RELLIR 12

1Tiaikid el taem e a King Herodes a mocha omuchel el oldechelakl er a re bebil er a re chad er a Ikelesia. 2Ma Jakobus el tar a Johanes a lulekodir er a saider, 3e ser a bo lodengei el kmo tial tekoi a ungil er a rengrir a re chad er a Judea, e ng mocha omdechem er a Petrus. (Ng mildechemii er a belsechel a Chedaol Sils er a Diak Omkukel Blauang.) 4Ma uriul er a ludechemii a Petrus e ng kilebsengii el lulengkar er ngii a eual cheldebechel el derteual soldau a re chedal a tar ngii. Ng millatk el mo oukerrekeriil er ngii er mederir a re chad er uriul er a Baskua. 5Me ng mlar a kelebus a Petrus e a re chad er a Ikelesia a mle blak a rengrir el meluluuch er a Dios el kirel. 6E sel kesus er uchei er a leko ng mo oltobed er ngii a Herodes el mor mederir a re chad, e a Petrus a milechiuaiu er a delongelir a re terul mengkar, e mle rrengodel er erul bombatel, e mlar ngii a re mengkar er a siseball er a kelebus. 7E a tal anghel a di dilum er ngii ma llomes a diliich er a chelsel sel le mlar ngii. E ngii el anghel a millemesim er a Petrus el olekar er ngii e dilu el kmo, “Mereched el mekiis!” Itia e a bombatel er a chimal a Petrus a di rirebet. 8E sola e a anghel a dmu el kmo, “Mutechulau e mlecha oecherem.” Me tia er a lutechulii a Petrus e lotuu oecherel, e a anghel a dula el kmo, “Mlia ikrel a bilem e mobengkek el merael” 9Ma Petrus a ulebengkel tuobed er a kelebus e ngdi dimlak lodengei el kmo tial lurruul er ngii a anghel a meral tekoi; ng ulemdasu el kmo ng tar a ues a lilsang. 10Te mlo engelakl er a kot ma ongerung el blil omengkar e mocha er a siseball el mor a beluu el deel a chesmerel, me ngiil siseball a di mle ngii el menga chesmerel me te tilobed. Te mlor a tal rael e a anghel a choitii a Petrus e merael. 11Itia e a Petrus a mocha omtab er tial tekoi el dilubech el mor ngii me ng dula el kmo, “Ak mocha medengei el kmo tia meral tekoi! A Rubak a ulderchii a anghel er ngii el me olsobel er ngak er a klisichel a Herodes ma ikel bek el tekoi el lulemdasu a re chad er a Judea.” 12Ma bocha lodengei el ua isei, e ng mlor a blil a Maria el delal a Johanes Markus, el ble le kldibel er ngii a re betok el chad el meluluuch. 13A Petrus a milelngod er a chesimer er a siseball ma tal mesiou el dil el Roda ngklel a mlong. 14Ng dilengchii a ngerel a Petrus me ng kmal mlo ungil a rengul me ng dimlak le nguu a chesimer e lmuut el remurt el mo ouchais el kmo a Petrus a dechor er rikl. 15Me te dilu er ngii el kmo, “Ke mengesengsang!” Ngdi ngii a di uluutekangel el kmo ng merang me te dula el kmo, “Ng anghel er ngii.” 16Itia e a Petrus a di milelngod er a chesimer me te mocha nguu, e mesang me ng mlo mechas a rengrir. 17Ng uleba chimal el olekebai er tir me lak longerodech, e mocha ouchais er tir er a blekerdelel a Rubak er a lotebedii er a kelebus. E dilu el kmo, “Bo mouchais a ikal tekoi er a Jakobus me tirkel bebil er a ruumerang,” e sola e ngii a tilobed e merael el ngodechii a le bor ngii. 18Ma bocha le tutau e ng mlar ngii a klou el nglemuu er a delongelir a re mengkar er a kmo, ng mlor a Petrus? 19Ma Herodes a ultebedii a tekoi me te mo osiik er ngii, ngdi dimlak el sebechir el metik er ngii. Isei e ng uluukerrekeriil er tirkel milengkar e ultebedii a tekingel el kmo te mo okodall. Uriul er itiang, e a Herodes a mlar a Judea el mor a Sesarea me ng mlar sei el telkib. 20A Herodes a kmal mle kesib a rengul er a re chad er a Tyre ma Sidon me te mlo dmak e mlo omes er ngii. Ma kot e te milengeluch er a Blastus el ngikel oungerachel er a blil a king me le ngesuterir, e sola e mlochu olengit er a budech, ele kall er a belurir a mlar a belual a king el mong. 21Ma Herodes a mililii er a bilel a king e mlo dengchokl er a kingellel er omerreder, er sel telutk el sils, e milengedecheduch er a re chad. 22Me tuleldiu el kmo, “A mengedecheduch a diak le chad, e ng chelid!” 23Itia e a anghel er a Rubak a ulsecherii a Herodes me ng mlo smecher el betok a lot er ngii e mad, ele ng ulerribech a chetengakl el mle kirel el mor a Dios. 24Seikid e a tekingel a Dios a mengal uleberk e merael el mo klou. 25A Barnabas ma Saulus er a bo le merek a urerir er a Jerusalem e te liluut el merael me te ngiluu a Johanes Markus el obengterir.

will be added

X\