RELLIR 16

1A Paulus a mlor a Derbe ma Listra el le kiliei er ngii a tal Kristiano el ngklel a Timothy. A delal el dirrek el mle Kristiano a redil er a Judea, e ngdi demal a chad er a Gris. 2A re bek el oumerang el mlar a Listra ma Ikonium a kmal chilat er a Timothy. 3A Paulus a mle soal el melai er a Timothy el mo obengkel me ng miltkii. Ng ulemotk er ngii ele rokui el chad er a Judea el kiliei er a ikel beluu a mle medengei el kmo a demal a Timothy a chad er a Gris. 4Ser a lomais ngiil beluu e te milsterir a ruumerang a ikel llach el meltib er a re apostol ma re mechuodel el ngar a Jerusalem el kirir el mo oltirakl. 5Isei e a ikel Ikelesia a mengal mlo mesisiich el oumerang e mle bek el sils el lorael el mo betok. 6Te mirrael el mor a renged er a Frigia ma Galatia ele Chedaol Reng a dimlak le kengei er tir me bo lolisechakl er a Ebangkelio er a Asia. 7E ser a le bor a oliochel er a Misia, e te millasem el mo soiseb er a beluu er a Bithinia, e ngdi Reng er a Jesus a dimlak le kengei er tir. 8Me te di mirrael el engelakl er a Misia el mor a Troas. 9E sel kesus e a Paulus a milsa er a ues a tal chad er a Masedonia el dilechor e olengit er ngii el kmo, “Mei er a Masedonia me mngesukemam!” 10Ng di milsa tial ues a Paulus, e a kim mocha mengedmokl er kemam el mor a Masedonia, ele kim mlo omtab el kmo a Dios a ulemekedong er kemam el mo olisechakl er a Ebangkelio er a re chad er sei. 11Aki tilobed er a Troas el ngar a diall maki ulemekall el di mle melemalt el mor a Samothrace, e a bo le kukuk e aki mlor a Neapolis. 12Ma kim mlar sei e mo soiseb er a beluu el mor a Filipi, el klou a belkul el beluu er a renged er a Masedonia, e dirrek el ngar eungel omerreder er a Rom; e mlar sei el telal klebesei. 13E a bocha le Ulengull el Sils, e aki tilobed er a beluu el mor a tkul omoachel, el kim ulemdasu el kmo ng ngar ngii a le kldibel er ngii a re chad er a Judea e meluluuch. Ma kim mlo dengchokl e mengedecheduch er a redil el mle kldibel er ngii. 14A Lydia er a Thiatira, el olterau a smiich el bekerkard el mamed, a tar tirkel ulerrenges er kemam. Ngikal redil a milengull el meluluuch er a Dios, ma Rubak a diledesii a rengul me ng mle blak a rengul el orrenges a ikel lolekoi a Paulus. 15Ma uriul er a le metecholb ngii ma re chad er a blil, e ng milengemedaol er kemam el kmo, “Mei me mkiei er a blik a lsekum kom omtab el kmo ak meral oumerang er a Rubak.” Ng uluuengemek el omecheoch er kemam el mong. 16A tar a klebesei er a kimorael el mor a blil a nglunguuch, e aki mlo osiueklii a tal sibai el redil el teluchel er a mekngit el chelid me ng meruul er ngii el mo sebechel el omlaoch el kirel a ngar medad el klebesei. A ikel lullekoi a ulsiseb a betok el udoud el mor tirkel chad el uluusbech er ngii el mengereker. 17Ng uleltirakl er kemam ma Paulus, e oldiu el kmo, “Tirkal chad a mesiungel a Kot el Ngarbab el Dios! Touchais er kemiu el kmo ng mekera e ng sebechiu el mo suobel!” 18Ngika mle ua isei el telal klebesei ma Paulus a kmal kekeringa rengul me ng mileltii e dmu er ngii el mekngit el chelid el kmo, “Ak uba ngklel a Jesus Kristus e dmu er kau el kmo mtobed er ngikal redil!” Ng di mle seikid e ng tuobed er ngii. 19Me tirkal oungerachel er ngiil redil er a bo lodengei el kmo ng dikea techellir el mengereker, e te mildechemii a Paulus ma Silas e kilerseterir el mor a re merreder el ngar sel bo le kldibel er ngii a re beluu. 