2 TIMOTHY 1

1Ngak el Paulus el apostol er a Kristus Jesus el oltirakl er a uldesuel a Dios, el kirek el mo omerk a chisel sel klengar el le dilu Dios el kmo ng mo meskid a bo doltirakl er a Kristus Jesus, 2A meluches el ekor kau e Timothy, el betik er a renguk el ngelekek el kmo: A Dios el Chedam ma Kristus Jesus el Rubak er kid, le beskau a krasia, ma klechubechub, ma budech. 3Ak mereng a sulel ngii el kusiou er ngii el kmal blak a renguk el di ua re demak er a irechar. Ak mereng a sulel a Dios sel kululuuch el kirem er a llomes ma klebesei. 4Sel kulatk a iuechel a medam, e ak uureng el leko di kisekau, me lesal mo ungil a renguk. 5Ng diak kubes er kau el kmal blak a rengum el oumerang er a Dios el di ua ia delal a delam er a Lois ma delam er a Eunice. Ak medengei el kmo ke meral di ua itir cho moumerang. 6Mak umeklatk er kau el kmo, lluut el kmal mo blak a rengum el ousbech er a sengk er a Dios el le bilskau er ser a kbor a chimak er bebum. 7Ele reng el le bilskid a Dios a diak le rellid el mo medakt, ng bai meruul er kid el mo mesisiich e oubltikerreng, e ulserechakl a rengud. 8Me lak bo merur el omerk a chisel a Rubak er kid, ma ka merur er ngak el kelebus el ngii a uchul, e bai bo mua ingak el chuarm el kirel a Ebangkelio, e a Dios a mo melisiich er kau el kirel. 9Ng ngii el Dios a ulsebelid e milekedongid el eklid el mo chedal, el dimlak lungil el omerelled a uchul, ng bai di mle uldesuel a rengul ma krasia er ngii. Ng milskid ngiil krasia er a ngar a mong el uleak a Kristus Jesus, 10e chelechang e ng chemotang er a le mei a Osebeled el Kristus Jesus, el mlo mesisiich er a kodall e ochotii a diak a ulebengelel klengar el okiu a Ebangkelio. 11A Dios a tiltkak el mo apostol el mo omerk e olisechakl er tial Ungil Chais, 12misei ia uchul mak ua isei el chuarm. Ngdi ngak a diak kmerur, ele kmedengelii ngikel kuumerang er ngii, e ulterkokl el medengei el kmo ng sebechel kokar el mo lmuut er a ulebongel el Sils a ikel bla loterkokl er ngak. 13Moltirakl er sel melemalt el osisecheklel a Ungil Chais el bla mrengesii er ngak, e molemolem el oumerang e moubltikerreng el oltirakl er a Kristus Jesus. 14Mongkar a ikel klemerang el mloterekokl er kau el oeak a Chedaol Reng el kiei er a chelsed. 15Kau a medengei el kmo a rokui el ngar a Asia a chilitak, e a Figelus ma Hermogenes a bebil er tir. 16A Rubak bo lomekngeltengat er a telungalek er a Onesiforus, ele ng mle blechoel el melisiich er a renguk. Ng dimlak le merur er ngak el kelebus, 17me ser a le mei er a Rom, e ng di kilerd e mo osiik er ngak el mol me metik er ngak. 18A nglunguchek a kmo, a Rubak bo lomekngeltengat er ngii er a ulebongel el Sils, e kemiu a ungil medenge ikel rokui el omerellel er a lolengeseu er ngak er a kngar a Efesus.

will be added

X\