2 KORINTH 5

1Ele kede medengei el kmo sel le meterakl tial delidui el de kie er ngii, el bedenged er tial beluulchad, e a Dios a mla kudmeklii a blai er a eanged el bo de kie er ngii, el blid el ngii a rirellii, el melemolem el mo cherechar. 2Me chelechal de kie er a bedenged, el blid er tial beluulchad, e ng ouedikel a rengud el oureng er sel tar a bedenged, el ngar a eanged el mei, el bo dobail er ngii, 3me sel dobail er ngii e ng mo diak lak a bedenged. 4Ele chelechal dirk de bliull er a bedenged er tial beluulchad, e ng olengerool a rengud er a ringel. Ng diak le belkul a kmo lobedobed er kid a bedenged. Ng diak, ng bai soad a bo dobail er isel bedenged el ngar a eanged el mei, miseikid e sel mo mad a mo obult el mo nguu a klengar. 5A Dios ngikel kildmeklii tial kired, e milskid a Reng el oterkeklel a kmo tia mo tekoi. 6Me ng di blechoel el di mesisiich a rengud. Kede medengel kmo a klteketed el bliull er tial bedenged er a beluulchad, e ng dirkak bo dobengkel a Rubak. 7Ele kede melemolem er a klengar er tiang e oumera er a Rubak el diak desang. 8Ng kmal di mesisiich a rengud e bai soad el mo cheroid er tial bedenged e mo kie el obengkel a Rubak. 9Ma kmal di dolebedebek er ngii a kmo a di de ngar tiang ma de bor sei, e di doldeu er a rengul a Rubak. 10Ele kid el rokui a di mor a kerrekeriil er medal a Kristus. Ma ta ma tar kid a mo obals ma lechub e ng mo mukngeltengat el oltirakl a omerellel er a dirk le ngar tial beluulchad. 11Aki medengelii a belkul a de medakt er a Rubak, maki melasem el omult a rengrir a re chad el mo oumera ikel kimolekoi. E a Dios a kmal ungil el medengelkemam, e ngak a melatk el kmo kom dirrek el ungil el medengelkemam. 12Ng diak kimolasem el meruulchisam er kemiu; aki bai omeketakl a ungil el uchul e ng mo ungil a rengmiu er kemam, me ng mo sebechiu el smodemam er tirkel ungil a rengrir er a di ikel moues er a ikrel, e diak le bor a meral blekerdelel a rengul a chad. 13Ele lsekum aki mla mo mekebelung, e aki ua isei el kirel a Dios; e a lsekum ng ultebechel a rengmam, e aki ua isei el kiriu. 14Ele bltkil a rengul a Krisrus el kired a mengedereder er kemam, ele ki ungil el medengei el kmo a tal chad a mlad el kirir a rokui el chad, el belkul a kmo a rokui el chad a mlad el obengkel. 15Me ng mlad el kirir a rokui el chad, me ng uchul e tirkel oltirakl er ngii a mo diak di le ngar el kirel a ungil er tir, e bai kirel a Kristus el mlad el kirir e mokiis el lmuut el me ngar. 16Ma le ua isei, e chelechal mor medad, e ng dikea kim omdasu a tekoi el kirel a tar a re chad el di okiu a klechad. E a lta e aki mle ua isei el kirel a Kristus el di okiu a klechad, e ngdi chelechang, e ng dikea kim ua isei. 17Ma lsekum a chad a oltirakl er a Kristus e ng mla mo oba beches el klengar; a mechut a dikeang e a beches a mla mor ngii. 18A ikal rokui el tekoi a le riruul a Dios el mo ua isei, ngiil Dios el ulekiu a Kristus el sumechii a delongeled kid me ngii e milskemam a ngerachel el mo oureor el mesumech a delongelir a re chad me ngii. 19A kulekoi er ngii el tekoi a kmo, a Dios a ulekiu a Kristus el mesumech er a delongelel ngii ma rokui el chad, el di uluusubes a kngterir, e ulterkeklii er kemam a osisechakl el kmo ng ua ngera dosumech a delongelir a re chad me ngii. 20Me kemam a melekingel ku Kristus, ma Dios a okiu kemam er chelechal melekoi a tekingel. Maki omtechei er a Kristus el olengit er kemiu me bsa techellel a Dios me le sumech a delongeliu kemiu me ngii. 21A Krisrus a dimlak a kngtil, e ngdi Dios a millatk er kid me ng rirellii el ua ia le blor a klengit, ma bo doltirakl er ngii, e a Dios a mo rullid el mo ungil er a rengul.

will be added

X\