2 KORINTH 3

1Cho momdasu e aki kuk omechela el meruulchisam? Ada ki ua re bebil er a re chad el ousbech a babier er a re chad el olecholt er kemam er kemiu, ma lechub e ng ngar kemiu el olecholt er kemam er a re bebil er a re chad? 2Ng kemiu ia babier el olecholt er kemam, el llechukl er a rengmam me te mo medengelii e menguiu er ngii a re bek el chad. 3Ng bleketakl el kmo ng Kristus a lilechesii ngiil babier e odureklii el okiu kemam. Ng diak le llechukl el luluusbech a chesengel oluches el meluches er ngii, ng llechukl el luluusbech er a Reng er a di ngar el Dios el meluches er ngii. Ng dimlak le meluches er a taber el bad, ng melluches er a rengrir a re chad. 4Aki melekoi el ua isei, ele kemam el kmal oumera er a Dios el okiu a Kristus. 5Ng diak a ngeral sebecham a di le kemam; ng Dios a uchul e ng sebecham. 6Ng ngii ingikel uchul e ng mlo sebecham el mo mesiungel a Dios er a beches el telbiil, el diak lokiu a llechukl el llach, e bai okiu a Reng; ele llechukl el llach a rael el mor a kodall, e a Reng a rael el mor a klengar. 7A lsekum a telbilel a Dios el mor a re chedal el okiu a Llach el rael el mor a kodall, el mle lluches er a taber el bad, a mlei el obengkel a kloul llomes, ma re chad er a Israel a dimlak el sebechir el ngellomel er a medal a Moses ele ngii el kmal mle medidiich, el ngii el llomes a mirrael el mo nguemed, 8e a telbilel a Dios el mor a re chedal el okiu a Chedaol Reng ng diak lluut el kmal klou a llemesel? 9Ele lsekum a telbiil el rael el mor a kodall a mlar ngii a llemesel, e ng ulterkokl el lmuut el ngar uchei a llemesel a telbiil el meruul er a re chad el mo ungil er a rengul a Dios. 10Ng sebeched el kmo sel llomes er a ngar a mong a dikea llemesel ele lmuut el mesisiich er ngii el llomes a mla mei. 11Ele lsekum ng mlar ngii a klebkellel a llomes el di mlei e mo diak, e ng lmuut el klou a klebkellel sel llomes el melemolem el diak a ulebengelel. 12Kemam el kmal oumera er tiang a uchul me ng diak kim medakt. 13Ng diak kim ua Moses, el millekedek er a medal, me ng mo diak el sebechir a re chad er a Israel el mesa llemesel el merael el mo nguemed. 14E ngdi mle cheldeng a rengrir; me ng me lmuut er chelechang e sel longuiu er sel di mla telbilel a Dios el mor a re chedal, e sel dekedek a dirk medechel, ele ng di sel bo loltirakl er a Kristus a chad e ngii a mengai ku ngiil dekedek. 15Me ng dirrek el ua ise er chelechang, el sel longuiu a Llach el mlar a Moses el mei, e sel dekedek a dirk melenget a rengrir; 16e ngdi sel lobult a chad el mor a Rubak, e ng mengai ngiil dekedek. 17A Rubak a Reng, me ngikel chad el lomesiur er ngii a Reng er a Rubak a mededaes el diak a merers er ngii. 18Me kid el rokui, el diak a dekedek er a medad, me kede omes er a klebkellel a Rubak, a mekekokid el merael el mengal mo ua ingii er a klebkellel; e tia ngar a Rubak el mei, el ngii a Reng.

will be added

X\