2 KORINTH 12

1Ng kirek el meruulchisek; a lta e ng diak a ngeral bo le rellii, e ngdi chelecha e ak mo melekoi er a chisel a Rubak er a be ledum e locholt a uldesuel er ngak. 2Ak medengelii a tal chad, el oumera er a Kristus el mlengai el mor ongedel eanged, er a truich me eual rak er a mla me mong, e diak kudengei el kmo ng mlong el oba bedengel, ma lechub e ng mlong el di ngar a ues er a berrous, ng di Dios a medengei. 3Mak medenge el kmo ngikal chad a mlengai el mor a Baradis, e diak kudenge el kmo ng mlo el oba bedengel ma lechub e ng di mlo er a rengul el kor omerrous, ng di Dios a medengei, 4e rirenges a tekoi el diak el sebechel el medung, ma re chad a diak le kirir el melekoi. 5Ak mo omteche er ngikal chad el meruulchisel, e ngdi diak bo kuruulchisek, ak di mo melekoi a ikel olecholt er a chelitechetuk. 6A lsekum ng soak el meruulchisek, e ng diak bo kkor a kebelung, ele kmo melekoi a meral tekoi. E ngdi diak bo kuruulchisek er a ikel kules, ele ng diak el soak a chad a bo lechat er ngak el mo engelakl er a ikel leues ma ikel le renges er ngak. 7Tiakid a mle rolel e ng diak bo le kedidai a renguk er a betok el mengasireng el tekoi el lulecholt er ngak a Dios: Ng milskak a secher el ulemekringel er a bedengek el ua ia toched, me tia ia luleba Satan el oldechelakl er ngak, e mirrers er ngak er a kldidairreng. 8Ng edel kulengit er a Rubak me le nguu tial choridii er ngak. 9E ngdi tekingel el mler ngak a kmo, “A krasia er ngak a ungilbesul el kirem, ele klisichek a mengal mo chemolt er a chelitechetul a chad.” Me ng bai lmuut el ungil a renguk el chemat a chelitechetuk, ma klisichel a Kristus bo lecholt er ngak. 10Me ng di ungil er a renguk a kmechitechut, ma bo kcharm er otuub, ma ringel, ma odechelakl, ma cheliseksikt el kirel a Kristus, ele sel kmechitechut, e ak bai mo mesisiich. 11Ak mla mo kor a kebelung er omelekingek el ekor kemiu, e ngdi kemiu ia urremelak mak mlo ua isei. Ele ng bai mle kirel el kemiu a melekoi a klungiolek. Ele lta e ng diak kngerang, e ngdi diak kngar uriul er tirkal leko te kmal ngarbab el apostol. 12A Dios a ulekiu ngak el meruul a betok el tekoi el chelid ma bebil er a mengasireng el tekoi er a delongeliu, er ser a kuutekangel el meruul a urerek. A ika ia ochotii el kmo ngak ia meral apostol. 13Ng ngera kmirruul er ngii el mor a bebil er a ikelesia el dimlak kuruul er ngii el ekor kemiu? Ng di tal tekoi el kmo, ng dimlak kuduudel er kemiu, e ngak a olengit me lak bo le mekngit a rengmiu e ak kmal mlo mekngit! 14Chelecha e ak mla kudmeklak el ekong el mo me ng mo ongede kung e diak kbo kungesang er kemiu; ele ng kemiu, ng diak lududiu a kusiik. Ele ng diak le re ngalek a omecheliu er a re chedam ma re chedil; te bai re chedam ma re chedil a omecheliu er a re ngalek. 15Ng kmal di ungil a renguk el tonget a ikel ngar ngii er ngak el mo lmuut er a klengar er ngak el kiriu. Ma lsekum ng mengal mo klou a bltkil a renguk er kemiu, e kemiu ng mengal mo kekere bltkil a rengmiu er ngak? 16Ma ble le ua isei el dimlak kbo kungesang, e a lta e ng ngar ngii a mo melekoi el kmo ak kmal mle chedechuul el chobeldkemiu er a telingolek. 17Ng ngar ngii a kchilbeldir er kemiu el kirel a klungiolek el okiu a tar tirkel kuldercheterir el ekor kemiu? 18A Titus a kullengit er ngii me ng ekong, e ulderchii ngikel tar kid me ng ulebengkel el ekong. A Titus ng chilebeldkemiu? Ng dimlak di ble losisiu el reng a kim ulebang? Ng dimlak di ble losisiu omerellam? 19A lta e kom meketeketal melebedebek el kmo aki meledaes er kemam er medemiu. Ng diak! Aki ngar medal a Dios e melekoi a ikel soal a Kristus a kim dung, e a ikel rokui el kimoruul, kemiu el bebil er kemam, a di kirel a klungioliu. 20A suebek a renguk er ngii a mekngit a kikong e kbetik er kemiu el dirk ngodech er sel kumdasu er ngii, me kemiu me betik er ngak el diak kua isel cho momdasu er ngii. Ng suebek a renguk a kikong e kbetik a klautoketok, ma chelechei, ma ngasechereng, ma blechelechelingaorreng, ma omelaes, ma telulechoid, ma kldidairreng, ma uldikel. 21Ak bekikl a kikong, e lluut a Dios er ngak el rullak el mo merur er medemiu, e bo klangel el kirir tirkel mlor a klengit er a ngar a mong e dirkak lechoit a ikel mekngit el blekerdelir er a delengerenger, ma deleboes, ma klekad.

will be added

X\