2 KORINTH 4

1A Dios a chubechubchad me ng milskemam tial ngerachel, me ng diak bo le mechitechut a rengmam. 2Aki mengeroid er kemam er a ikel berrotel el de merur er ngii el tekoi. Ng diak kimongeblad, ma diak kimongeuid a tekingel a Dios. Aki di beches el melekoi a meral tekoi er a medal a Dios, el olecholt er kemam er a re chad me te mo oumera er kemam. 3E a lsekum a Ebangkelio el kim omerk er ngii a diak le bleketakl a belkul, e ng diak le bleketakl er a di tirkel diak bo le sobel. 4Ng diak el sebechir el mo oumerang, ele mekngit el chelid er tial beluulchad a mla chodeng a rengrir, e merers er tir me ng diak lesa llemesel a Ebangkelio el kirel a klebkellel a Kristus, el meral okesiul a Dios. 5Ele ng diak le chisam a kim omerk er ngii; aki bai omerk er a chisel a Jesus Kristus el kmo ng ngii a Rubak, e kemam a mesiungiu el kirel a Jesus. 6Ele ng Dios ngikel dilu el kmo, “Bo lediich a llomes er a ilkolk!” e ngii ia milekllomes a rengud me ng mo sebeched el medengelii a klebkellel a Dios el chemolt er medal a Kristus. 7E kemam a di kor a bekai el oltekau er a meringelchad el klalo, el olecholt er a kmo a klou el klisiich a ngar a Dios el mei, el diak le ngar kemam el mei. 8Maki di blechoel el mo chuarm er a ringel, e ngdi diak bo le mechitechut a rengmam; bebil er a taem e ng mo rrau a rengmam, ngdi diak bo lak omeltkam; 9e modechelakl er a re chad, e ngdi diak le chitemam a Dios; e mo meringel el metemall, e ngdi diak kim mad. 10Aki di blechoel el di ocherur a kodall el mo ua ia Jesus. E ngdi kemam el dirk chad a ochotii el kmo a Jesus a dirrek el di ngar. 11A chelsel a klengar er kemam el rokir, e aki blechoel el di mo ocherur a kodall el kirel a Jesus, me ng mo uchul e ng mo sebechel a klengar er ngii el mo chemolt er a ngar ngii a kodellel el bedengam. 12Maki ua isei el di blechoel el chemau a kodall, me ng mo sebechiu el nguu a klengar. 13Ngikel lilechesii a Chedaol Llechukl el kmo, “Ak uumera er a Dios a uchul mak melekoi a ikel kulekoi,” a kim ua ingii el oumerang ma uchul maki melekoi a ikel kimolekoi. 14Aki medengei el kmo a Dios el ulekisii a Rubak el Jesus er a kodall el me ngar a dirrek el mo okisemam el obengkel a Jesus, e ngoikemam el obengkemiu el mor bitar ngii. 15A ikal rokui a di kirel a klungioliu. Me sel lorael el mo betok el chad a mo medengelii a krasia er a Dios el mor tir, e te mo obdois a re meluluuch el mereng a sulel a Dios er a klebkellel. 16Tia ia uchul me ng diak bo le moalech a rengud. A lta e a bedenged a di merael el mo mechitechut, e ngdi rengud a di merael el mo mesisiich er a bek el sils. 17Me tial di kekerei e di tedeb el ringel el blo decharm er ngii a mengedmokl er a kmal klou el klebkall el kired el diak a ulebengelel e diak a mo mekesiur. 18Ele kid a diak di de ngellomel a ikel moues el klalo, e ng bai ikel diak le moues. Ele ikel moues a diak le meketeket e ng mo diak, e a ikel diak le moues a melemolem el diak a ulebengelel.

will be added

X\