RELLIR 10

1Ng mlar ngii a tal chad er a Sesarea el Kornelius a ngklel, el mle mengeteklel a cheldebechel el soldau er a Rom el “Urrurt er a Itali” a ngklel. 2Ng mle blak a rengul er a tekoi el chelid me ng ngii ma telungalek er ngii el rokir a milengull el meluluuch er a Dios. 3A tar a klebesei er a bekord edel klok er a chodechosong e ng milsa ues er a tal anghel er a Dios el mlor ngii e dmu el kmo, “Kornelius!” 4Ng mlo medakt me ng mle ngellomel er ngii e dmu el kmo, “Ng ngera e rubang?” Ma anghel a dilu er ngii el kmo, “A Dios a ungil a rengul er a nglunguchem ma omerellem er a bltikerreng me ng mla mo kldmokl el onger a nglunguchem. 5Modercheterir a re chad el mor a Jopa el mo nguu a tal chad el Simon Petrus a ngklel. 6Ngikang a ngar a blil a Simon el chad el omkar a budel a charm, el blil a ngar bita er a daob.” 7Me tia er a lorael a anghel, e a Kornelius a milkedongeterir a re teru er a re mesiungel, ma tal soldau el milsiou er ngii e blak a rengul er a chelid 8e uluuchais er tir er sel lilsang e uldercheterir el mor a Jopa. 9E a bo le kukuk me lolemolem er omerolir el mocha kmeed er a Jopa, e a Petrus a mlo ngmasech er a chado er a blai er a bekord el sueleb el mo meluluuch. 10Ngika mlo songerenger me ng sokol el mo omengur, e ngdi tia er a dirk loruul a kall, e ngii a milsa tal ues. 11Ng milsa eanged el blok e a tal ua klou el sits a mloimoim er a ikel eual ulebengelel el me metengel er a chutem. 12E mlar ngii er a chelsel a bek el bedengel a charm, a charm er a beluu, ma charm er a ralm ma daob, ma suebek el charm. 13E a ngor a millekoi el mor ngii el kmo, “Petrus, bekiis el omekoad e mongang!” 14Ngdi Petrus a dilu el kmo, “Ng kmal diak e Rubak! Ngak a kmal dirkak kkelii a ngerang el ngar a belsachel er a diak le klikiid ma lechub e ng mlukidokel.” 15Ngiil ngor a liluut el melekoi er ngii el kmo, “A ikel bla ledu Dios el kmo ng klikiid, lak momdasu el kmo ng diak le klikiid.” 16Tia mle edel le ua isei e sola e mlengai el lmuut el mor a eanged. 17Ma Petrus a dirk melechedech er a belkul ngiil ues, e tirkal chad el luldercheterir a Kornelius a mla mo medengelii a blil a Simon me te mla mong me te dechor er medal a siseball er ngii. 18Tulemekedong e oker el kmo, “Ng ngar ngii a chad el ngar tiang el Simon Petrus a ngklel?” 19Me ng dirk melasem a Petrus el omtab er a belkul sel ues el lilsang, e a Chedaol Reng a dmu er ngii el kmo, “Te ngar ngii a re tedel chad el osiik er kau. 20Mkedmeklau e bo metengel, e lak momai er a rengum el obengterir el merael, ele ngak a uleldurech er tir.” 21Mitia e a Petrus a mlo metengel e dmu er tir el chad el kmo, “Ngak ngikel mosiik er ngii. Kom mle mekerang?” 22Me te dilu el kmo, “A Kornelius el merreder er a re soldau a uleldurech er kemam. Ngii a tar a re ungil chad el mengull el meluluuch er a Dios e dirrek el kmal longull er ngii a rokui el chad er a Judea. A tal anghel er a Dios a dilu er ngii me le me lokedongau el mor a blil me bo le sebechel el remenges a ikel bo molekoi.” 23Ma Petrus a ngilititerir el mor a blai. E a bo le kukuk e ng kildmeklii e merael el obengterir; ma re bebil er a ruumerang el chad er a Jopa me tulebengkel el merael. 24Ma kuk bocha le kukuk e te mocha er a Sesarea, ma le bong e a Kornelius a mla omekedong er a re chedal ma re kmal sechelil me te kldibel el mengiil er ngii. 25Ma leko ng mochu tmuu a Petrus, e a Kornelius a ulsiueklii e mlo terrob er medal el osus er ngii. 26Ma Petrus a dilu er ngii el kmo, “Mtemetau el mo dechor. Ngak a di chad.” 27A Petrus a di milengedecheduch er a Kornelius er a lorael el mor a blai, e a bo le siseb e ng milseterir a re betok el chad el kldibel. 