2 JOHANES 1

1Ngak el oungerachel er a ikelesia, a meluches el mor a betik er a renguk el Redil el ngellitel er a Dios ma re ngelekel, el meral betik er a renguk. Ng diak di le ngak el tang e merekong; tirkel rokui el medengelii a klemerang a dirrek el betik a rengrir er kemiu, 2ele klemerang a ngar a rengud e di ngar kid el diak a ulebengelel. 3A Dios el Chedam ma Jesus Kristus el Ngelekel a Chedam le beskid a krasia ma klechubechub ma budech me bo dolab el ngar a klemerang ma bltikerreng. 4Ng kmal mlo ungil a renguk er a bo kudengei el kmo a re bebil er a re ngelekem a oltirakl er a klemerang er a klengar er tir, el di ua ikel le dilu Chedam el kmo ng kired el ngar ngii. 5Ma kulengit er kau el betik er a renguk el Redil el kmo: bo de kaubltikerreng el rokui. Tia diak le beches el tekoi el kungelechel er ngii er kemiu; ng tekoi el dulebang er a uchelel el mei. 6Tiaikid el bltikerreng el kulekoi er ngii a belkul a kmo ng kired el oltirakl a tekingel a Dios. Ng di ua ikel tekoi el cho mrirenges kemiu el rokui er a uchelel el kmo, ng kiriu el rokui el oubltikerreng. 7Te betok el cheblad el chad a mla mo merael el omerk er a beluulchad el rokir, el tir el chad a diak loumera el kmo a Jesus Kristus a mlo chad el ua ikid. Ngikel ua isei el chad a mengeuid er a re chad e Cherrouel a Kristus. 8Bo mkerekikl me lak kom metom a ikel kim uluureor el kirel, e bai bo mnga omeksulliu el rokui. 9Ngikel diak lolemolem el oltirakl er osisecheklel a Kristus e mo engelakl er ngii a diak a Dios er a rengul. E ngikel melemolem el oltirakl er ngii el osisechakl a ngar ngii a Chedam ma Ngalek er a rengul. 10Ma le ua isei, e a le ngar ngii a chad el mer kemiu el diak loba tial osisechakl, e lak molsiseb er ngii er a blimiu; ma ka moutkeu er ngii. 11Ele ngikel outkeu er ngii a mo kldemel er a ikel mekngit el tekoi el loruul. 12Ng kmal betok a tekingek el ekor kemiu, e ngdi bai diak el soak el meluches er a babier; ak bai melatk a eko mesekemiu er a medak e de chachedecheduch, me lesal mo ungil a rengud. 13A re ngelekel a betik er a rengmiu el ngellitel Redil el tar kemiu a melekoi a yorosku el ekor kau.

will be added

X\