2 KORINTH 11

1A llechulekum kom outekangel el rongesak a bo ktelkib el kor a mengebelung. Ak ulengit me moutekangel! 2Kom kmal mekreos er a renguk, el di ua ia rengul a Dios el kiriu. Ele kulemak er a delongeliu kemiu ma Kristus, me ng mo sebechek el odersemiu er ngii, el ua ia kmal klikiid el ekebil el mo omak er a chebechielel er a di tal chad. 3Ak kmal bekikl a cho bo mua Eva, el mlotuchakl er a cheblad el bersoech, el touchakl a rengmiu me ng mo diak le cherrungel e le klikiid a bltkil a rengmiu er a Kristus. 4Ele ng di ungil er a rengmiu el outekangel el orrenges er a ngii di le chad a lsekum ng mei el omerk er osisechakl el kirel a Jesus, el ngodech er sel kim ulemerk er ngii er a delongeliu, ma lechub e kom oltirakl er a reng ma lechub e ng ebangkelio el ngodech er a Reng ma Ebangkelio el kim ullalem er ngii er a chelsiu. 5Ak medengei el kmo ng diak a ngeral kngar uriul er ngii er tirkal leko te kmal ngarbab el apostol. 6A lta e ak ngesonges er omengedecheduch, e ngdi diak a kngesonges er ngii er a ikel kudengei. Me tiang a mle betok el kim ulemeketakl er ngii er kemiu er a rokui el tekoi. 7Ngak a kmlor a mekngit er a kungengetak el mer iou el olengesechekl er kemiu, e kumerk er a Ebangkelio er a Dios el ekor kemiu, e dimlak momdoud er ngak? 8Ng ua ia kurrechorech a udoud er a bebil er a ikelesia, er a kusiou er kemiu, e tir lomdoud er ngak. 9E ser a kubengkemiu e bo le metacherbesuk er a ngerang, e ng dimlak kungesang er kemiu, ele tullengeseu er ngak tirkel bebil er kid el mlar a Masedonia el mei. Ng dimlak kungesang er kemiu er isei, me ng dirrek el diak kbo kungesang er kemiu er chelechal mong. 10Mak ultuil er a klemera er a Kristus el ngar ngak, e kmo ng diak el sebechek el mo diak kuruulchisek er tial tekoi er a bek el beluu er a Akaia el rokir. 11E ngerang? Ng belkul a kmo ng diak le betik a renguk er kemiu? A Dios a medengei el kmo ng betik a renguk er kemiu! 12Ma ikel kuruul er chelechang, a kulemolem el di meruul, me ng mo diak a uchul omelekingir tirkel bebil er a leko te apostol el kmo ng di osisiu a blekerdelam a kim oureor. 13Ele itirkal chad a diak le meral apostol, e di mengeblad er a urerir, e oudeluus er a kmo te apostol er a Kristus. 14E diak le mechas a rengud a le ua isei, ele Satan me ng dirrek el oudeluus er a kmo ng anghel er a llomes. 15Me ng diak le blosech el tekoi a loudeluus a re mesiungel er a kmo te mesiou er a Dios el meruul a soal. A ulebongel, e te mo obals er a rredemelel omerellir. 16Ak lmuut el melekoi el kmo lak a chad el omdasu el kmo ak mengebelung. E ngdi lsekum kom omdasu el ua isei, e mngikak ku el di ua kkebelung, me le bor ngii a telkib el uchul e kuruulchisek. 17A ikal kulekoi el meruulchisek a diak le ngar a Rubak el Jesus el mei; ak melekoi el di ua ia kkebelung e kulekoi. 18Te betok a re meruulchisir el oltirakl er a di reng er a klechad, me ngak mak dirrek el mo meruulchisek. 19Ng mellomes a rengmiu, me ng di ungil er a rengmiu el outekangel el orrenges er a kebelung el chad. 20Ele kmedenge el kmo kom di outekangel a lousibai er kemiu a chad, ma lechub e di lousbech er kemiu el kirel a ungil er ngii, ma lechub e longeblad er kemiu, ma lechub e le metengel osengel er kemiu, ma lechub e longedelekelek er kemiu. 21Ak merur el kmo ng dimlak a klisicham el mo ua ise er kemiu! E ngdi lsekum ng ngar ngii a melasem el meruulchisel—e chelecha e ak kor a kebelung e melekoi— e ngak mak dirrek el mo melasem el meruulchisek. 22Te kmo te Hebru? Me ngak mak dirrek el Hebru. Te chad er a Israel? Me ngak mak dirrek. Te titiul a Abraham? Me ngak mak dirrek. 23Te mesiungel a Kristus? Ak kor a kebelung er omelekingek, e ngdi ngak a lmuut el ngar uche er tir el mesiungel a Kristus! Ak liluut el meringel el oureor, e liluut el betok el kbor a kelebus, e liluut el betok el kmechelebed, e liluut el betok el bo kucherur a kodall. 24Ng mle eim el knga 39 el chelebed er a chimorir a re chad er a Judea. 25E mle edel kmechelebed er a kerrekar er a re chad er a Rom e mle tal kubetech er a bad, e mle edel kim ngar a diall el mo obeu er a daob; e mle tal kesus ma tal llomes el di kumtitechakl er a daob. 26Ma ildisel a omerolek, e ak mlo ocherur a ringel er a imui, ma ringel er a re merechorech, ma ringel er a re chad el kim tal chad, ma ringel er a re Chisentael, ma ringel er a chelsel a beluu, ma ringel er a chelsel oreomel, ma ringel er a daob, ma ringel er a re chad el diak le meral bebil er kid. 27Ak mle meringel el oureor e mlo chuarm. Ng mle betok el di diak a cheliuek er a klebesei, e mo songerenger e meched a renguk. E mle blechoel el mo diak a kelek, e mekerasem, e diak a bilek. 28Kede mo meche lmuut el bebil er a tekoi, e ngdi sel kmal mle chuarm a renguk er ngii a sebekreng er ngak el kirel a ikelesia el rokui. 29Ng techa kmo ng mechitechut, e ngak a diak? Ng techa lukrolii el mo ruebet er a klengit, e ngak a diak bo lochedechudel a renguk e le mekngit a renguk? 30A lsekum ng kirek el meruulchisek, e ak mo melekoi a ikel olecholt er a chelitechetuk. 31E a Dios el Demal a Rubak el Jesus, el kirir a rokui el chad el oldanges er ngii el mo cherechar, a medenge el kmo ng diak kuutingaol. 32Ser a kngar a Damaskus, e a bdelul a beluu el le tiltkii a King Aretas a uldercheterir a re chad el mo omekbat el omdechem er ngak, 33e ngdi ruumerang a ultechak er a metetoech er a sersel a beluu e oimimak er a sualo el mor iou mak chiliis me ng dimlak ludechemak.

will be added

X\