2 TIMOTHY 3

1Mutebengii tial tekoi el kmo, ng mo medbedubech a ikel mor ngii a ringel er ngii sel bo lekeed a ulebongel er a beluulchad. 2Ele re chad a di mo omdasu er a di tir, e di sorir a udoud, e di oumead er tir e ngarbab a rengrir; te mo mekngit a ngerir el mor a re chad, e diak lorrenges a tekingir a re demerir ma re derrir, e diak loreng a saul, ma diak le sorir el melatk er a chelid. 3Ng mekngit omerellir el mor a re chad, e diak lousubes a telemellir a re chad; toltuub er a re chad, e mekngit a blekerdelir, e bekeu el sorir el omekcharm er a re chad, e ouketui a ungil tekoi. 4Te cheblad, e meterkakl el diak lomekerreu, e belkuuk er a kldidairreng, e kuk sorir a tametereng el ngar uchei er a Dios. 5Te di oubail er a leko te chedal a chelid e diak er omerellir ochotel a klisichel a klemerang el lodengei. Mongeroid er kau er a re ua isei el chad. 6A re bebil er tir a mo soiseb a blirir a re chad el oumerreder er tir er a re mechitechut a rengrir el redil, el oberaod a rengrir er a kngterir, e obebesiur er a bek el bedengel a tekoi el soal a klechad er tir, 7e di blechoel el sorir el orrenges a ngii di losisechakl e diak el sebechir el suubii a tal klemerang. 8Tirkal chad el mirruul a chelbirukel el tekoi, e meruul er tir el leko toumerang, e a mera er ngii a diak, tirkaikid a omtok er a klemerang el di ua ia Janes ma Jambres er a lomtok er a Moses. 9Ngdi diak el sebechir el kelekall el ua isei, ele ng diak le meketeket e a re bek el chad a mo omes ochotel a klebelngerir el di ua ia Janes ma Jambres. 10Ngdi kau itia er cho moltirakl a osisecheklek, ma blekerdelek, me sel kultoir er ngii er tial klengar; e ulemes er ngak er a kuumerang, e le klou a renguk, e kuubltikerreng, e kumekduch er a renguk, 11e miles a odechelakl el mer ngak ma ringelek, ma ikel tekoi el dilubech el mer ngak er a Antiok, ma Ikonium, ma Listra, el kmal mle meringel el odechelakl el blo kcharm er ngii, e ngdi Rubak a di ulsebelak er ngii el rokui. 12Ng ua isei; tirkel rokui el kmal sorir el mo ungil chedal a chelid, el oltirakl er a Kristus Jesus a mo metik odechelakl, 13e a re mekngit el chad ma re chad el omerk a diak le meral osisechakl, a mekngit e merael mengal mo mekngit; te mengeblad er a re chad e di tir el mecheblad. 14Ngdi kau, bo mesisiich el ngar a ikel bla msuub el msal oumerang, ele kungil medengei el kmo te rua techa ullisechakl er kau, 15e kau itia er a cho modengei a Chedaol Llechukl er cho mkekerei el me klou, el ngii ia sebechel el mekllemesii a rengum e orolau el mo oumerang er a Kristus Jesus me ke mo suobel. 16A Dios a dilokou a Chedaol Llechukl el rokui er a dingerir a re milluches, el kired el olab el olisechakl a klemerang, e mellach, e mesmechokl, e olecholt a meral rolel a ungil klengar, 17me bo le sebechel a chad el ungil kldmokl e ulsemuul el kirel a bek el ungil ureor.

will be added

X\