RELLIR 13

1A Ikelesia er a Antiok a mlar ngii a re bebil el profet ma re sensei: ng Barnabas ma Simeon el lomekedong er ngii el Ngeduch, ma Lusius el chad er a Kirene, ma Manaen el mlukeroul el obengkel a Herodes el merreder er a beluu er a Galilea ma Saulus. 2Ser a losiou er a Rubak e lolsengerenger, e a Chedaol Reng a dilu er tir el kmo, “Meklii el kirek a Barnabas ma Saulus me bo loruul er sel ureor el bla kumekedong er tir el kirel.” 3Me tulelsengerenger e meluluuch, e milor a chimorir er tir, e dmu er tir me te merael. 4A Barnabas ma Saulus a mlodurech er a Chedaol Reng me te mlor a Selusia e mlar isei e omekall el mor a tal iungs el Siprus. 5Ma le bor a Salamis, e tullisechakl a tekingel a Dios er a blil ongdibel. A Johanes Markus a ulebengterir el olengeseu er tir er ngiil ureor. 6Te milidii ngiil beluu el rokir el mo lmuut er a Pafos el ngar a bitang, e miltik er a tal ouelai el chad er a Judea el Barjesus a ngklel, el meruul er ngii el leko ng profet. 7Ng uluusechelei er a Serkius Paulus, el mellomes a rengul chad el mle merreder er ngii el beluu. Ingii el merreder a ulemekedong er a Barnabas ma Saulus ele ng mle soal el orrenges a tekingel a Dios. 8Ngdi Elimas (tia ngklel er a Grik) el chad er olai a ulemtok er tir, ele ng millasem el merers er a merreder me lak bo loumera er a Jesus. 9Itia e a Saulus, el dirrek el Paulus a ngklel, el teluchel er a Chedaol Reng a ulturk a medal er ngiil chad er olai 10e dmu el kmo, “A kel ngelekel a Diabelong! Kau a cherrouel a bek el ungil tekoi. Ke mui er a bek el blekerdelel a mekngit el omeruul, e di blechoel el melasem el meruul a klemerang er a Rubak el mo telingaol! 11Chelechang e a Rubak a mo melsau, me ke mo meiko el mo diak mesa sils el telkib.” Itia e a Elimas a mocha omelechesiu er a ilkolk el di milart a medal me ng mocha meleliuekl el osiik er a chad el mo mengetakl er ngii. 12Me ngikel merreder er a lesa tial tekoi, e ng mlo oumera ele ng kmal mlo mechas a rengul er osisechakl el kirel a Rubak. 13A Paulus me tirkel chad el ulebengkel a tilobed er a Pafos el omekall el mor a Perka el klou el beluu er a Pamfilia, me te mlar isei e a Johanes Markus a chilititerir e lmuut el mor a Jerusalem. 14Te mlar a Perka el mor a Antiok er a Pisidia, ma bocha le Ulengull el Sils, e te mlo soiseb el mo dengchokl er a blil ongdibel. 15E uriul er a le mechuiu a Llach er a Moses ma tekoi el llechukl er a babier er a re profet, e a ruungerachel er a blil ongdibel a uleldurech el mor tir el kmo, “Rudam, ng somam cho mongedecheduch er a re chad a lsekum ng ngar ngii cho mobang el osisechakl el mo remuul a rengrir el mo ungil.” 16Ma Paulus a mlo dechor e ullab a chimal el mengellakl er a re chad e mocha mengedecheduch el kmo, “Morrenges er ngak kemiu el chad er a Israel ma rokui el Chisentael el ngar tiang el mengull er a Dios. 17A Dios er a re chad er a Israel a ngilelteterir a ruchelam e rirelleterir el mo chimol klou el beluu er ser a le kiei er a Ekipten. A Dios a uleba klou el klisichel el oltobed er tir er a Ekipten, 18me ng mle 40 el rak el longedmokl er tir er a ked. 19Ng ulekngemed a kleuid el renged er a beluu er a Kanaan e rirelleterir a re chedal el mo oubeluu er ngii, 20e a uriul er a bekord 450 el rak e ng milsterir a re mengeteklir el mor ser a bocha le profet a Samuel. 21E ser a lolengit er a king e a Dios a milsterir a Saul el ngelekel a Kis, el chad er a klebliil er a Benjamin me ng mlo king er tir el 40 el rak. 22E a uriul er isei e ng mloiis, e a Dios a dolemii a David el mo king er tir. E tiakid a le dillii a Dios el kirel el kmo, ‘Ak mla metik er a David el ngelekel a Jesse el soak el chad, ngii a ngikel mo remuul a ikel rokui el soak a loruul.’ 23Me ng Jesus, el chad er a kleblillel a David a ngikel le tiletkii a Dios el mo Osebelir a re chad er a Israel el oltirakl er sel le tilbir. 24Uchei er a lomuchel er a urerel a Jesus, e a Johanes a ullisechakl er a rokui el chad er a Israel el kmo ng kirir el obult el mo cheroid er a kngterir e mo metecholb. 25Ma Johanes er a bochu lorekui er a urerel e ng dilu er a re chad el kmo, ‘Cho momdasu e ak techang? Ngak a diak ngikel mongiil er ngii. Ka morrenges! Ng ngar ngii a mei er uriul er ngak, el ngak a diak krredemelel a mo mengedoked a surel oecherel.’ 