2 THESALONIKA 2

1Chelechang, e a kirel sel le mei a Rubak er kid el Jesus Kristus, me kid bo de mekideb el rokui el mo obengkel, e ak ulengit er kemiu el odam er ngak el kmo, 2lak di le mereched el mo rrau a rengmiu e bo le sebek a rengmiu a le bor ngii a omelekoi el kmo a Sils er a Rubak a mla mei. A lsekum ng ngar ngii a rumdasu el kmo aki ulemlaoch, ma lechub e aki ullisechakl, ma lechub e aki milluches el kmo a Sils er a Rubak a mla mei, 3e ak ulengit me lak a chad el mo chobeldkemiu er a ua isel tekoi, ele uchei er a le mei a Sils er a Rubak e ng ma kot el mor ngii a utekengel a Dios, e ng me duum Ngikel Mekngit el ngii a mla moterekokl el kirel el mor a beluu er a ngau. 4Ngkang a mo omtok a ikel bek el louchelid e mengull a re chad el tekoi, e di ngii el mo rullii el mo ngarbab er a ikal rokui, el mo lmuut er a Templo er a Dios me ng mo dengchokl er ngii el leko ng Dios. 5A ika kom mla obes? Ak kor a millekoi er kemiu a ikal rokui er ser a kngar tilechang el obengkemiu? 6Chelechang e ng dirk ngar ngii a merrob er ngii e kemiu a ungil medengelii. Ngdi sel le bor sel telutk el belsechel e Ngikel Mekngit a me duum. 7Omerellel a mekngit a mla mor ngii el bo dodengei el okiu a bla locholt a Dios, ngdi ikel tekoi el kirel el mor ngii a diak le bor ngii el dimerkmo le mengai el mo cheroid ngikel merrob. 8E Ngikel Mekngit a me chemolt, e ngdi sel le mei a Rubak el Jesus e ng mekodir el oba telil e mo okngemedii a klisichel el oba klebkellel sel be ledum. 9A le mei Ngikel Mekngit e ng mo oba klisichel a Satan el meruul a bek el bedengel a diak le meral olangch ma ongasireng el tekoi. 10Me ng mo olab a bek el bedengel a cheleblad el mengeuid e mengetikaik er tirkel mo remiid, ele ng dimlak le sorir el kongei el mo oumera er a klemerang me bo lesobel. 11Misei ia uchul ma Dios a kongei a mesisiich el ongeuid el rulleterir el mo oumerang a blulak el tekoi. 12E a ulebongel e tirkel rokui el diak loumera er a klemerang e sorir el oldeu a rengrir er a klengit a mo chelebangel er a kerrekeriil. 13E ngdi kemam a kiram el di blechoel el mereng a sulel a Dios el kiriu kemiu el odam er kemam, ele Dios a ngileltemiu er a kot el uchul el mer chelechang el kiriu el mo suobel el okiu a omengedolel a Chedaol Reng, e mo oumera er a klemerang. 14Ma Dios a ulekiu tial Ungil Chais el kim uleba el olisechakl er ngii er kemiu e milekedongemiu el mo melai a dikesiu er a klebkellel a Rubak er kid el Jesus Kristus. 15Ma le ua isei e kemiu el odam er kemam, bo mesisiich el oumerang e moreked a ikel klemerang el kim ulsisecheklemiu er ngii el ulekiu a tekingam ma babilengam el ekor kemiu. 16Ma Rubak er kid el Jesus Kristus ma Dios el Demad el mle betik a rengul er kid me ng uleak a krasia er ngii el meskid a klisichel a rengud ma ultebechel el omelatk, 17lukduch e lesisiich a rengmiu me di bo blechoel el meruul a ungil e molekoi a ungil tekoi.

will be added

X\