RELLIR 17

1A Paulus ma Silas a millemolem er omerolir el mor a Amfipolis ma Apolonia e mlor a Thesalonika el ngar ngii a blil ongdibel er a re chad er a Judea er ngii. 2Ma Paulus a mlor a blil ongdibel ele ng di mle blechoel el ua isei. Ma ikel edel Ulengull el Sils el le ngar sei e ng ulebengterir a re chad el mesaod 3a tekoi er a Chedaol Llechukl el omeketakl el kmo a Mesias a mle kirel el mo chuarm e mekiis er a kodall. Ng millekoi er tir a Paulus el kmo, “Ngikaikid el Jesus el kulecholt er ngii er kemiu, ingii a Mesias.” 4A re bebil er tir a mlo oumerang me te mlo obengkel a Paulus ma Silas; ma re bebil el ngarbab el redil ma re betok el chad er a Gris el mengull er a Dios a mlo obengterir. 5Ngdi re chad er a Judea a mlo mechechei me te milengudel er a re bebil dengerenger el ngar a rael el mo dmak, e odkelii a beluu el rokir e odelecheklii a blil a tal chad el Jason a ngklel, ele tulsiik er a Paulus ma Silas e melai er tir el mor mederir a re chad. 6E a lekea le betik er tir, e te kilekersii a Jason ma re bebil er a ruumerang el mor mederir a re merreder er a beluu e oldiu el kmo, “Tirkel chad a miluchel a uldikel er a bek el beluu! Chelechang e te merma er a beluad 7e a Jason a ngilititerir el mor a blil. Te rokui el melemall a llechul a merreder er a Rom, ele te melekoi el kmo ng ngar ngii a kuk ngodech el king el Jesus a ngklel.” 8Ser a ledu ikal tekoi, e a seked ma re merreder er a beluu a mlo ouedikel. 9A re merreder a milelsii a Jason me tirkel bebil er a re chad me te lilecha ildisel a udoud el lulebals er ngii, e te ngubeteterir. 10Me ng di mlo mesesilkolk e a ruumerang a odureklii a Paulus ma Silas el mor a Berea. Te di mlong e merael el mor a blil ongdibel. 11A re chad er sei a bai kuk mle semeriar el orrenges er a re chad er a Thesalonika. Ng mle blak a rengrir el orrenges a osisechakl, e mle bek el sils el losuub er a Chedaol Llechukl el merriter el kmo a ikel lullekoi a Paulus ng klemerang ng diak. 12Te betok er tir a mlo oumerang; te betok el ngarbab a deruchellir el redil er a Gris ma re betok el sechal er a Gris me te dirrek el mlo oumerang. 13Ngdi ser a le renges a re chad er a Judea el ngar a Thesalonika el kmo a Paulus a dirrek el olisechakl a tekingel a Dios er a Berea, e te mlong me te tuchelterir a re chad el odkelii a klou el seked. 14Ma ruumerang a di mle mereched el dmu er a Paulus me ng merael el mor a kmeed er a daob el beluu; ngdi Silas ma Timothy a di kiliei er a Berea. 15Tirkel chad el uleba Paulus el mong a ulebengkel el mo lmuut er a Athens, e sola e liluut el mor a Berea el olab a klmechel a Paulus el mor a Silas ma Timothy el kmo ng kirir el di mereched el mong. 16A Paulus er a le ngar a Athens el mengiil er a Silas ma Timothy e ng kmal mlo mekngit a rengul er a lesang ngiil beluu el di mui er a bleob el chelid. 17Me ng mlar a blil ongdibel el mengedecheduch er a re chad er a Judea ma re Chisentael el mengull er a Dios, e dirrek el bek el sils el le ngar a blil ongdibel er a buai el mengedecheduch er tirkel chad el mlo engelakl. 