2 KORINTH 6

1Maki oureor el obengkel a Dios, e kmal olengit er kemiu el mla nguu a krasia er a Dios me lak mrellii el mo diak a ultutelel. 2Ele tekingel a Dios a kmo, “Ser a bo lungilbesul el belsechel, e ak rirengesemiu, e ngilsukemiu er ser a bocha le kirel el kusebelemiu.” Mosang! Chelechang isel ungil el belsechel a le ngesukemiu a Dios; chelechang isel sils el bo losebelemiu er ngii a Dios. 3Ng diak kimoruul olibesongel el mor a ngii di le chad, me ng diak a mo oltelechakl er kemam er a ngera er omesiungam. 4Aki bai olecholt er kemam el mesiungel a Dios er a rokui el tekoi, maki kmal di outekangel er a uldikel, ma chelebuul, ma ringel. 5Ng mla mo telal bo kimcharm er a chelebed, ma kelebus, ma uldikel; aki mle meringel el oureor, e diak a cheliuiuam, e diak a kelam. 6Ng bai di mle ultebechel a blekerdelam, el medenge klemerang, e klou a rengmam, e ungil er a re chad, el olecholt er kemam el kmo aki mesiungel a Dios, e dirrek el mle ultuil er a Chedaol Reng, e meral mle ungil el oubltikerreng, 7e melekoi a meral tekoi, e ultuil er a klisichel a Dios, e ousbech er a blekerdelam el ungil er a rengul a Dios el klekedellam er a mekemad el kirel a soal a Dios a kim oldechelakl ma lechub e kim mosebechakl er kemam. 8A re bebil er a re chad a mengull er kemam, e a re bebil a mengerar er kemam; ma re bebil a chemat er kemam, e a re bebil a melenguul er kemam. Aki di melekoi a meral tekoi, e ngdi re chad a kmo aki di outingaol. 9Tungil el medengelkemam, e kmo ng diak lodengelkemam. Ng di ua ia bla kim mad, e kemam tial melemolem el di chad. Aki kmal mo meringel el obals, e diak kim mad. 10Ma le bor ngii a uchul a kngtil a rengmam, me kemam a di ungil a rengmam; ma kim mongebuul, e ng uchul e ng mo ungilbesrir a re betok el chad. Me ng kmal mo diak a ngera er kemam, e ngdi kmal di ungilbesmam. 11Ng kmal di bleketakl a omelekingam el ekor kemiu a re chad er a Korinth, ma diak a berrotel er a rengmam el tekoi el kiriu. 12Ng diak le kemam a merers er a bltkil a rengmam er kemiu; ng bai kemiu a merers er a bltkil a rengmiu er kemam. 13Mak melekoi er kemiu er chelechang, el di ua cho mngelekek, el kmo mruul a rengmiu el kiram el mo ua ia rengmam el kiriu, e lak a medechel el berrotel er a rengmiu. 14Lak bo mdak el meruul a ngerang kemiu ma re chad el diak loumera er a Kristus, ele ng diak el sebechel. Ng mekera e a melemalt ma chebirukel a mo dmak? Ng mekera e a llomes ma ilkolk a mo dmak? 15Ng mekera e sebechel el mo ta delongelel a Kristus ma Diabelong? Ng ngera odekiar a chad el oumerang ma chad el diak loumerang? 16Ng mekera e sebechel el merenged a delongelel a templo er a Dios ma templo er a bleob el chelid? Ele kid a templo er a di ngar el Dios. Ng di ua ikel le dilu Dios el kmo, “Ak mo dolemii a delengcheklek er a delongelir a re chedak, e mo kie el obengterir; ak mo Dios er tir, me tir a mo chedak.” 17Ma Dios a melekoi el kmo, “Mcheridemiu er tir, e mngeseklemiu er tir. Lak mongesechusem er kemiu, me bo le sebechek el ngoikemiu, 18mak mo demmiu, me kemiu a mo ngelekek el sechal ma redil, ma ika ia tekingel a Rubak el Olab a Bek el Klisiich”

will be added

X\