mitilene. 15E kuk mlar sei e omekall el mor a Kios er a bo le kukuk. E a kuk bo le kukuk, e aki mlor a Samos, e mor a Miletus er a bo le kukuk. 16A Paulus a mle soal di imiu er a Efesus, el diak longoit a taem er a renged er a Asia ele ng ulerreched me bo le sebechel el mor a Jerusalem er a Pentekost. 17Ser a le ngar a Miletus, e a Paulus a ulderchii a chad el mor a Efesus el olengit er a re mechuodel er a Ikelesia me bo losiueklii. 18Me ser a le bong e ng dilu er tir el kmo, “Kom medengelkak er ser a kkot el mer a renged er a Asia e kubengkemiu. 19Ak uleba ngariourreng ma langel el meruul er a urerek el mesiungel a Rubak er a chelsel a ikel meringel taem er a le mer ngak, el ulekbat er a re chad er a Judea uchul. 20Kom dirrek el medengei el kmo ng diak a ngerang er a ikel mo ngesou el kiriu el kulemart er ngii er ser a kulisechakl er kemiu er a chelsel a seked ma rekeblimiu. 21Ng mle blak a renguk el mengelechel er a re chad er a Judea ma re Chisentael el kmo ng kirir el obult er a kngterir el mor a Dios e mo oumerang er a Rubak el Jesus. 22Chelecha e ak ulengesenges er a Chedaol Reng mak mor a Jerusalem, el diak kudengei el kmo ak bong e ng ngera mo duubech el mer ngak. 23Ak di medengei el kmo a Chedaol Reng a silebedak er a bek el beluu el kmo a kelebus ma ringel a mengiil er ngak. 24Ngdi klengar er ngak a diak a belkul a kungreos er ngii; ng bai di soak el rokir a omerolek e churrengelii a ureor el le bilskak a Rubak el Jesus, el ngii a berekel a Ebangkelio el kirel a krasia er a Dios. 25“Ak mla merael er a delongeliu el rokui el olisechakl er a Rengedel a Dios. Ak medengei er chelechang el kmo ng diak a tar kemiu el lmuut el mo mesekak. 26Me chelechal sils e ak kmal subedemiu el kmo a le ngar ngii er kemiu a mo remiid, e ng diak el telemellek. 27A telbilel a rengul a Dios el rokir a bla kuchotii er kemiu el dimlak ak becherei. 28Isei e mongkar er kemiu ma delebechel el rokir el bla loterekeklii er kemiu a Chedaol Reng. Bo mklekar er a Ikelesia er a Dios, el le rirellii el mo kloklel el okiu a kodellel a Ngelekel. 29Ak medengei el kmo sel kurael, e a tebelik el charm a mo soiseb er a delongeliu el mo melemall er a delebechel. 30A tar a klebesei e a re bebil er a re chad el cho mtal cheldebechel a mo omulak e mengetikaik er a ruumerang el mo oltirakl er tir. 31Isei e mongkar, e lak mobes el kmo ng mle betok el klangel, e ullisechakl er a derta er kemiu er a llomes ma klebesei el edel rak. 32“Me chelechang e ak uterekeklemiu er a Dios ma klumech er a krasia er ngii, el ingii a sebechel el meleketek er kemiu e meskemiu a klengeltengat el lolab a Dios el kirir a rokui el chedal. 33Ng dimlak kngibes a silber ma lechub e ng kolt ma lechub e ng bilel a ngii di le chad. 34Kemiu a medengei el kmo a ikaikid el chimak a kullab el mengedmokl a ikel bek el kuusbech ngak me tirkel chad el ulebengkek. 35Me ng ngar a bek el tekoi e a kulechotii er kemiu el kmo a de ua isei el meringel el oureor e ng kired el olengeseu er a re mechitechut, e melatk a ikel tekoi el le dilu Rubak el Jesus el kmo, ‘Ng bai klou el deurreng a dorous er a dolai.’” 36Ser a bo le merek el mengedecheduch a Paulus, e ng mlo outubuach el obengterir e meluluuch. 37Te rokui el lilangel er ser a lomechull er ngii e lolungel er a medal el melmesumech er ngii. 38Sel kmal mle mekngit a rengrir er ngii a sel tekingel a Paulus el kmo ng diak lluut el mo kasoues. Tiaikid e te mocha obengkel el mo merader er ngii er a diall.

will be added

X\