26“Kemiu el chad er a Israel, el chad er a klebliil er a Abraham, ma rokui el Chisentael el ngar tiang el mengull el meluluuch er a Dios, a tekoi er osobel a mler kid! 27Ele re chad el kiliei er a Jerusalem ma re mengeteklir a dimlak lodengei el kmo ingii a Osobel, ma ka lulemtab a tekingir a re profet el mlechuiu er a bek el Ulengull el Sils. Me ser a lotngeklii a Jesus e lotuteklii me le bor a kodall e tultaut a tekingir a re profet. 28Ng dirrek el dimlak el sebechir el metik er a mo uchul a kodellel, me tullengit er a Pilatus me lesiik a cheldechulel e bo le mad. 29E a uriul er a leruul a bek el lolekoi a Chedaol Llechukl el kirel, e tultengelii er a kerus e mo loia er a debull. 30Ngdi Dios a ulekisii er a kodall, 31me ng mle betok el klebesei el bo ledum er tirkel le dilak er a Galilea el mor a Jerusalem. Chelechang e tirkeikid a ocholt el kirel el mor a re chad er a Israel. 32- 33Me kemam tiang el oba ngiil ungil chais el mer kemiu el kmo, a Dios er ser a lokisii a Jesus er a kodall e ng ultutii sel telbilel el mor a rucheled, me chelechang e ng touta el mer kid el ngelekir. El ua llechukl er ongerul Psalm el kmo: ‘Kau a Ngelekek, chelechang e ak mla mo Demam.’ 34E a le dillii a Dios el kirel er ser a lokisii er a kodall a kmo, ng kmal diak bo le mechut er a chelsel a debull; me ng dilu el kmo: ‘Ak mo meskau a chedaol e ulterekokl el klengeltengat el mle telbilek el mor a David.’ 35E a kuk tar a bades e ng dmu el kmo, ‘Kau a diak bechere blak a rengul el mesiungem me bo le mechut er a debull.’ 36Sel taem er a David e ng milengedmokl el oltirakl er a telbilel a rengul a Dios, e sola e mlad me ng meldakl er a delongelir a rucheled, ma bedengel a mlo mechut er a debull. 37E ngdi ngikel lulekisii a Dios er a kodall a dimlak bo le mechut er a debull. 38- 39Kemiu el rokui el de chad er a Israel, bo mungil el medengei el kmo a tekoi er ousumengoit er a klengit el mosisechakl el ekor kemiu a ngar a Jesus el mei; bo modengei el kmo a re bek el oumera er ngii a mengubet er a rokui el klengit, el ngii a dimlak el sebechel a Llach er a Moses el ngubetemiu er ngii. 40Isei e bo mkerekikl, me lak letaut er kemiu a tekingir a re profet er ser a ledu el kmo: 41‘Kemiu el sekedenguul! Di bo le mechas a rengmiu e mngemed! Sel kuruul er ngii er chelechang a tar a tekoi el le ngar ngii a chad el mo smodii er kemiu me kemiu a dirrek el di diak bo moumerang!’” 42Me tia er a le tebeda er a blil ongdibel a Paulus ma Barnabas, e a re chad a ullengit er tir me sel kuk mei el Ulengull el Sils e lluut el mong e louchais er tir a lmuut el bebil er a ikal tekoi. 43Ma uriul er a le tobed a re chad er ongdibel, e te mle betok el chad er a Judea ma betok el Chisentael el mla obult el mor a klechelid er a re chad er a Judea a uleltirakl er a Paulus ma Barnabas. Ma re apostol a milengedecheduch er tir e melisiich a rengrir me di le blechoel el ngar el ngar a krasia er a Dios. 44Me tial kuk bocha le Ulengull el Sils, e a oumesingd el chad er a beluu a mlo orrenges a tekingel a Rubak. 45Ma re chad er a Judea er a lesa seked e te mlo mechechei; me te milengaititekangel er a Paulus e dirrek el millenguul er ngii. 46Ngdi Paulus ma Barnabas a mengal mlo bekeu e dilu el kmo, “Ng mlar ngii a belkul me lomuchel el mechedecheduch el ekor kemiu a tekingel a Dios, ngdi chelechal le chetimiu el nguu e momdasu el kmo a diak a ulebengelel klengar a diak le kiriu, e aki mechikemiu e mor a re Chisentael. 47Ele tiakid a tekingel a Rubak el mer kemam el kmo: ‘Ak mla tutkau el mo llomes el kirir a re Chisentael, me ke mo rolel osobel el mor a beluulchad el rokir.’” 48Ma re Chisentael er a le renges a ikang e ng mlo ungil a rengrir e chilat a tekingel a Rubak; me tirkel ngellitel el kirel a diak a ulebengelel klengar a mlo oumerang. 49A tekingel a Rubak a uleberk er sel beluu el rokir. 50Ngdi re chad er a Judea a milechelii a uldikel er a delongelir a re merreder er a beluu ma re ngarbab a deruchellir er a buai el redil el Chisentael el mengull el meluluuch er a Dios me te mocha oldechelakl er a Paulus ma Barnabas e odiketerir er a belurir. 51Ma re apostol a sirrars a chebechab er sel beluu er ocherir e mirrael el mor a Ikonium. 52A ruumerang el ngar a Antiok a kmal mle dmeu a rengrir e mlar ngii er tir a Chedaol Reng.

will be added

X\