RELLIR 14

1Ng di osisiu el tekoi a merruul er a Ikonium. A Paulus ma Barnabas a mlor a blil ongdibel e mengedecheduch el cheldechederir a rirelleterir a re betok el chad er a Judea ma re Chisentael el mo oumerang. 2Ngdi re chad er a Judea el dimlak bo loumerang a milechelii a uldikel er a delongelir a re Chisentael me tulebult el mo omtok er a ruumerang. 3A re apostol a kiliei er sei el meketeket, e mle bekeu el ouchais a chisel a Rubak, ele Rubak a milsterir a klisiich el meruul ongasireng ma meklou el tekoi el olechotel a kmo, a osisecheklir el kirel a krasia er a Dios a klemerang. 4Ma re chad er ngiil beluu a ulebii ma re bebil a ullab el mor a re chad er a Judea, ma re kuk bebil a ullab el mor a re apostol. 5Itia e a re bebil Chisentael ma re chad er a Judea a mlo dmak tir ma re mengeteklir e tibir el mo omekcharm er a re apostol e ometech er tir er a bad. 6Ma re apostol er ser a bo lodengei, e te chiliis el mor a ikel kmeed el beluu el uldimukl er ngii a Listra ma Derbe el beluu er a Likaonia. 7Me te mlar isei el olisechakl er a Ebangkelio. 8Ng mlar ngii a tal chitechut el chad el mlar a Listra, el mle chitechut er a le mechell me ng dirkak a tal lorael. 9Ngiil chad a dilengchokl e orrenges a cheldechedechal a Paulus. Ma Paulus er a bo lomtab el kmo ng uluumerang me ng sebechel el mo ungil, e ng ulengengii 10e mle klou a ngerel el melekoi el kmo, “Bekiis el mo melemalt el dechor.” Me ngiil chad a di silechesokl el mo dechor e mocha mererorael. 11Ma seked er a lesa tial le rirellii a Paulus, e te mocha oldiu el tekoi er a belurir er a Likaonia el kmo, “A re chelid a mla mo ua teletelir a re chad e mla me metengel el mer kid!” 12Te milengklii a Barnabas el Seus, e a Paulus a mle mekudem el mengedecheduch me te milengklii el Hermes. 13Me ngikel prist er a chelid el Seus, el Templo er ngii a dilechor er a ikrel a beluu, a ngila sechal kerbou ma bung el mor a siseball, ele ngii me tial seked a mlo sorir el oldars a tenget el mor a re apostol. 14Ma Barnabas ma Paulus er a le renges a chisel tial leko te mo meruul er ngii, e te silodel a bilir e rirurt el tmuu er a delongelir a re chad el meseked e oldiu el kmo, 15“Ea ng ngera uchul me kom meruul a ua isei el tekoi? Kemam a di chad el ua ikemiu! Aki ngar tiang el ouchais er a Ebangkelio, me mobult el mo cheroid er a ikal diak a ultutelel el tekoi e bor a di ngar el Dios, el ngikel milebii a eanged, ma chutem, ma daob, ma ikel rokui el ngar a chelsel. 16Ser a ngar a mong e ng milechititerir a re bek el chad me te di mlar a ikel sorir. 17Ngdi ngii a mle blechoel el olecholt er ngii el oeak a ikel ungil tekoi el loruul. Ng oltengel er a chull er a eanged el ekor kemiu e meskemiu a dellomel er sel ungil belsechel, e meskemiu a keliu e omekeek a rengmiu er a deurreng.” 18A ikal tekoi a le dilu re apostol e ngdi dimlak le beot er tir el torebengii a seked me lak loldars a tenget el mor tir. 19E a re bebil chad er a Judea el mlar a Antiok er a Pisidia el mong ma re mlar a Ikonium a milengesuseu er a seked el mo obengterir e metechii a Paulus er a bad e kurekersii el otebedii er a beluu, ele tulemdasu el kmo ng mla mad. 20Ngdi ruumerang er ser a bo le chelludel el meliuekl er ngii, e ng milekiis e liluut el mor a beluu, e a bo le kukuk e ngii ma Barnabas a mirrael el mor a Derbe. 21A Paulus ma Barnabas a ullisechakl er a Ebangkelio er a Derbe me te betok el chad a mlo chedal a Jesus. E sola e te liluut el mor a Listra, e mor a Ikonium, e mor a Antiok er a Pisidia. 22Te millisiich er a ruumerang er isei e milengelechel er tir me di le blak a rengrir el oumerang. Tullisechakl er tir el kmo, “Kid a kired el mo chuarm er a betok el ringel e mochu soiseb er a Rengedel a Dios.” 23Te millutk er a re mo mengeteklel a bek el Ikelesia, e milluluuch e olsengerenger el olterkokl er tir er a Rubak, el ngikel loumerang er ngii. 24Uriul er a le bidii a beluu er a Pisidia el rokir e te mlor a Pamfilia, 25me tullisechakl a tekingel a Dios er a Perka e sola e mirrael el mor a Atalia, 26me te mlar isei e ulemekall el lmuut el mor a Antiok el sel le mlar ngii e olterekokl er tir er a krasia er Dios el kirel ngiil ureor el mocha merek. 27Ser a le bor a Antiok, e te milengudel er a re chad er a Ikelesia el mo kldibel e uluuchais er tir a ikel rokui el le dilak tir ma Dios e remuul e dirrek el uluuchais er tir er a blekerdelel a Dios el mla mekengii a rael el kirir a re Chisentael me bo loumerang. 28Te kiliei el obengterir a ruumerang er isei el mle oikab el meketeket.

will be added

X\