1 TIMOTHY 5

1Lak moungeroel er a sechal el klou er kau, e bai mongedecheduch er ngii el ua cho mongedecheduch er a demam; ma omerellem el mor a re sechal el mekekerei er kau bo le ua omerellem el mor a ruchellem, 2ma omerellem el mor a re meklou el redil le ua omerellem el mor a delam, ma omerellem el mor a re mekekerei el redil le ua omerellem el mor a ruchedam, e le klikiid a blekerdelem el bedul tir. 3Molengeseu er a re melakl dil el meral metacherbesrir. 4A lsekum a melakl dil a ngar ngii a re ngelekel ma lechub e te ngelekir a re ngelekel, e ng kirir el ma rullii a ngerchelir el soal a Dios a le meruul el kirel a telungalek er tir, e seikid e ng mochu sebechir el mtechei a sulir a re demerir ma re derrir, ma re demerir el rubak ma re derrir el mechas. Tia odeuir a rengul a Dios. 5A melakl dil el meral metacherbesul e di ngii el tang, a mla mo ultuil a rengul er a Dios, e melemolem el olengit er ngii me ng olengeseu er ngii er a llomes ma klebesei; 6ngdi ngikel melakl dil el di ngar a temetel a rengul a di chad a bedengel e ulekoad a reng er ngii. 7Msbedeterir er a ikal tekoi, me lak bo le mekngit a chisir. 8Ngikel chad el diak lomekerreu er a re chedal, e a ngar uchei e tirkel kmeed er a bedengel, a mla mo imikr a ikel loumerang, e kuk mekngtei er a diak loumera er a Kristus. 9Ngdi melakl dil el 60 a rekil el mor bab el di mle ta bechil, a cho mosisebii er a babier er a ngklir a re melakl dil. 10Ng kirel chemolt el ungil omerellel, e ungil mellach e omekeroul er a re ngelekel, e mengedmokl er a re chad er a rael, e merisu ocherir a re chedal a Dios, e olengeseu er a re chad er a chelebulir, e blak a rengul el meruul a ungil tekoi. 11Ngdi lak molsiseb a ngklir a re mekekerel melakl dil er a ngklir a re melakl dil er a ikelesia. Ele bo lak le kilmekl a rengrir el mo bechiil e te mo omtok er a Kristus, 12me tochau a dellebeakl el mor tir ele te mla tomellii sel di mla telbilir. 13Ng dirrek el mo diak a ngeral loruul e di mengesuch obliil, el melaes e mechesang el melekoi a tekingir a re chad el diak a kirir er ngii. 14Me ng bai ungil a re mekekerel melakl dil a bo le bechiil, e loungalek, e loungerachel a delengcheklir, me lak le bsa techellel a cherarou el mo melekoi a mekngit el kired. 15Ng ngar ngii a re bebil er tir el mla touchakl el mo oltirakl er a Satan. 16A le ngar ngii a oumerang el chad el ngar ngii a re chedal el melakl dil, e ng kirel el olengeseu er tir me lak longesang er a ikelesia, me bo le mededaes el ngosuterir a re meral metacherbesrir el melakl dil. 17A re mechuodel er a ikelesia el ungil er a ngerchelir a kirir el mo erul chachisois a ududir, e a ngar uchei e tirkel omerk e olisechakl a tekingel a Dios. 18Ele Chedaol Llechukl a kmo, “Kele molechet er a ngerel a kerbou sel lorderd a dellomel el merrars a redechel” ma “Chad el oureor a kirel luduudel.” 19Lak morrenges a ultutakl el kirel a chad el oungerachel er a ikelesia a lak le terung el mor bab a olecholt a telemellel. 20E tirkel di melemolem el ngar a klengit cho mosmechokl er tir er mederir a re chad er a ikelesia me te mo medakt a rokui el chad el mor a osisiu el klengit. 21Ak ngar medal a Dios ma Kristus Jesus ma re ngellitel el anghel e dmu er kau el kmo, bo mungil el oltaut a ikal tekoi e lak molab el mol mei e mongetukel er a re chad. 22Lak morreched el omor a chimam el mengedaol er a chad el mor a omesiou er a urerel a Rubak, ma ka mongesechusem er kau er a kngtil a tar a chad; mongikiid er kau. 23Lak di molim a ralm e le merekong, e bai molim a sesei el bilong me lolengeseu er a kllem ma rektem el blechoel el mor ngii. 24A kngterir a re bebil er a re chad a bleketakl me ng di ma mukerrekeriil, e ngdi kngterir a re bebil a di mochu chemolt er uriul. 25Me ng dirrek el ua isei a ungil el omeruul a bleketakl, e ngdi bo lak lungil el obeketakl, me ngii a di diak el sebechel el obart.

will be added

X\