RELLIR 2

1Ser a Pentekost, e a rokui el oumerang er Jesus a dilak el kldibel er a telkib. 2Ng di mle mereched el mor ngii a orreek er a eanged el ua rrekel a mesisiich el eolt, el me mekekii a blai el rokir el ble le kldibel er ngii. 3E sola e te miles a kor a ngau el ua teletelel a chural a chad el mlo metengel er a derta er tir. 4Te rokui el meltuchel er a Chedaol Reng me te mocha melekoi a tekoi er a ngodech el beluu, el ikel le rirelleterir a Chedaol Reng el mo sebechir el melekoi. 5A re bebil er a re chad er a Judea el kiliei er a Jerusalem, er isel taem a tirkel chad el blak a rengrir er a tekoi el chelid me te mlar a bek el beluu er a beluulchad el mong. 6Ser a le rengesii tial cherrodech, e ng mlo mekideb a klou el seked. Te rokui el mlo semeriar ele derta er tir a ullerrenges er tirkel oumerang er a Jesus el mengedecheduch a tekoi er a belual. 7Ng mle mechas a rengrir e rrau a rengrir me te katekoi el kmo, “Tirkal chad el mengedecheduch el ua isei a chad er a Galilea! 8A le ua isei, e ng ngera uchul me kede orrenges er tir el melekoi a tekoi er a rekebeluad? 9Kid a mlar a Parthia, ma Media, ma Elam el mei, ma re mlar a Mesopotamia, ma Judea, ma Kapadosia; ma re mlar a Pontus ma Asia, 10ma re mlar a Frigia ma Pamfilia, ma re mlar a Ekipten ma ikel beluu er a Libia el ngar bita er a Kirene, ma re bebil er kid a mlar a Rom el mei, 11el chad er a Judea ma re Chisentael el ulebult el mor a klechelid er kid, ma re bebil er kid a mlar a Krete ma Arabia el mei, e sola e kid tia el rokui el orrenges er tir el melekoi a tekinged er a rekebeluad el ouchais a mengasireng el tekoi el bla leruul a Dios.” 12Ng mechas a rengrir e rrau ku rengrir me te kakerker el kmo, “Tiang belkul a kmo ngerang?” 13A re kuk bebil er tir a millenguul er a ruumerang er a Jesus me te melekoi el kmo, “Tirkal chad a cheltelaol.” 14Mitia e a Petrus a mocha dechor ngii ma re truich ma tang el apostol e mle klou a ngerel el mengedecheduch er a seked el kmo, “Kemiu el chad er a Judea me kemiu el rokui el kiei er a Jerusalem, bo mungil el orrenges e ksbedemiu er tial tekoi. 15Kemiu omdasu el kmo tirkal chad a cheltelaol, e a lechub e ng diak, ele ng dirk etiu el klok er a tutau. 16Tia bai sel lullekoi er ngii a Profet Joel el kmo: 17A Dios a kmo, ‘A ikel uriul sils e tiakid el tekoi a bo krellii, a Reng er ngak a bo kbesterir a re bek el chad. A re ngelekiu el sechal ma redil a mo olecholt a klmechek; a re mekekerel chad er kemiu a mo omes a ues, ma re mechuodel a mor tir a berrous. 18E seikid e ak dirrek el mo mesterir a Reng er ngak a re mesiungek el sechal ma redil, me te mo olecholt a klmechek. 19Ak mo remuul a ongasireng er bab el ngar a eanged ma meklou el tekoi a bo kruul er iou el ngar a chutem. Ng mor ngii a rasech, ma ngau, ma klou el chat; 20e a sils a mo milkolk, ma buil a mo bekerkard el ua rasech er uchei er a le mei sel klou e kebkall el Sils er a Rubak. 21Isei e ngikel omekedong er a Rubak el olengit a ngesou a mo suobel.’ 22“Bo mungil el orrenges a ikal tekoi, kemiu el chad er a Israel! A Jesus er a Nasareth a uleak a ikel rokui el ongasireng ma meklou el tekoi el le riruul a Dios el oeak ngii, e ng mlo ungil bleketakl er kemiu el kmo a Dios a ulderchii. Tial tekoi cho modengelii ele ng dilubech er a delongeliu. 23Ng oeak a uldesuel a Dios e ng di mla tibir er a rengul el kmo a Jesus a bo le nguu el meskemiu; me kom milekodir ele kom kilengei er a re mekngit el chad me te dilelii er a kerus. 24Ngdi Dios a ulekisii er a kodall, me ng mlengubet er a klisichel, ele ng diak el sebechel a kodall el orekedii. 