2 PETRUS 2

1A re diak le meral profet a dilum er a delongelir a re chad, me te dirrek a re diak le meral chad er osisechakl el mor ngii er a delongeliu. Te mo melemall e mengeuid osisechakl, e mengoit er a Rubak el ulsebelterir, me te di tir lochau a tellemall el mereched el mor tir. 2Te betok er tir a mor a delengerenger ma deleboes; me ng ikeikid el omerellir a mo uchul e a re chad a mo melekoi a mekngit el kirel a Rael er a klemerang. 3Ng recherchel a rengrir a uchul e tirkaikid el diak le meral chad er osisechakl a mo mengerker er kemiu el olab a ikeikid el delbochel el tekingir. Ng kmal meketeketang er a le kldmokl a belsir el mengiil er tir, me ngikel mo Melemall er tir a kmal di mekar! 4A Dios a dimlak le bechititerir a re anghel el mlor a klengit, e bai milengoit er tir er a beluu er a ngau, el le chelsimer er ngii er a ilkolk e mengiil er sel Sils er a Kerrekeriil. 5A Dios a dimlak le becherei a beluulchad er a irechar, e bai ultengelii a eeleb el mer tirkel chad el diak loumerang er a Dios; ng di mlo tal Noah el olechotir a re chad el ungil er a rengul a Dios, ma re teuid el chad a lulsebelterir. 6A Dios a dilebeklii a beluu er a Sodom ma Gomora, e ulekngemed el oba ngau, e riruul ngiil beluu el mo olachidnger el mor tirkel chad el diak loumerang er a Dios. 7Ng ulsebelii a Lot, el ungil chad, el kmal mlo chuarm er a delengerenger ma deleboes el di le ngar ngii a re diak le llechuul chad. 8Ngikelungil chad a kiliei er a delongelir, e kmal mlo imis el chuarm er a bek el sils er a mekngit el omerellir el lulemes e ulerrenges. 9Ma le ua isei e a Rubak a meduch el olsobel er a re chad el mengull er a chelid er a ringelir, e mengesimer er a re diak longull er a chelid me te kelebus e mengiil er sel Sils er a Kerrekeriil, 10e a ngar uchei, e ng mo meringel el omals er tirkel di oltirakl el meruul a mekngit el tekoi er a ngelbesel a bedengir e diak lomekerreu er a re merreder. Itirkal diak le meral chad er osisechakl a bekeu e mekedidai a rengrir, e diak longull er a re chetengakl el ngar a eanged; e bai oltuub er tir. 11E a re anghel el kuk lmuut el mesisiich er tirkaikid el diak le meral chad er osisechakl, a diak loltelechakl e loltuub er tir er medal a Rubak. 12Ngdi tirkal chad, a ua ise blekerdelir el di ua omerellel a tebelik el charm, el di mechell e kired el mo omdechem e omekoad; te di omtok el oltuub a ngii di le ngerang el diak lodengei. Te mo nguemed el di ua ia tebelik el charm, 13e mo chuarm er a ringel el ua ia ikel ringel el lulemuchel. A deuil a rengrir, a meruul a ngii di le ngerang el soal a bedengir a le cheldecheos; tomekrur e mengidokel a blengur el moruul sel lekong el mo teloi er kemiu, e di melemolem el oldeu a rengrir er a ikel cheleblad el omerellir! 14Ng diak a ngodech el sorir el omes, te di oltaut osengir er a re dengerenger el redil; e a klengerengerir er a klengit a diak bo le chelellakl. Te mengetikaik er a re mechitechut a rengrir el chad el mor a bedikl. Te mla mo smau er a nglemokel el reng. Te delebeakl er a Dios! 15Te mla choitii a melemalt el rael e mecheuid er a rael; toltirakl er a rolel a Balam el ngelekel a Beor, el mle soal a udoud el bo lolai el kirel omerellel a mekngit 16me ng mlechokl el kirel a kngtil. A chermel donkey a milengedecheduch el ua ngerel a chad el merrob a klebelung el omerellel. 17Tirkal chad a ua medidirt el omoachel, e ua eabed el loloko a eolt el mol mei; a Dios a mla kudmeklii a kirir el mor ngii er a mesechesechel a ilkolk er a datk. 18Te melekoi a ngarbab e chelsengsang el tekoi, e ousbech a ngibes er a deleboes el omedikl er tirkel dirk ulemuchel er a rolel osobel, el tilobed er a delongelir a re chad el ngar a cheleuid el tekoi. 19Te melekoi er tir el kmo te mo mimokl, e tir a di sibil a klengit el di melemall er tir, ele chad a sibil a ngii di le ngerang el mla mo merreder er ngii. 20A lsekum a re chad a mo medengelii a Rubak el Osobel el Jesus Kristus, me te suobel er a ikel klisiich er a chelsel a beluulchad el di melemall er tir, e sola e lmuut el obedikl e mo mechitechut er ngii el osisiu el tekoi, e a blekerdelir itirkeikid el chad er a ulebongel a lmuut el mo mekngit er ser a uchelel. 21Ng bai kuk mle ungil a lemlak bo lodengelii a rael er a llemalt er a bo lodengelii e lluut el mo imikr a ikel chedaol tekoi el le bilsterir a Dios. 22A ikel le blor ngii ochotii el kmo ng merang sel belkul a tekoi el kmo: “A bilis a lmuut el mor a mdechel” ma “Babii el mla metecholb a lmuut el mo mengad er ngii er a dechudech.”

will be added

X\