RELLIR 19

1Ser a le ngar a Korinth a Apolos e a Paulus a kuk uleak a beluu el mor a Efesus. Me ser a le bong e ng miltik er a re bebil er a ruumerang er a Jesus 2me ng uleker er tir el kmo, “Kom ngiluu a Chedaol Reng er ser cho mkot el mo oumerang?” Me te dilu el kmo, “Ng kmal dirkak kim renges el kmo ng ngar ngii a Chedaol Reng.” 3Ma Paulus a uleker er tir el kmo, “Ng ngeral techolb cho meltecholb er ngii?” Me te dilu el kmo, “Ng techolb er a Johanes.” 4Me ng dula Paulus el kmo, “A techolb er a Johanes a kirir tirkel ulebult el mo cheroid er a klengit. Ng millekoi er a re chad er a Israel me bo loumerang er ngikel oeak uriul er ngii el mei, el ingii a Jesus.” 5Me ser a le renges a ikang e te mlo metecholb el oba ngklel a Rubak el Jesus. 6E a Paulus a milor a chimal er tir me ng miltengel er tir a Chedaol Reng me te mlo melekoi a ngodech el omelekoi e dirrek el ulemerk a klmechel a Dios. 7Te locha mle truich ma terul sechal. 8A Paulus a mle edel buil el lomais el mor a blil ongdibel er a re chad er a Judea e mle bekeu el mengedecheduch er a re chad e mesaod e meledaes a rengrir er a tekoi el kirel a Rengedel a Dios. 9Ngdi re bebil er tir a mle medecherecher a rengrir me ng dimlak bo loumerang, e di mlar medal a kldibel e melekoi a mekngit el tekoi el kirel a Rolel a Rubak. Ma Paulus a chilititerir e di ngilititerir a ruumerang el obengkel, me ng mle bek el sils el longedecheduch el ngar a blil omesuub er a Tiranus. 10Ng mle ua isei el erul rak ma rokui el chad er a Judea ma re Chisentael el kiliei er a renged er a Asia a rirenges a tekingel a Rubak. 11A Dios a riruul a ngodech el ongasireng el tekoi el okiu a Paulus. 12Ng mo lmuut er a hangkats ma apron el luluusbech a lsekum te ngmai el mo locha er a re smecher e te mo ungil er a rektir, ma mekngit el chelid me ng tuobed er tir. 13A re bebil chad er a Judea el ulemais el oltobed a mekngit el chelid a dirrek el millasem el ousbech er a ngklel a Rubak el Jesus el oltobed a mekngit el chelid, me te bek el chad el millekoi a mekngit el chelid el kmo, “Ak ultobed er kemiu el oba ngklel a Jesus el ngikel lolecholt er ngii a Paulus.” 14Ng mlar ngii a re teuid el odam, el ngelekel a Ngarbab el Prist el chad er a Judea, el Siba ngklel, el mirruul er tial tekoi. 15Ma mekngit el chelid a dilu er tir el kmo, “A Jesus a kudengelii, ma Paulus mak medengelii; e ngdi kemiu, kom rua techang?” 16Ngikal chad el mlar ngii er ngii a mekngit el chelid a mlo meringel el odelecheklterir el mlo mesisiich er tir el rokui. Te chiliis er a blil ngiil chad el di telemall e selodel a bilir me te di meau. 17A rokui el chad er a Judea ma re Chisentael el kiliei er a Efesus a rirenges a chisel tial tekoi me te kmal mlo medakt; e a ngklel a Rubak el Jesus a lesal mlo mengull er ngii. 18Ma re betok el oumerang a mlei e mlar medal a seked e ullecholt a ikel mekngit el omerellir. 19Te betok er tirkel uluuelai a uldekdak a babier er tir e sileseb er mederir a re chad. Tuldak a cheral ngiil babier me ng mle 50,000 el silber el udoud. 20Ng mle ua isei el mesisiich el oberk a tekingel a Rubak e mengal mirrael el mo mesisiich. 21Itiakid er a le dubech a ikal tekoi e a Paulus a tilbir er a rengul el mo merael el okiu a Masedonia ma Akaia el mol mor a Jerusalem. Ng dilu el kmo, “Ak mor a Jerusalem e a uriul er isei e ng dirrek el kirek el mo mesa Rom.” 22Itia e ng ulderchii a Timothy ma Erastus, el teru er a rulengeseu er ngii, el mor a Masedonia, e ngii a dirk mle telkib el ngar a renged er a Asia. 23E tiaikid e ng mlar ngii a meringel el uldikel er a Efesus el Rolel a Rubak a uchul. 