20Me te ngilititerir el mor mederir a re merreder el chad er a Rom e dmu el kmo, “Tirkang a chad er a Judea e meruul a uldikel er a belumam. 21Tolisechakl a tekoi el kautok ngii ma llechemam a re chad er a Rom, me ng diak el sebecham el mo olab ma lechub e kim moruul.” 22Ma seked a kilengei ngiil odechelakl el mor a Paulus ma Silas. Mitia e tirkel merreder a mildobed a bilel a Paulus ma Silas e dmu me le mechelebed. 23Ma uriul er a bo le meringel el mechelebed e te mlekelebus, e a chad er a kelebus a le dilu er ngii me ng mo blak a rengul el mengkar er tir. 24Me tia er a ledu er ngii el ua isei e ngiil chad er a kelebus a ngilititerir el mor sel emel er a kelebus e chomekl ocherir er a kerrekar me ng diak le mengubet. 25Ng locha sueleb er a klebesei, e a Paulus ma Silas a milluluuch e mengitakl odanges el mor a Dios, me tirkel kuk bebil er a re kelebus a ulerrenges er tir. 26E di mlor ngii a mesisiich el desiu el di silmesmengii a kelebus el mo lmuut er omekedecheraol er ngii me ng di mlo melmesim. E a rokui el chesimer a di mlengai ma bombatel er a chimorir a re kelebus me ng di mlengubet. 27Me ngikel mengkar er a kelebus er a le mekar e le ues a chesmerel a kelebus el di nglai, e ng ulemdasu el kmo a re kelebus a mla chemiis me ng ultebedii a saider er ngii el leko ng di ngii el omekoad ku er ngii. 28Ma Paulus a uleldiu el klou a ngerel el kmo, “Lak momekoad er kau, e kemam tial ngar tiang el rokui!” 29Me ngiil mengkar er a kelebus a silikii a olbidel e ulerreched el mo soiseb me ng ulemritel el mo terrob er medal a Paulus ma Silas. 30E sola e chilteklterir el mo tuobed e uleker el kmo, “Kemiu el rubak, ngera bo krellii e ak mo suobel?” 31Me te dilu er ngii el kmo, “Ke mo oumerang er a Rubak el Jesus, e kau a mo suobel kau ma re chad er a blim.” 32Itia e te mocha olisechakl er ngii a tekingel a Rubak, ngii me tirkel rokui el mlar a blil. 33Ngdi mle seikid e ngikal mengkar er a kelebus a ngilititerir e mocha merisu a telemall er a bedengir; e ngii ma re chad er a telungalek er ngii el rokui a di mle mereched el mo metecholb. 34E sola e ngiluu a Paulus ma Silas el mor a blil e milsterir a bebil er a kall me tomengur. E ngii ma telungalek er ngii a kmal mle dmeu a rengrir ele te mla mo oumerang er a Dios. 35Me tia er a le mellemesang e a re merreder el chad er a Rom a uleldurech er a re bulis el mor a kelebus el mo dmu el kmo, “Motebedeterir tirkel chad.” 36Me ngikel mengkar er a kelebus a silbedii a Paulus el kmo, “A re merreder a mla suumech a tekoi el mei el melubet er kau ma Silas. Mada ng di ungil cho mtobed e morael, me morael el ngar a budech.” 37Ma Paulus a dula er a re merreder er a re bulis el kmo, “Kemam a chad er a Rom, e di dimlak kim mukerrekeriil e obals, e te cholbedemam er medal a seked, e osisebemam er a kelebus; e chelechang e ng sorir el di berrotel el oltobed er kemam? Ng diak le ua isei! Tirkel merreder er a Rom a kirir el mei e oltobed er kemam.” 38Ma re merreder er a re bulis a mlo subedeterir a re merreder er a Rom er ngiil tekoi, me ser a le renges el kmo a Paulus ma Silas a chad er a Rom e te mlo medakt. 39Mitia e te mocha me te meluluuch er tir, e otebedeterir er a kelebus e ullengit er tir me lorael el mo cheroid er sel beluu. 40Ma Paulus ma Silas a tilobed er a kelebus e mlor a blil a Lydia. Te mlo kasoues er isei tir ma ruumerang, e milengedecheduch er tir el melisiich a rengrir e merael.

will be added

X\