2 THESALONIKA 1

1Ngak el Paulus ma Silas ma Timothy a meluches el ekor a re chad er a ikelesia el ngar a Thesalonika, el chedal a Dios el Demad ma Rubak el Jesus Kristus el kmo: 2A Dios el Demad ma Rubak el Jesus Kristus le beskemiu a krasia ma budech. 3Kemiu el odam er kemam, ng kmal melemalt el tekoi a di ki blechoel el mereng a sulel a Dios el kiriu, ele kom kmal merael el mo mesisiich el oumera er a Dios, ma bltikerreng er a delongeliu a di merael el mo klou. 4Tiaikid a uchul maki blechoel el ouchais a bek el ikelesia er a Dios el kmo ng kmal meduch a rengmiu e oumera er a Dios er a chelsel a ringel ma odechelakl el mcharm er ngii. 5A ikal rokui a mo ochotii el kmo ng melemalt a loukerrekeriil a Dios, me kemiu a mo rredemelel a Rengedel a Dios, el ngii cho mcharm el kirel. 6Ma Dios el melemalt a loruul el tekoi a mo mechititerir tirkei el omekcharm er kemiu me te mo chuarm, 7e kemiu el ngar a ringel me kemam a di dul mo ngma ulengelled, sel be ledum el ngar a eanged el mei a Rubak el Jesus ma re mesisiich el anghel er ngii, 8el ngar a kerdel a ngau, el mo omals er tirkel chetirir el mengull er a Dios ma re dimlak bo loltirakl a Ungil Chais el chisel a Rubak er kid el Jesus. 9Te mo chuarm er a belsir er a chelebuul el diak a ulebengelel el mo cheroid er medal a Rubak ma klebkellel a klisichel, 10sel le mei er isel Sils a Jesus el bo longebkall e oldanges er ngii a re chedal el tir el rokui el oumera er ngii. Kemiu me kom dirrek el mo obengterir ele kom mlo oumerang a osisechakl el kim uluuchais er kemiu. 11Tiaikid a uchul maki blechoel el meluluuch el kiriu, ma Dios er kid bo le rellemiu el mo rredemelel sel klengar el lulemekedong er kemiu el mor ngii. A Dios bo loltaut a rokui el urunguliu el meruul a ungil el oeak a klisichel, e leruul omerelliu el mo cherrungel. 12A bo le ua isei, e kom rullii a ngklel a Rubak er kid el Jesus el mo ngma klebkall er a delongeliu; me kemiu a mo ngma klebkall er ngii, el krasia er a Dios er kid ma Rubak el Jesus Kristus a uchul.

will be added

X\