1 TIMOTHY 6

1Tirkel sibai a kirir el mengull er a re mastang er tir, me lak a chad el mo melekoi a mekngit el bedul a ngklel a Dios ma osisechekled. 2A re sibai a diak bo lak longull er a ruumerang el mastang er tir. Ng bai kirir el mengal mo blak a rengrir el mesiou ele tirkel mo ngma klungiolel omesiungir a oumerang e betik er a rengrir. Ng kirem el olisechakl e menge-lechel a ikal tekoi. 3A lsekum ng ngar ngii a chad el olisechakl a kuk ngodech el osisechakl el diak le ua ikel klemerang el tekingel a Rubak er kid el Jesus Kristus ma osisechakl el kirir a re chedal a Dios, 4e ngiil chad a di teluchel er a diak le meral tekoi, e diak a ngeral lodengei. Ng smecher el soal a klaititekangel ma klautoketok er a di tekoi er a ngor, el di omuchel a chelechei, ma omeleakl, ma omelemall el chisir a re chad, ma ultelechakl er a uldesuel el kirir a re chad, 5ma diak bo lak el klaititekangel er a delongelir a re chad el milkolk a rengrir, e diak lodengelii a klemerang e omdasu el kmo a de chedal a Dios e kede mo meteet. 6Ng klou a klungiolel a deko Dios el ungilbesul er a rengud a ikel ngar ngii er kid; 7ele ng dimlak a ngeral dobang el mer tial beluulchad, e diak a tal ngeral de nguu el tuobed er tial beluulchad; 8me bo lungilbesul er a rengud a le ngar ngii a biled ma keled. 9Ngdi tirkel oureng el mo meteet a mechetikaik er ongarm, el obedikl er a betok el chelsengsang e mekngit el di sorir a re chad, el ngii a mo orrebet er tir el di tomelleterir el mo diak a medechel er tir. 10Ele ngibes er a udoud a uchelel a bek el bedengel a mekngit; ng ngii a uchul ma re bebil er a re chad a mla mo diak loumerang e mla mo chuarm a rengrir er a betok el bedengel a ringel. 11Ngdi kau el mesiungel a Dios, mongeroid er kau er a ikal rokui el mekngit el tekoi. Molasem el mor a ikel sebechem el di blechoel el meruul a soal a Dios e ngar a ungil klengar er a re chedal a Dios; e oumerang, e oubltikerreng, e outekangel a ringel, e ungil el mor a re chad. 12Bo le meduch a rengum el mengaidesachel el mo ungil el oltirakl er a rolel a doumerang, me bo mnguu a nguked er a diak a ulebengelel klengar, el lulemekedong er kau a Dios el mor ngii, er ser cho bo mungil el ochotii er mederir a re betok el chad el kmo koumerang. 13Ak ngar medal a Dios el uchul a rokui el klengar, ma Kristus Jesus el mlo ungil el ochotii a loumerang er ngii el tekoi er medal a Pontius Pilatus, e dmu er kau el kmo, 14bo le blak a rengum el oltirakl a ikel bla kdu er kau me lak a metemall er ngii el mo lmuut er sel lluut el mei a Rubak er kid el Jesus Kristus. 15Tial lluut er ngii a mei a belsechel sel bo lungil er a rengul a Dios el King er a re king e Rubak er a rubak, el di ngii el tang a odengesall e ngar uchei el Merreder er a rokui el merreder. 16Ng di ngii el tang a diak a kodellel, e kiei er a kmal klou el llomes el diak a chad el sebechel el mo kmeed er ngii, e diak a tal chad el mla mesang ngiil Dios ma diak a sebechel el mesang. Le bor ngii a odanges ma diak a ulebengelel el omerreder! Amen. 17Mdu er tirkel betok a ngera er tir er tial beluulchad me lak le borbab a rengrir, ma ka lultuil a rengrir er a ikel di mo remiid el ilteet, e bai lotuil a rengrir er a Dios el bekerurau el omeskid a rokui el tekoi el kired el oldeu a rengud er ngii. 18Mdu er tir me bo loruul a ungil, el mo omdois a ungil el ureor, e bo le bekerurau, e bo le kldmokl el merous el mor a re bebil er a re chad, 19me longudel a uchul a iltetir el mo rolir el mor a uriul el klengar, me bo le sebechir el mo nguu a meral klengar el mo obengkel a Dios. 20Timothy, bo mkerekikl a ikal tekoi el mla moterekokl er kau. Mongeroid er kau er a mekngit el omelekoi ma diak a belkul el klaititekangel el leko ng klemedengei, 21ele te ngar ngii a re mla ua isei e mo imiit er a klemerang me ng mo diak loumerang. A krasia er a Dios bo lobengkemiu el rokui.

will be added

X\