1 TIMOTHY 4

1A Chedaol Reng a bleketakl el melekoi el kmo, sel bo lekeed a ulebengelel a beluulchad, e a re bebil er a re chad a mo diak loumerang e mo orrenges a tekingel a cheblad el mekngit el reng, e moltirakl a diak le meral osisechakl er a mekngit el chelid, 2el lomerk er ngii a re bulak el chad el rengrir a ua lulekoad me ng dikea lolechesuar a klekakerous er a ungil ma mekngit. 3Tirkaikid olisechakl el kmo ng mekull a re chad a bo le bechiil, e diak le subed a longa bebil er a bedengel a kall el le bileob a Dios el bo longang e mereng a sulel el kirel a ruumerang el mla mo medengelii a klemerang. 4Ele rokui el lulemeob a Dios a ungil. Ng diak le kired loltngakl a ngii di le ngerang, ng bai kired el ngmai e meluluuch el mereng a sulel a Dios el kirel; 5ele tekingel a Dios ma nglunguuch er omereng el saul a remuul el mo ungil er medal. 6Cho mnga ikal osisechakl el mor a rudam, e ke meral mo ungil mesiungel a Kristus Jesus, e a rengum a mo mesisiich er a ikel tekingel a klemerang ma meral osisechakl el di bla moltirakl el mer chelechang. 7Lak mongesechusem er kau er a delbochel el diak longull er a Dios el cheldecheduch. Momeksau er kau er a tekoi er a reng me bo lungil a klengar er kau el oltirakl a tekingel a Dios. 8Omerellel a tekoi el melisiich a bedenged a ungil, ngdi omerellel a tekoi el melisiich a rengud el oltirakl a tekingel a Dios a kuk lmuut el ungil, ele ng diak di le kirel a klungioled er chelechal klengar e ng dirrek el kirel sel mei el klengar. 9A ikal bo kulekoi a klemerang, ma re bek el chad a kirir el ngmai el sichedekl er a rengrir. 10Kedoutekangel e meringel el oureor ele kedoumera er a di ngar el Dios el Osebelir a re bek el chad, e ngar uche el Osebelir a ruumerang. 11Mosisechakl a ikal tekoi er a ruumerang e mdu er tir me loltirakl. 12Lak a ngii di le chad el metetoech a medal er kau ele kau el dirk ngea-sek, e bai bo lungil a blekerdelem me losuub er kau a ruumerang, er a ungil el omerellem ma tekoi er a ngerem, ma bltikerreng er kau, ma blakerreng er kau er a ngerchelem, ma klikiid el klechad er kau. 13Bo le blak a rengum el menguiu a Chedaol Llechukl el mor a re chad, e mongedecheduch e molisechakl er tir er ngii el mor sel kikong. 14Lak mobes er a sengk er a Dios el mobang, el cho mngiluu er ser a lolekoi a re profet e le bor a chimorir er bebum a re mechuodel er a ikelesia. 15Moungerachel a ikal tekoi, e bo le blak a rengum er ngii, ma re bek el chad bo lomes er a ulekerulem er omesiou ma rolel cho moumerang. 16Bo mkerekikl er kau, ma tekoi el molisechakl. Ele cho bo mua isei, e kosebelau kau me tirkel orrenges er kau.

will be added

X\