28Me ng dilu er tir el kmo, “Kemiu a ungil medengei el kmo ng mekull er a klechelid er a re chad er a Judea a loldingel er a re Chisentael ma lechub e le teloi er tir. Ngdi Dios a mla meketeklii el mer ngak el kmo ng diak le kirek el omdasu el bedul a ngii di le chad el kmo ng diak le klikiid ma lechub e ng mengelengalek. 29Isei a uchul me ser cho moldurech el mer ngak e ak di mlei. Mak uker er kemiu el kmo ng ngera me kom uleldurech el me melai er ngak?” 30Ma Kornelius a dula el kmo, “Ng mle ua itiaikid er a idelsebel er edel klok er chodechosong e ak mlar a blik el meluluuch, e a tal chad el oubail a medidiich el bail a di mlei el me dechor er medak 31e dmu el kmo, ‘Kornelius, a Dios a mla rongesii a nglunguchem e dirrek el mla mo medengei omerellel a bltikerreng er kau. 32Moderchii a chad el mor a Jopa el mo nguu a tal chad el Simon Petrus a ngklel. Ngika ngar a blil a Simon, el chad el omkar a budel a charm, e a blil a ngar bita er a daob.’ 33Isei e ak di mle mereched el oldurech el ekor kau, e ungiang me ke mermang. Me kemam tia er chelechang el kldibel er medal a Dios e kldmokl el mo orrenges a ikel bla ledu er kau a Rubak.” 34Ma Petrus a mocha mengedecheduch el kmo, “Ak mocha medengei el kmo a Dios a meral di osisiu er a rengul a re bek el chad. 35Ma chad er a ngii di le beluu el mengdekudel er ngii e meruul a melemalt a diak bo le chitii. 36Kemiu a medengelii a klumech el mlor a re chad er a Israel, el omerk er a Ebangkelio er a budech el okiu a Jesus Kristus el ngii a Rubak er a rokui el chad. 37Kom dirrek el medengelii sel klou el tekoi el dilubech er a beluu er a Israel el rokir, el ulemuchel er a Galilea er uriul er osisecheklel a Johanes el kirel a techolb. 38E medenge chisel a Jesus er a Nasareth ma blekerdelel a Dios er a le bsa Chedaol Reng ma klisiich. A Dios a ulebengkel me ng mirrael a bek el beluu el meruul a ungil e omekungil er tirkel rokui el mlar eungel a klisichel a Diabelong. 39Me kemam olecholt a ikel bek el le riruul er a Jerusalem ma ikel bebil er a beluu er a Israel. E sola e a re chad a dilelii er a kerus el mekodir. 40Ngdi Dios a ulekisii er a kodall er uriul er edel klebesei, e ulechotii el bleketakl, 41el dimlak bo lecholt er a ngii di le chad, ngdi mlor tirkel olecholt er ngii el bla le ngilteterir a Dios. E tia melekoi er kemam el milengang e melim el obengkel er uriul er a le bekiis er a kodall. 42Ng milskemam a ngerchelam el mo olisechakl er a re chad e mo olecholt el kmo ingii ngikel bla le tetkii a Dios el mo oukerrekeriil er a re di ngar ma re mla mad. 43A rokui el profet a milengedecheduch el kirel el kmo, a re bek el oumerang er ngii a mo musubes a kngterir el klisichel a ngklel a uchul.” 44Me ng dirk mengedecheduch a Petrus e a Chedaol Reng a metengel el mor tirkel rokui el ulerrenges osisecheklel. 45Me tirkel oumerang el chad er a Judea el ulebengkel a Petrus er a Jopa el mong a mlo mechas a rengrir el kmo a Dios a dirrek el mla otengelii a Chedaol Reng el mor a re Chisentael. 46Tulerrenges er tir el melekoi a ngodech el omelekoi e oldanges er a klou el klisichel a Dios. Ma Petrus a dula el kmo, 47“Tirkal chad a dirrek el ua ikid el mla nguu a Chedaol Reng. A le ua isei, e ng ngar ngii a sebechel el merrob er tir me ng diak bo le metecholb?” 48Itia e ng dula er tir me te metecholb el ngar a ngklel a Jesus Kristus. E sola me tullengit er ngii me le kiei el obengterir el ngma telal klebesei.

will be added

X\