24A tal chad el omeob a silber, el Demetrius a ngklel, a mirruul er a silber el okesiul a templo er a Artemis el redil chelid, me tia mle uchul a ungil kerrekerengir a re chad er a ureor. 25Ng milekedongeterir a re chad er a ureor el rokui el mo kldibel me tirkel kuk bebil er a re chad el mle osisiu a urerir e dilu er tir el kmo, “Kemiu a medengei el kmo tiaikid el ureor a uchul me ng betok a ududed. 26Ng sebechiu el di kemiu el omes e orrenges a ikel loruul a Paulus. Ng melekoi el kmo a rruul er a re chad el chelid a diak le meral chelid, me te betok el chad el ngar a Efesus ma klou er a renged er a Asia a mla mo oumerang er ngii, 27me ng soal metemall a chisel a uchul a kerrekerenged. Ng diak di le seikid e le merekong, ng dirrek el soal a templo er a chelid el redil el Artemis el mo diak a belkul me ng mo metemall a klou el klisichel ngii el longull er ngii a re bek el chad er a Asia ma beluulchad el rokir!” 28Me tial seked er a le renges a ikal tekoi, e ng kmal mlo kesib a rengrir e mocha oldiu el kmo, “A Artemis er a Efesus a klou a klisichel!” 29Ngiil uldikel a uleberk er a beluu el rokir. Ma seked a mildechemii a Gaius ma Aristarkus, el terul chad er a Masedonia el mle tal omerael tir ma Paulus e rirurt el ngoititerir el mor a blil a klekool. 30A Paulus a mle soal el mor medal a seked e ngdi tirkel oumerang a dimlak le becherei me le bong. 31A re bebil sechelil el ngarbab a deruchellir er a buai a uleldurech el mor ngii el mengelechel er ngii me lak bo lolecholt er ngii er a blil a klekool. 32A re chad el mle kldibel a di mle ketokl, a re bebil er a re chad a uleldiu el kirel a tar a tekoi ma re kuk bebil a uleldiu el kirel a kuk tang, ele oumesingd er tir a dimlak lodengelii a uchul me te kldibel. 33A re bebil er a re chad a ulemdasu el kmo a Alexander a uluungerachel er tial tekoi ele re chad er a Judea a dilu er ngii me ng mor medal a seked. Ma Alexander a uldars a chimal el mengellakl er a seked, e sola e millasem el mesaod er ngii. 34Ngdi re chad er a bo lodengei el kmo ng chad er a Judea, e te rokui el uleldiu el kmo, “Ng klou a klisichel a Artemis er a Efesus!” Ng mle erul sikang el loldiu er ngii el osisiu el tekoi. 35E uriul, e a melechesel a buai a kol mlo sebechel el cholleklii a seked. Ng dilu el kmo, “Kemiu el chad er a Efesus! A re bek el chad a medengei el kmo a beluu er a Efesus a mengedmeklel a templo er ngii el klou a klisichel el Artemis me sel chedaol bad el rirebet er a eanged el mei. 36Ng diak a chad el oumededenger a ikal tekoi. Me le merekong e bo mchelellakl e lak moruul a uldikel. 37Kom mla ngoititerir tirkal chad el mer tiang e tir a dimlak le rechorech a ngerang er a templo el ka lullekoi a mekngit el tekoi el bedul a chelid er kid. 38A lsekum a Demetrius ma re chad er a ureor er ngii a ngar ngii a ultuteklir el kirel a ngii di le chad, e ng ngar ngii a re merreder er kid, e ngar ngii a belsechel a kerrekeriil; me ng sebechel a ultutakl el mor sel kirel. 39Ngdi lsekum ng ngar ngii a ngodech el tekoi el somiu, e ng kirel mo soadel er a re chad el kldibel el oltirakl a llach. 40A ikel mla mor ngii el tekoi a sebechel el otuteklid el kirel a uldikel. Ng diak a omesodel tial uldikel, el ka le sebeched el ochotii a mle ungil el uchul e ng mor ngii.” 41Ng di dilu ikang e sola e silmesmecheterir a re chad me te meterakl.

will be added

X\