2 KORINTH 13

1Chelecha e ng mo me ng mo ongedel be kuldingel er kemiu. E a lsekum ng ngar ngii a ultutakl e ng kirel el ngar ngii a olisichel el oeak a terung ma lechub e te tedei el chad. 2Ng soak el omeklatk er tirkel mlor a klengit er a ngar a mong, ma rokuil chad, mak melekoi er tir er chelecha el kcheroid a di ua ikel kdilu er ser a ongerul odngelek, el kmo sel kikong e te kmal mo meringel el obals. 3Kom mo omes a rokui el olechotel a kmo a Kristus a melekoi el okiu ngak. Ng diak le mechitechut a loruul a ngera er a chelsiu; ng bai mo chemolt el mesisiich er a chelsiu. 4Ng ulekiu a chelitechut el mo mad er a kerus, e ngdi chelechang e ng di ngar el okiu a klisichel a Dios. Me kemam maki obengkel er a chelitechut, e ngdi sel kimoruul a ngera er a chelsiu, e aki mo obengkel er a klengar er ngii el oba klisichel a Dios. 5Ka bo mungil el merriter er kemiu e mosekemiu el kmo kom ungil el oltirakl a cho moumeral tekoi? Kom medengei el kmo a Jesus Kristus ng ngar a chelsiu? A lsekum ng diak, e kom urrebet er a ikel moumeral tekoi. 6E ngdi ak uumerang el kmo kom medengel kmo kemam a meral apostol el diak kim urrebet. 7E ngdi nglunguchek er a medal a Dios a kmo lak kom tuchakl el mor a mekngit, el diak le belkul a kmo kemam a diak kim urrebet, e bai bo lecholt el kmo kom ngar a ungil, e kemam a mle ua kim cheleuid. 8Ele ng diak el sebecham el meruul a ngeral omtok er a klemerang, aki bai di meruul a ikel tekoi el kirel a klemerang. 9Me ng ungil a rengmam a cho mesisiich e kemam kim mechitechut. Maki meluluuch me kom mengal mo cherrungel el ungil. 10Ak dirk cheroid e meluches a ikal ekor kemiu, me sel kichikang e bo lak a ultutelel el ksal ousbech er a klisiich el le bilskak a Kristus, el diak lolemall e bai olengesu er kemiu. 11Ak melmesumech ku er kemiu er chelechang, kemiu el odam. Molasem el merael el mo cherrungel omerelliu er a ungil tekoi, e mrenges ongtik, e bo le ta rengmiu e mdak el kie el ngar a budech. Ma Dios er a bltikerreng ma budech a mo obengkemiu. 12Mkautkeu er a delongeliu el okiu a rolel a de chedal a Dios. A rokui el chedal a Dios a mesumech a yorosku el ekor kemiu. 13Ma krasia er a Rubak el Jesus Kristus, ma bltikerreng er a Dios, ma klauchad er a Chedaol Reng bo lobengkemiu el rokui.

will be added

X\