18A re bebil el sensei er a Epikurea ma Stoik a dirrek el milengaititekangel er ngii. E a re bebil a uleker el kmo, “Ngera ng melekoi ngikal simang el diak a ngeral lodengei?” Ma re kuk bebil a ulenger el kmo, “Ng kor a mengedecheduch el kirel a kuk ngodech el chelid.” Te millekoi el ua isei ele Paulus a ullisechakl el kirel a Jesus ma okiis er a re mlad. 19Me te ngiluu a Paulus el mor a medal a Areopagus, el olbiil er a beluu e dilu el kmo, “Ng somam el mo medengei el kmo tiang ngeral beches el osisechakl el molekoi er ngii. 20A bebil er a ikel tekoi el kim orrenges er kau el melekoi a kor a ngodech er a rengmam, me ng somam el mo medengei a belkul.” 21(A rokui el chad er a Athens ma re ngodech el chad el kiliei er sei a mle sorir el chemoit a temir el kauchais a kuk beches el tekoi.) 22Ma Paulus a mlo dechor er medal olbiil er ngiil beluu e dmu el kmo, “Ak mla mo medengei el kmo kemiu el chad er a Athens a kmal blak a rengmiu er a tekoi el chelid. 23Ele ser a kusarech er a belumiu e ak ulemes a ikel cho mngar ngii e meluluuch, e metik er a tal olengetongel, el tekoi el llechukl er ngii a kmo, ‘Mor a diak a medengelii el chelid.’ Ma le ua isei el moluluuch er a chelid el diak modengelii, e ak mo ochotii er kemiu er chelechang. 24A Dios, el ngikel milebii a beluulchad ma ikel bek el ngar a chelsel, ingii a Rubak er a eanged ma chutem me ng diak le kiei er a rruul er a chim el templo. 25Ng dirrek el diak a ngeral lousbech er ngii el sebeched el kudmeklii el kirel, ele ng bai ngii a omesterir a re bek el chad a klengar, ma telrir, ma bek el tekoi. 26Ng uleak a tal chad e mileob a bek el bedengir a re chad el mo kiei er a beluulchad el rokir. Ng di mla kudmokl a taem ma sakai er a ikel beluu el bo le kiei er ngii, 27e rirelleterir el bo losiik er a Dios e a lta te mo melechesuar e metik er ngii. Ngdi Dios a diak le cheroid er a derta er kid; 28el di ua le dilu tar a chad el kmo, ‘Ngii a uchul e kede outeliil, e mengitengtik e ngar ngii a klengar er kid.’ Ng dirrek el di ua lolekoi a re bebil er a re chedemiu el meluches a chelitakl el kmo, ‘Kid me kede dirrek el ngelekel.’ 29Chelechal de ngelekel a Dios, e ng diak le kired el omdasu el kmo a teletelel a Dios a ua bleob el kolt ma lechub e ng silber ma lechub e ng bad, el le riruul a re dachelbai el chad. 30Ser a dirkak bo lodengelii a Dios a re chad, e ng di ullechib er a medal e ngdi chelechang e a tekingel a kmo a rokui el chad er a bek el beluu a kirir el obult el mo cheroid er a mekngit el blekerdelir. 31Ele ng mla tutkii a sils el bo loukerrekeriil er a beluulchad el rokir el oba llemalt, el okiu a tal chad el bla le ngiltii. E tia bla lochotii el mor a rokui el chad er ser a lokisii ngiil chad er a kodall!” 32Ser a lorrenges er a Paulus el mengedecheduch el kirel okiis er a kodall, e a re bebil er tir a millenguul er ngii, e ngdi re bebil a dilu el kmo, “Ng somam el mo orrenges er kau sel cho mluut el mo mengedecheduch el kirel tial tekoi.” 33Itia e a Paulus a tilobed el merael. 34A re bebil er a re chad a mlo obengkel el oumerang, el bebil er tir a Dionisius, el tar a re chad er olbiil, ma tal redil el Damaris a ngklel, ma re kuk bebil er a re chad.

will be added

X\