2 KORINTH 8

1Rudam, ng somam a cho bo modengelii a krasia er a Dios el mor a ikel ikelesia er a Masedonia. 2Te kmal mlo chuarm er a ringel el mlor tir, e kmal di mle ungil a rengrir; te kmal mle chebuul, e kmal di mle bekerurau er a tengetengir. 3Ak subedemiu el kmo te millenget el kmal mlor a ikel sebechir, e bai mlo engelakl er a ikel sebechir. Ng kmal di mle tir 4e kmal mle blak a rengrir el olengit er kemam me bo le sebechir el dirrek el olengeseu er a re chedal a Dios el ngar a Judea. 5Te kmal mlo engelakl er a ikel kim ulemdasu! Ma kot e tuleldars a klengar er tir er a Rubak, e sola e ulterkeklterir ku er kemam el oltirakl er a soal a Dios. 6Me chelechal bla luchelii tial skel a ulengesuil a bltikerreng er a delongeliu a Titus, e aki kmal ullengit er ngii me ng lomelemii el mor a ulebengelel. 7Kemiu a kmal ngar uche er a rokuil tekoi: cho moumerang, ma ikel cho molekoi, ma ikel cho modengei, ma blakerreng er kemiu el olengeseu, ma bltkil a rengmiu er kemam. Me ng kmal somam cho mdirrek el mor uche er itial ulengesuil a bltikerreng. 8Ng diak kulekoi el ua isei el orrimel er kemiu. Ak di ullecholt er a blekeruraurreng er a re bebil er a re chad, el omeskemiu a techelliu me kom ochotemiu el kmo ng dirrek el meral ngar ngii a bltikerreng er kemiu. 9Kom medengelii a krasia er a Rubak el Jesus Kristus. Ng kmal mle ungilbesul, e rirellii el mo chebuul el kiriu, ma chelebulel a mo uchul e ng mo ungilbesmiu. 10Ma uldesuek el kirel tiang a kmo ng bai ungil a cho moutekangel el rokir tial cho mulechelii er tial mlo merek el rak. Ng kemiu a mle kot el mechelii omelai el tenget, e kmal mle blak a rengmiu el kirel. 11Me mlemelemii cho moruul er ngii, e mrekir. Bo le blak a rengmiu el kirel, el di ua iser cho molib el omuchel er ngii, e di bor a ikel sebechiu. 12Ele le ngar ngii er a rengmiu a meruul er ngii, e a ikel ngar ngii er a chad a kmal di ungilbesul er a Dios, ele ng diak longerechir er a diak er a chad. 13Ngak a diak kulasem el mengebekakl er a re bebil, e kumekcharm er kemiu; ng kiriu el di osisiu. 14Me chelechang el lungilbesmiu, e mngesuterir tirkel metacherbesrir, me sel kuk bo le metacherbesmiu, e le ngesukemiu. Ma le ua isei, e kom di mo osisiu. 15Ng di mo ua ikel lolekoi a Chedaol Llechukl el kmo, “Ngikel mle betok a le chudel, a dimlak a bo loumeder er ngii; me ngikel mle kesai a le chudel, a dimlak a bo le ngesonges er ngii.” 16Ng meral mesaul a Dios el rullii a Titus el kmal mo blak a rengul el olengeseu er kemiu el ua ikemam. 17Ele ng diak di le kilengei er ongtmam e le merekong; ng bai kmal blak a rengul, me ng di mle ngii el melekoi ekong. 18Ma obengkel el ekong, el kim ulderchii, a tar kid el kmal meraelchisel er a ikelesia el rokui er a urerel el omerk er a Ebangkelio. 19E diak di loraelchisel e le merekong. Ng dirrek ngikal chad a mloterkokl er a bek el ikelesia er a Masedonia el mo obengkemam el kirel tial ureor el kimoruul er ngii el kirel odengesel a Rubak ma olechotel a blakerreng er kemam. 20Aki kmal kerekikl el kirel a ikal tenget er a blekeruraurreng el kim oungerachel, me ng diak le bor ngii a cherdechel a ngii di le chad el kirel. 21Aki omdasu a meruul a ungil tekoi, el diak di lungil er a medal a Dios, ng dirrek el ungil er mederir a re chad. 22Ng ngar ngii a lmuut el tar kid, el ngar kemam el obengterir el ekong. Ngikal chad a betok el bla ki bsa ngerachel e metik er ngii el kmal blak a rengul el olengeseu er a betok el tekoi. E chelechal lesal oumera er kemiu, e ng mengal mla mo semeriar er a eko olengeseu er kemiu. 23E a Titus a kldemek el kimdak el oureor el kiriu; e tirkel kuk bebil er kid el obengkel el ekong a omteche ikelesia e mo oureor el kirel odengesel a Kristus. 24Me bo le betik a rengmiu er tir, me bo lecholt er a ikelesia el rokui a bltkil a rengmiu, ma klemera er a ikel kimullekoi el kiriu.

will be added

X\