2 THESALONIKA 3

1E a orekil a tekingek kemiu el odam er kemam a kmo, moluluuch el kiram ma tekingel a Rubak lolemolem el di mereched el oberk e le nga chetengakl er tiei el ua ia le ngar tilechang. 2Kom dirrek el meluluuch ma Dios le sebecheklemam er tirkel mekngit e chebirukel el chad, ele ng diak le rokui el chad a oumera tekingel a Dios. 3Ngdi Rubak a kmal diak lechitid me ng mo melisiich e mengkar er kemiu er Ngikel Mekngit. 4E kemam a ultuil er a Rubak e kmal oumera el kmo, kemiu a melemolem el meruul a ikel kim dilu er kemiu. 5Ma Rubak bo losiur a rengmiu el mo ungil medengelii a bltikerreng er a Dios ma ducherreng el ngar a Kristus el mei. 6Rudam er kemam, aki mellach er kemiu el oba ngklel a Rubak er kid el Jesus Kristus, me mongeroid er kemiu er tirkel rokui el mesaik el bebil er kid e diak lolab a ikel tekoi el kim dilu er tir. 7Kom ungil medengei el kmo, ng kiriu el mo ua ikemam er a kim ngar tilechang el dimlak kim mesaik. 8Ng dimlak ki di mullai a kall er a re chad el mer kemam el diak kim omechar, ng bai mle blak a rengmam el oureor er a llomes ma klebesei el kirel a siungam, me lak bo kimongesang er kemiu. 9Ng dimlak le mekull a kimolai a ngera er kemiu, ngdi bai mle somam cho msubii tial omeruul el ki blar ngii. 10Ser a kim ngar tilechang e aki mle mekudem el melekoi er kemiu el kmo, “Ngikel chetil el oureor a diak le kirel el omengur.” 11Aki millekoi el ua isei ele ki rirenges el kmo, te ngar ngii er a delongeliu a re mesaik me te di kiei el diak a ngeral loruul e di mengesengsang e mengesang er a re chad. 12Maki oba ngklel a Rubak el Jesus Kristus e melekoi e mengelechel er tir me bo lak le ua isei, e bo le chelellakl a blekerdelir e loureor el mengerker el mesiou a delengcheklir. 13Ngdi kemiu a re Kristiano, lak bo mesaul el meruul a ungil. 14A le ngar ngii a chad el diak bo lolengesenges a ikal kimolekoi el ngar tial babier el ekor kemiu, e bo modengelii e mongeroid er kemiu er ngii, me di le ngii el mo merur. 15Ngdi lak momasech er ngii el cherrouiu, e bai momeklatk er ngii el odam er kemiu. 16A Rubak el uchul a budech, di le blechoel el meskemiu a budech er a ngii di le tekoi. A Rubak bo lobengkemiu el rokui. 17Ak di oba chimak el meluches er tial kmo: Ngak el Paulus a ouetkeu er kemiu. Tiaikid a teletelel sel kurekui er a babilengek. 18A krasia er a Rubak er kid el Jesus Kristus bo lobengkemiu el rokui.

will be added

X\