2 KORINTH 1

1Ngak el Paulus, el apostol er a Jesus Kristus el oltirakl er a mle soal Dios, ma tar kid er a Timothy, a meluches el ekor a ikelesia er a Dios el ngar a Korinth, ma rokui el chedal a Dios el ngar a beluu er a Akaia, el outkeu er kemiu. 2Ma Dios el Demad, ma Rubak el Jesus Kristus le beskemiu a krasia ma budech. 3Bo le modanges a Dios el Demal a Rubak er kid el Jesus Kristus, el Chedam er a klechubechub e Dios el olengeseu a rokui el tekoi, 4el olengeseu er kid er a rokui el chelebuled, me ng mo sebeched el olengeseu er tirkel ngar ngii a chelebulir, el olengeseu er tir el ousbech a ikel ulengesuil a Dios el mer kid. 5Kid el obengkel a Kristus er a betok el rengelel a uchul, ma Dios a okiu a Kristus el dirrek el kmal olengeseu er kid. 6A lsekum aki chuarm er a ringel, e ng kirel el olengeseu er kemiu el mo suobel. Ma lsekum aki metik a ulengesuil a Dios, e ng dirrek el olengeseu er kemiu, me kom mo mesisiich el outekangel cho bo mcharm er osisiu el ringel el ua ikemam. 7Omeltkam el kiriu me ng dirrek el diak bo louedikel, ele ki medengei el kmo a cho bo mcharm el ua ikemam, e kom dirrek el mo metik a ulengesuil a Dios el ua ikemam. 8Kemiu el bebil er kemam, ng diak el somam a lak modenge ikel blo kimcharm er ngii er a beluu er a Asia; ele ki kmal mlo imis el chuarm me ng mlor ngii er a rengmam a kmo aki di mo mad. 9Ng di mle ua ia kim ulebals el di mor a kodall. Ngdi tia mlo ua isei me ng mo uchul e ng diak di kim ultuil er kemam, e bai mo ultuil er a Dios, el olekiis er a re mla mad el me ngar. 10Ng ulsebelemam er a kilo kim mad er ngii, e mo osebelemam; e kemam a kmal oumera er ngii el kmo ng lmuut el mo osebelemam. 11Ng kiriu el dirrek el mo ngosukemam er a nglunguchiu, me te betok a re mo mereng a sulel a Dios el rirenges a nglunguchir el kiram; e betok a mo omekngeltengat er kemam. 12A kmal smiich a rengmam er ngiil tekoi a kmo ng kmal mededaes a rengmam el kirel a klengar er kemam er tial beluulchad, e a ngar uchei a blekerdelam el kiriu, el di uleltirakl a ungil e melemalt er medal a Dios, el dimlak lultuil er a llemesel a klechad e bai mle ultuil er a krasia er a Dios. 13A tekoi el kimoluches el ekor kemiu a di sebechiu el chemuiu e mo medengei. Ng soak cho bo mungil medenge ngar a renguk, 14el dimlak bo mungil medenge er a ngar a mong, me sel le me isel Sils er a Rubak e ng kmal mo ungil a rengmiu er kemam el ua ikemam el kmal mo ungil a rengmam er kemiu. 15Ak kmal mle medengei el kmo ng mo ua isei, me ng mle soak el kot e ak mer kemiu, me ng mo erul le mer kemiu a klengeltengat. 16Ele ng mlar ngii er a renguk a eko oldingel er kemiu er a omerolek el mor a beluu er a Masedonia ma luut er ngak e ak lmuut el odngelemiu. Me sel kluut el mei e kom mo ngosukak er omerolek el mor a Judea. 17Ser a kulib er ngii el omerolek, e ng mle teleuadel a renguk? Ada sel kulib er a renguk, e ng diak a tebechelek me sel kuterkeklii a diak kutireklii ma le “Choi” e ng diak bo le “Choi” e mo “Diak”? 18A Dios el diak lechoit a tekingel a kim ua ingii el dimlak le teleuadel a rengmam er a telbilam el ekor kemiu ma “Ochoi” le “Diak.” 19Ele Ngelekel a Dios, el Jesus Kristus, el kim ulemerk a chisel ngak ma Silbanus ma Timothy a dimlak le “Choi” e le “Diak.” Ngii a bai di blechoel el “Ochoi” er a Dios. 20Ele rokui el telbilel a Dios a di mlo “Ochoi” el okiu ingii. Iseikid ia uchul me kedokiu ngii el kmo, “Ng ua isei,” sel doldanges er a Dios. 21Ng Dios ngikel merenged er a delongeled kemiu me kemam el okiu a Kristus, e mla chemedolemam el kirel a ureram; 22ng mla dongchid e rullid el mo chedal, e meskid a Chedaol Reng el ngar a rengud, el olechotel e rolel a rokui el nglat er a Dios el kired. 23Mak umekedo er a Dios el mo klisichel a tekingek el kmo, ng dimlak el soak el mo uchul a udkelel a rengmiu a uchul me ng dimlekea kiko er a Korinth. 24Ng dimlak er a rengmam a mengedereder er kemiu er a kmo ng ngera kiriu el oumerang. Aki medengei el kmo kom mesisiich el oumerang, me kemam a oureor el obengkemiu el kirel a deuil a rengmiu.

will be added

X\