2 PETRUS 1

1Ngak a Simon Petrus, el mesiungel e apostol er a Jesus Kristus, el meluches el ekor tirkel oeak a llemeltel a Dios er kid ma Osobel el Jesus Kristus e mlo oumerang er a kmal klou a ultutelel el tekoi el ua ikid. 2A krasia er a Dios ma budech el ekor kemiu, ele kemiu el mla mo medengelii a Dios ma Rubak er kid el Jesus. 3A Dios a ulekiu a klisichel e mla meskid a ikel rokui el dousbech el mo kirel a klengar er kid el mo mengull er a chelid, el oeak a klaodengei er kid er ngikel ulemekedong er kid el mo ngma dikesed er a klungiolel ma klebkellel. 4Ng uleak itiaikid el meskid a ikel meklou e mekreos el sengk el le tilib el mo omeskid, me bo doeak a ikaikid e bo le sebeched el olechib er kid er a ikel ngelbesel a klechad el mo tomellid er tial beluulchad, e bai bo denga dikesed er a klengar er a Dios. 5Tiaikid a uchul e bo le meduch a rengmiu el odekiar a cho moumera er ngii er a Dios er a kldung, e modekiar a kldung er a klemedengei er kemiu, 6e modekiar a klemedengei er kemiu er a ultebecherreng; e modekiar a ultebecherreng er a telekangel; e modekiar a telekangel er a omeluu er a Dios; 7e modekiar a omeluu er Dios er a ulekerreu el mor a re bebil er kemiu; e modekiar a ulekerreu el mor a re bebil er kemiu er a bltikerreng. 8A ikakid a ungil el blekeradel el mousbech, e a lsekum kom mo mesisiich er a ikaikid, e ng mo rullemiu el mo meses e mor ngii a cho moruul, el ochotii a kmo kom medengelii a Rubak el Jesus Kristus. 9Ngdi ngikel diak le ngar a ikaikid a kmal kedeb osengel, me ng diak el sebechel el mesa ngerang e obesol kmo ng mla mekikiid er a mla me mol kngtil. 10Ma le ua isei e rudam er ngak, e lluut el mo meduch a rengmiu el oltirakl er a Dios el milekedongemiu e ngiltemiu el mo chedal, me lak bo mcheroid er ngii; e cho bo mua isei e ng diak bo lak moumerang. 11Iseikid e ng mo klou a llemeltiu el mo soiseb er a diak a ulebengelel Rengedel a Rubak er kid e Osebeled el Jesus Kristus. 12Ak medengei el kmo kom mla mo medengei a ikal tekoi e mesisiich el oltirakl er a klemerang el cho mngiluu, e ngdi ngak a mo blechoel el omeklatk er kemiu er ngii el tekoi. 13Ak umdasu e ng diak le metacherbesul a di kumeklatk er kemiu er a klteketel a kchad. 14Ak medengei el kmo ng di kmedang e ak mo mecherei tial mo metemall el bedengek, el ua ikel ble le bleketakl el dmu er ngak a Rubak el Jesus. 15Mak mor a ikel sebechek el mo sikii a rolel e ng mo sebechiu el di blechoel el melatk a ikal tekoi er uriul er a kodellek. 16A ikel kim uluuchais er kemiu el chisel a le mei a Rubak er kid el Jesus Kristus el oba klou el klebkellel, a diak le delbochel el chais el kim rirenges er a kmo ng ker. Aki bai ulemes er a medemam a klebkellel. 17Ele Dios el Chedam ser a lodengesii e le kebkelii ma ngor el mlar a Merreder er a Klebkall le blor ngii el kmo, “Ngkaikid a betik er a renguk el Ngelekek, el odeuir a renguk,” 18e aki rirengesii itial ngor el mlar a eanged el mei, er a kim obengkel el ngar sel chedaol rois. 19Maki lmuut el mengal mla mo ultebechel er a rengmam a klumech el luluuchais a re profet. Ng mo ungil kiriu a cho bo mungil mtebengii tiang; ele ng ua olbidel el omeklomes er a milkolk, el dimerkmo le metetekakl a llomes me be ledum a llemesel a Kristus, el ua chemeraech el dmiich er a chelsel a rengud. 20A kot e ng kiriu el mtebengii tial kmo, ng diak a ulaoch er a Chedaol Llechukl el sebechel a chad el di ngii el smaod, 21ele ng dimlak a tal ulaoch el mei el di uleak sel soal a chad. Tirkel chad el uluuchais a klumech el mlar a Dios el mei a meltuchel er a Chedaol Reng er a lolekoi.

will be added

X\