3 JOHANES 1

1Ngak el oungerachel er a ikelesia a meluches el mor a betik er a renguk el Kaius, el meral betik er a renguk. 2Betik er a renguk el sechelik, ak meluluuch me di lungilbesum er a rokui el tekoi e lak bo msecher. Ak medengei el kmo ng kmal di mesisiich a rengum. 3Ng kmal mlo ungil a renguk er a be lekerd a re bebil er kid el Kristiano e louchais er ngak el kmo ng kmal blak a rengmiu el oltirakl er a klemerang, el di ua blekerdeliu el di mle blechoel el oltirakl er a klemerang. 4Ng diak a lmuut el mor uchei el odeuir a renguk el ua isel krenges el kmo a re ngelekek a oltirakl er a klemerang er a klengar er tir. 5Betik er a renguk el sechelik, kau a kmal blak a rengum er a ureor el moruul er ngii el kirir a re bebil er kau el Kristiano, el mo lmuut ma le chad er a ngodech el beluu. 6Te mla mengedecheduch er a ikelesia er tiei el kirel a bltikerreng er kau. Ak ulengit er kau me mngesuterir el melemolem er omerolir el odeuir a rengul a Dios. 7Ele te mirrael el kirel omesiungel a Kristus, e dimlak a ngesou el lolai er a re diak loumerang. 8Me kid el Kristiano a kired el olengeseu er tirkal chad, me bo dobengterir er a urerir el kirel a klemerang. 9Ak milluches er a kedeb el babier el ekor a ikelesia; e ngdi Diotrefes, el soal el oumerreder er ngii, a diak le telkib el orrenges a ikel kulekoi. 10Me sel kikong, e ak mo masech a ikel rokui el bla le bor ngii, a ikel mekngit el tekoi el lolekoi el kiram ma blulak el louchais! Me ng ua isei e dirk olengesonges er a rengul a ikel omerellel; ng diak lometechakl er a re bebil er kid el Kristiano sel le mei, e merrob er tirkel sorir el melai er tir, e melasem el oltobed er tir er a ikelesia! 11Betik er a renguk el sechelik, lak mosuub a ikel mekngit el omeruul e bai moruul a ikel ungil. Ngikel meruul a ungil a chedal a Dios; e ngikel meruul a mekngit a dirkak lesa Dios. 12A re bek el chad a melekoi a ungil el kirel a Dimetrius; ma klemerang me ng di ngii el dmu ungil el chisel. E ngak mak mo dmu osisiu el ungil el tekoi el kirel, e kemiu a medengei el kmo ak melekoi a klemerang. 13Ng kmal betok a soak el ouchais er kau, e ngdi diak el soak el meluches. 14Ak umdasu a bai orreched el eko mesekau, me bo le sebeched el chachedecheduch. 15A budech lekor kau. A re sechelim el rokui a melekoi a yorosku el ekor kau. Mdu yorosku er a re sechelid el rokui.

will be added

X\