2 KORINTH 2

1Mak tilbir er a renguk a diak kluut el ekong el tomall a rengmiu. 2Ele lsekum ak tomall a rengmiu, e ng techa mo odeuir a renguk, a lak le kemiu el bla ktemall a rengmiu? 3Sei ia uchul mak lilechesii sel babier er ngak el ekor kemiu, me lak bo le mekngit a renguk er kemiu, kemiu el kiriu el uchul a deuil a renguk, ele kmle ungil medengei el kmo a lungil a renguk, e kemiu el rokui me ng dirrek el ungil a rengmiu. 4Ng kmal mle meringel er ngak el meluches el ekor kemiu e kmal mle mekngit a renguk mak lilangel, el dimlak el soak el meruul er kemiu el mo mekngit a rengmiu; ng bai mle soak a cho bo modengelii a kmal klou el bltkil a renguk er kemiu. 5E ngdi lsekum ng ngar ngii a chad el mlo uchul a kngtil a rengul a tar a re chad, e ng dimlak le ngak a blo le ua ise er ngii, ng bai ua le telkib el ngar ngii a le tilemellii er ngii er kemiu el rokui. (Ak melekoi el ua isei ele ng diak el soak el kmal omekringel er ngii.) 6Ng ungiabesul el bla lobals ingikal chad er a ruumesingd er kemiu, 7me ng kiriu er chelechal bai ousubes er ngii e omekebek er a medal, me lak bo le meeleb er a klou el klengiterreng. 8Mak ulengit er kemiu me mochotii er ngii el kmo ng meral betik a rengmiu er ngii. 9Ele tiaikid a uchul mak milluches el ekor kemiu el mengarm er kemiu e omes el kmo kom meral kldmokl el di blechoel el oltirakl a tekingek ng diak. 10Ma ngii di le chad el mousubes a telemellel a kuusubes er ngii. Ele bla kuusubes er ngii, a lsekum ng ngar ngii a kirek el ousubes er ngii, e a kuusubes er ngii er medal a Kristus el kiriu, 11me ng mo diak a techellel a Satan el mo mesisiich er kid, ele ng diak lak dodenge uldesuel. 12Ser a kbor a Troas el mo omerk er a Ebangkelio er a Kristus, e ak miltik er a techall el oureor el ultuil er a Rubak el kmal mle ungil, 13e ngdi dimlak bo le chelellakl a renguk, ele ng dimlak kbetik er a tar kid er a Titus. Me tiaikid e ak silmesmecheterir a re chad er sei, e lomelemii a omerolek el mor a Masedonia. 14E ngdi bo le modanges a Dios, el di blechoel el okiu a klengar el oltirakl er a Kristus e omekrael er kemam er a rolel a Kristus el mo mesisiich er a re cherrouel, e okiu kemam el omerk er a kor a bul ochod el osisechakl el kirel a Kristus er ker me ker. 15Ele kemam a ua ia chetul ochod el lodars a Kristus er a Dios, er a delongelir tirkel mo suobel me tirkel diak. 16E tirkel diak bo le sobel a oeak osisechakl el kirel a Kristus el mor a kodall, e tirkel mo suobel a oeak ngii el mor a klengar. Me ng techa sebechel mor tial ureor? 17Kemam a diak kim ua itirkel betok el chad el meruul a tekingel a Dios el mo kor a oteruul el klalo; a Dios a uleldurech er kemam, maki ngar medal e meral ngar a rengmam a mengedecheduch el okiu a Kristus.

will be added

X\