2 KORINTH 10

1Ngak el Paulus a ngar ngii ongtik el ekor kemiu; ngak el leko ng ngariou a renguk a kngar bita er kemiu, e meringel a tekingek a kcheroid er kemiu. Mak uba delemedemek ma klengariourreng er a Kristus, 2e kmal olengit er kemiu me lak mrellak el mo meringel a tekingek sel kikong. Ele ng sebechek el mo meringel a omelekingek el mor tirkel melekoi el kmo aki blekall er a di reng er a klechad. 3Ng meral tekoi el kmo kedulsiseb er a eltel tial beluulchad el de ngar ngii, e ngdi mekemad el de ngar ngii a diak le kirel tial beluulchad, 4ele ikel kim ousbech el oldechelakl a klisichel a mekngit a diak le klisichel a di klechad, e ng bai klisichel a Dios. Aki ousbech el olturk a cheleuid el omesodel a tekoi; 5ma ikel rokui el tekoi el lousbech a re chad el mekedidai a rengrir el omtok a meral tekoi el dodengei el kirel a Dios. Aki chosimer a rokui el uldasu e mult el mo oltirakl er a Kristus. 6Me sel bo kimodengel kmo ng meral blak a rengmiu el oltirakl er kemam, e aki kldmokl el mo melseterir tirkel diak le blak a rengrir. 7Kemiu a di omes a ikrel a tekoi. A lsekum ng ngar ngii er kemiu omdasu el kmo ng chedal a Kristus, e lluut ngiil chad el di ngii el mesang, e bo lodengel kmo kemam maki dirrek el chedal a Kristus el ua ingii. 8A Rubak a milskemam a klisiich el diak lolemall e bai olengeseu er kemiu, ma blo ktelkib el imis el meruulchisam er ngii el klisicham, e ng diak a bo kmerur er ngii. 9Ng diak el soak a cho momdasu el kmo ak urrouk er kemiu el olab a babier er ngak. 10Ele re chad a melekoi el kmo, “Ng oungeroel e meringel a tekingel er a babier er ngii, e ngdi sel lobengked e ng mechitechut e a tekingel a diak a ngeral le rellii.” 11Bo lodengei itirkaikid el chad el kmo a ikel kimolekoi er a babier a kim cheroid, a ikei ia bo kimoruul sel kim ekor a medemiu. 12Becherei e ng diak el somam el mengoir ma lechub e kim omekesiu er kemam er tirkel di tir el olengesechekl er tir. Ng tekoi el klebelung a le ngar ngii. Ng di tir el melibech a olkael er a deruchall, e di tir el orreberebet er tir er olkael el di mle tir el melibech! 13E ngdi kemam a diak kimoruul a chisam el mo engelakl er olkael; aki di oltirakl a ikel olkael er a ureor el lulterkokl a Dios el kiram, el uldimukl er ngii a ureram el kiriu. 14Me kemiu el uldimukl er ngii el olkael a uchul me ng dimlak bo kim engelakl er ngii, er ser a kim ekor kemiu el mle kot el oba Ebangkelio er a Kristus el ekong. 15Me ng diak kimoruul a chisam er a urerir a re ngodech el chad el mo engelakl er olkael el mloterkokl er a Dios el kiram. Aki bai di oureng el kmo bo mesisiich el oumerang, ma ureram er a delongeliu me ng mengal omerk el oltirakl er olkael el kim ousbech er ngii. 16E a uriul e ng kuk mo sebecham el mo omerk er a Ebangkelio er a ikel bebil er a beluu el ngar a ikrel a Korinth e diak bo kimoruul a chisam er a bla leruul a ngodech el chad er sel loureor er ngii. 17A Chedaol Llechukl a kmo, “Ngikel soal el meruulchisel, loruulchisel er a ikel bla leruul a Rubak.” 18Ele meral ungil chad a diak le ngikel di ngii el chemat er ngii; ng bai ngikel lechat er ngii a Rubak.

will be added

X\