25A David a millekoi el kirel el kmo, ‘Ak di mle blechoel el omes er a Rubak el ngar medak; ng di kmeed er ngak, me ng diak bo louedikel a renguk. 26Isei e ng kmal ungil a renguk, ma cheldechedechak a mui er a deurreng. Ngak a di chad, e ngdi a kmo olengull e mengiil er a telbilel a Dios el oba omelatk el mengiil, 27ele kau el Dios a diak bo mchitak er a belurir a rulekoad; ng diak bo becherei a blak a rengul el mesiungem me bo le mechut er a debull. 28Ke mla ocholt er ngak a rael el dokiu ngii el mor a klengar, ke ngar bita er ngak me ng dmeu a renguk.’ 29“Rudam er ngak, ng kirek el bleketakl el ouchais er kemiu a chisel ngikel merael chisel el ucheled el King David. Ngika mlad, e meldakl ma debellel a medechel me ng sebeched el mesa er chelechang. 30Ng mle profet, e mle medengelii sel le tilbir a Dios el mor ngii el kmo, a Dios a rirellii a mesisiich el telbiil el kmo ng mo rullii a tar a re chad er a blil a David el mo king, el di mo ua David. 31A David a milsa sel bo loruul er ngii a Dios er a ngar medal el klebesei me ng millekoi el kirel a Mesias a bo le bekiis er a kodall er ser a ledu el kmo, ‘Ng dimlak le mechoit er a belurir a rulekoad; ma bedengel a dimlak bo le mechut er a debull.’ 32A Dios a ulekisii ngiil Jesus er a kodall, me kemam el rokui a milsa tial tekoi er a medemam. 33Ng mla mengai el mor a kadekmel a Dios el Demal, e mla nguu er ngii a Chedaol Reng, el ua sel le tilbir. Sel momes er ngii, e orrenges er ngii, a sengk er ngii el bla loitelii el mer kemam. 34A David a dimlak le ngasech el mor a eanged; ngdi bai dilu el kmo, A Rubak a dilu er a Rubak er ngak el kmo: Bo mdengchokl er a kadekmek 35el dimerkmo krelleterir a re cherrouem el mo deruchellel ochim.’ 36“Isei e a re chad er a Israel el rokui a kirir el kmal mo ungil medengei el kmo ngkaikid el Jesus el ngikel mdilelii er a kerus, ingii a bla le rellii a Dios el mo Rubak e Mesias!” 37A re chad er ser a le renges a ikal tekoi e ng kmal mlo ouedikel a rengrir me tuleker er a Petrus me tirkel bebil er a re apostol el kmo, “Maki mekerang e rudam?” 38Ma Petrus a dilu er tir el kmo, “Mobult el rokui er a kngtmiu e bo metecholb el ngar a ngklel a Jesus Kristus, me bo lousubes a kngtmiu a Dios, me mnguu a Chedaol Reng el le bilskid a Dios. 39Ele telbilel a Dios a kiriu kemiu ma re ngelekiu, e dirrek el kirir tirkel rokui el ngar cheroid el tir a lomekedong er tir a Rubak el Dios er kid el mor ngii.” 40A Petrus a kmal ullengit er tir e ullab a lmuut el bebil er a tekoi el orrimel er tir el kmo, “Mosebelemiu er sel kerrekeriil el merku er a re dengerenger el chad!” 41Ng betok er tir a mlo oumera osisecheklel me te meltecholb, me ng bekord el 3,000 el chad a mlo modak er tir er isel sils. 42E mle blak a rengrir el mesuub osisecheklir a re apostol, e ngar ongdibel, e dmak el omengur, e dmak el meluluuch el okiu a klauchad er a delongelir. 43A Dios a riruul a betok el ongasireng ma meklou el tekoi el okiu a re apostol e riruul a betok el ongasireng ma ngar ngii a klisichel tekoi ma re bek el chad a kmal mlo mechas a rengrir. 44A rokui el oumerang a di dilak el ngar a kmes el klauchad e mirrous a kloklir er a delongelir. 45Tulelterau a chetemir ma kloklir e merous a udoud el mor a rokui el chad el oltirakl er a ildisel a lousbech er ngii a derta er tir. 46A bek el sils e te dilak el ngar a Templo, e dilak el omengur er a rekeblirir, el di mle ungil er a rengrir a ikel ngar ngii er tir, 47e oldanges er a Dios, ma re bek el chad a mle ungil a rengrir er tir. Ma Rubak a mle bek el sils el lomdois er tir ma ruumerang a merrael el mo betok.

will be added

X\