2 KORINTH 7

1Kemiu el betik er a renguk, a ikal telbiil a le riruul a Dios el kired. Ma le ua isei, e de kikidid er a ikel mengikiongel a bedenged ma rengud, e dutebechel a klengar er kid el mo cherrungel el chemau a ungil el tekoi el mengull er a Dios. 2Mochotii a bltkil a rengmiu er kemam. Ng diak a mekngit el kim rirellii el kirel a ngii di le chad, ma diak a chad el kim tilemellii, ma diak a chad el kim chilebeldir. 3Ng diak kulekoi el ua isei el melekoi a kngtmiu, ele kdi mla dmu er kemiu el kmo ng kmal betik a rengmam er kemiu me kede di dmak a de ngar ma de mad. 4Ak kmal oumera er kemiu e kmal smiich a renguk er kemiu. Ma ikel rokui el ringel el blo kimcharm er ngii me ng di mle mesisiich a renguk er ngii e imis el dmeu a renguk. 5Ng mo lmuut er uriul er a kim mer a Masedonia, me ng dimlak a ulengellam. Ng dimlak bo le chelellakl a rengmam er ker me ker, er a klautok el meliuekl er kemam, ma dakt el mlar a rengmam. 6E ngdi Dios el ongelodir tirkel moalech a rengrir a chillaod a rengmam el oba omerolel a Titus el mei. 7Ng diak di lomerolel e le merekong a chillodemam. Ng dirrek el chillodemam a chisiu el kmo kom rirellii el mo ungil a rengul, ma chisiu el kmo ng kmal somiu el lmuut el mesekak, e ouuchel a rengmiu er chelechang, e kldmokl el mo ngosukak; me ngak me ng lmuut el kmal dmeu a renguk er chelechang. 8Ele chomko ktilemall a rengmiu er a babier er ngak el ileko er kemiu, e ng mlo mekngit a renguk el kirel itiang, e ngdi chelechang e ng diak le mekngit a renguk er ngii, ele ng di mle tedeb a kngtil a rengmiu. 9E chelechang, e ng dmeu a renguk, el diak le kemiu el mlo mekngit a rengmiu a uchul; ng bai kemiu el ulebult a rengmiu el mor a ungil. Misel klengiterreng a luluusbech er ngii a Dios, me ng dimlak a mekngit el kim rirellii el kiriu. 10Ele klengiterreng el luluusbech er ngii a Dios a rolel a beltel a rengul a chad el mor a ungil, e mekrolii el mo suobel. Me tia diak a chad el sebechel el ouuchel er a rengul el kirel. E ngdi klengiterreng el di okiu a rolel a klechad a mo rolel a kodellel a klengar er a reng. 11Ka di momes er a bla le rellii er kemiu tial klengiterreng el luluusbech er ngii a Dios, kom mla mo semeriar, e orrecheda rengmiu el meledaes er kemiu, e metacherbesul er a rengmiu a mekngit el dilubech, e mo suebek a rengmiu a le dubech a mekngit. Kom dirrek el di ousumengiil ku er ngak, e kmal blak a rengmiu, e ngar ngii er a rengmiu a melsii a mlo mekngit. Ma ikal rokui el tekoi a ochotemiu el kmo kom klikiid el diak a telemelliu er a delongeled. 12Ak milluches er sel babier er ngak el ekong, el dimlak le ngikel mlo mekngit a uchul, ma dimlak le ngikel blo mekngit er ngii a uchul. Ak bai milluches er ngii me ng mo uchul e ng mo chemolt er medal a Dios el kmo ng meral blak a rengmiu er kemam. 13Tiaikid ia uchul me ng kmal ungil a rengmam. Ng dimlak di blo lungil a rengmam e le merekong. Ng liluut el kmal mo ungil a rengmam er a deuil a rengul a Titus, ele kemiu el rokui a rirellii el mo kie rengul. 14Ak millekoi er ngii el kmo ng kmal smiich a renguk er kemiu, e kemiu a dimlak kom iit er a ikel kdilung. Aki di millekoi a klemera er kemiu, ma ikel kimullekoi er a Titus el kiriu me ng mlo chemolt el merang. 15Ng merael el lmuut el mo klou a bltkil a rengul er kemiu, sel lolatk er kemiu el kmal mle kldmokl el orrenges a tekingel, e kmal mle medakt e mengull er ngii er cho mnguu er a dmuil. 16Ng kmal dmeu a renguk, ele ng sebechek el kmal oumera er kemiu.

will be added

X\