2 TIMOTHY 2

1Me kau bo mesisiich e rungalek el ultuil er a krasia er a Dios el ekor kau el okiu a Kristus Jesus, 2ma ikel osisechakl el mrirenges er ngak er mederir a re betok el chad mngai el oterekokl er tirkel blak a rengrir el chad el dirrek el sebechir el mo olisechakl er a re bebil. 3E mdirrek el chuarm er a ringel el ua ungil soldau er a Kristus Jesus. 4A soldau el oureor, a diak longesengsang er ngii er a tekingir a re di chad el diak le soldau, ele ng soal di kldmokl el mor a ikel lomdasu a merreder er ngii. 5A chad er a klekool a diak el sebechel el nguu a nguked a lak loltirakl a rokui el llechul a klekool. 6Ngikel chad er a sers el meringel el oureor a kirel el mo ngma ruklel er a kot el omelai el rodech er a sers. 7Bo mungil el omdasu a ikal kulekoi, ele Rubak a mo ngosukau el mtab a rokui el tekoi. 8Lak mobes er a Jesus Kristus el mlokiis er a kodall, el uldidellel a rsechel a David, el ua isel Ungil Chais el kullisechakl er ngii. 9Tiaikid el Ungil Chais el kullisechakl er ngii a uchul mak chuarm, e llechotel el di ua chad el melemall a llach. Ngdi Tekingel a Dios a diak le llechotel. 10Misei e ng mo meduch a renguk el outekangel a rokui el tekoi el kirir a re ngellitel el chedal a Dios, me bo le sebechir el mo suobel a loumerang er a Kristus Jesus me bo le nguu a diak a ulebengelel klengar el obengkel a Dios. 11“Tial omelekoi a merang el kmo: A lsekum kede mla mad el obengkel, e kede dirrek el mo ngar el obengkel; 12a lsekum kede mekduch a rengud, e kede dirrek el mo mengedereder el obengkel. A lsekum kede mo oumededenger er ngii, e ng dirrek el mo oumededenger er kid. 13A bo lak le blak a rengud er ngii, e ngii a melemolem a telbilel, ele ng diak el sebechel el mo ngodech.” 14Momeklatk er tir er tial tekoi, e mongelechel er tir er medal a Dios el kmo, lak mongaititekangel a tekoi, ele ng diak a klungiolel e bai di mo melemall er tirkel orrenges. 15Bo le blak a rengum el mo ungil er medal a Dios, el ua chad er a ureor el diak a ngeral omekrur er ngii er a urerel, e melemalt a losaod a klemerang el lolisechakl. 16Mongeroid er kau er a chelsengsang el omengaititekangel, ele ng di orriid er a re chad el mengal mo cheroid er a Dios, 17e a cheleuid el osisecheklir a ua ia kltkat el diak bo le mechubs. A Himeneus ma Filetus a bebil er tir, 18el mla choitii a klemerang ele tousbech el kmo a okiis er a re mla mad a mla mo merek el tar a tekoi, me te melemall er a re bebil er a re chad er a ikel loumerang. 19Ngdi mesisiich el omekedecheraol el bla luchetemii a Dios, a diak lolmesim, e llechukl tiakid el olangch er ngii el kmo, “A Rubak a medengelterir a re chedal,” me tiang el kmo, “Tirkel rokui el omekedong er a ngklel a Rubak bo longeroid er tir er a klengit.” 20A klou el blai a diak di le ngar ngii er ngii a blil a klalo el rruul er a kolt ma lechub a silber e le merekong, ng dirrek el ngar ngii er ngii a rruul er a kerrekar ma rruul er a chutem, e a bebil a kirel a ileakl el mechesang e a bebil a kirel a tekoi er a bek el sils. 21A lsekum a chad a omekiai er ngii er a ikal cheleuid el osisechakl, e ng mo ua ikel blil a klalo el ileakl a usbechel, e ngii a mechedaol e meakl el bo lousbech er ngii a merreder er a blai, el di kldmokl el kirel a bek el ungil el ureor. 22Mongeroid er kau er a ngibeserreng er a klengeasek e molekeed er kau er a ungil blekeradel ma reng el oumerang, ma bltikerreng, ma chelellakl el reng, kau me tirkel meral ngar ngii er a rengrir omekedong er a Rubak. 23Lak mongesechusem er kau er a chelsengsang el diak a belkul el klaititekangel; ele ke medengei el kmo ng di omuchel a klautoketok. 24A mesiungel a Rubak a diak le kirel toketok. Ng bai ungil er a re bek el chad, e meduch el olisechakl, e klou a rengul; 25ng medemedemek a ngerel a losmechokl er tirkel omtok er ngii. A lta e a Dios a mo kongei me tobult e mo medengelii a klemerang, 26me te mekar e mo sebechir el chemiis er a bedeklel a Diabelong, el millai er tir el mo meruul a ikel soal.

will be added

X\